Deuteronomy Chapter 17 - Paipera Tapu 1868 | Te Paipera Tapu 1868

Deuteronomy Chapter 17 - Paipera Tapu 1868

1
Kaua e patua ma Ihowa ma tou Atua tetahi kau, hipi ranei he koha tona, tetahi atu he ranei: he mea whakarihariha hoki tena ki a Ihowa ki tou Atua.
2
Ki te mea ka kitea i roto i a koe, i roto i tetahi o ou tatau e homai nei e Ihowa e tou Atua ki a koe, tetahi tangata, wahine ranei, i mahi nei i te kino ki te titiro a Ihowa a tou Atua, i whakapaheke hoki i tana kawenata,
3
I haere hoki, i mahi atu ki nga atua ke, a koropiko ana ki a ratou, ki te ra ranei, ki te marama ranei, ki tetahi ranei o nga mano o te rangi, kihai nei i whakaritea atu e ahau;
4
A ka korerotia mai ki a koe, a ka rongo koe, na, me ata ui marie e koe, na, he tika, he pono te korero, kua meatia taua mea whakarihariha i roto i a Iharaira:
5
Na, me tango mai e koe taua tangata, taua wahine ranei, i mea nei i taua mea kino, ki ou tatau, taua tangata hoki, taua wahine ranei, ka aki ai i a raua ki te kohatu, a, mate noa.
6
Ma te kupu a nga kai whakaatu tokorua, a nga kai whakaatu tokotoru ranei, e mate ai te tangata e tika ana kia whakamatea; otiia e kore ia e mate i te kupu a te kai whakaatu kotahi.
7
Ko nga ringaringa o nga kai whakaatu te pa wawe atu ki a ia hei whakamate i a ia, a, muri iho ko nga ringaringa o te iwi katoa. Penei ka whakakorea atu e koe te kino i roto i a koe.
8
Ki te pakeke rawa i a koe tetahi whakawakanga e whakaritea ana, he toto he toto, he whakawakanga he whakawakanga, he patu he patu, he mea tautohetohenga hoki i roto i ou tatau: na, me whakatika koe, me haere ki runga ki te wahi e whiriwhiri ai a Ihowa tou Atua;
9
Ka haere mai ai ki nga tohunga ki nga Riwaiti, ki te kai whakarite whakawa hoki e whakariterite ana i aua ra, ka ui atu hoki; a ma ratou e whakapuaki ki a koe te tikanga mo te whakariteritenga:
10
Na, me waiho e koe ki to ratou tikanga i whakapuakina mai ki a koe i taua wahi i whiriwhiri ai a Ihowa; kia tupato hoki kia rite te meatanga ki nga mea katoa i tohutohungia e ratou ki a koe:
11
Kia rite tau meatanga ki te tikanga o te ture i tohutohungia mai e ratou ki a koe, ki te ritenga hoki i korerotia e ratou ki a koe: kaua e peka ke atu i te kupu i whakapuakina mai e ratou ki a koe ki matau, ki maui.
12
A ko te tangata e mahi hikaka ana, a e kore e whakarongo ki te tohunga e tu ana, e minita ana i reira i te aroaro o Ihowa o tou Atua, ki te kai whakarite whakawa ranei, me whakamate taua tangata; a, ka whakakorea atu e koe te kino i roto i a Iharaira.
13
A, ka rongo katoa te iwi, ka wehi, e kore hoki e mahi hikaka ki muri iho,
14
Ka tae koe ki te whenua e homai ana e Ihowa e tou Atua ki a koe, a ka riro mai a reira i a koe, a ka noho koe ki reira, ka mea hoki, Ka meinga e ahau tetahi kingi moku, ka pera me nga iwi katoa i tetahi taha oku, i tetahi taha;
15
Ko ta Ihowa ko ta tou Atua e whiriwhiri ai ko ia anake tau e mea ai hei kingi mou: ko tetahi o o tuakana tau e mea ai hei kingi mou: e kore e ahei kia meatia e koe hei kingi mou te tangata iwi ke, ehara nei i te tuakana nou.
16
Otiia kaua ia e whakamaha i te hoiho mona, kaua ano hoki e whakahokia te iwi ki Ihipa, hei whakamaha i nga hoiho: kua mea nei hoki a Ihowa ki a koutou, E kore koutou e hoki na taua huarahi a mua ake nei.
17
Kaua ano hoki e whakatokomahatia nga hoa wahine mona, kei riro ke tona ngakau: kaua ano hoki e whakanuia rawatia e ia te hiriwa me te koura mona.
18
A ka noho ia ki runga ki te torona o tona rangatiratanga, na, me tuhituhi e ia ki roto ki tetahi pukapuka nga kupu o tenei ture, ena hoki i te aroaro o nga tohunga o nga Riwaiti:
19
A hei a ia taua pukapuka takoto ai, me korero hoki ia ki reira i nga ra katoa e ora ai ia: kia akona ai ia kia wehi i a Ihowa i tona Atua, mo tana whakarite i nga kupu katoa o tenei ture, me enei tikanga, mo tona mahi hoki i aua mea:
20
Kei whakakake tona ngakau ki ona teina, kei peka ke atu hoki ia i te whakahaunga, ki matau ki maui: kia roa ai ona ra i tona kingitanga, ona, me o ana tamariki, i waenganui i a Iharaira.