Deuteronomy Chapter 34 - Paipera Tapu 1868 | Te Paipera Tapu 1868

Deuteronomy Chapter 34 - Paipera Tapu 1868

1
Na, ka piki atu a Mohi i nga mania o Moapa ki Maunga Nepo, ki te tihi o Pihika, e titiro atu ana ki Heriko. A whakakitea mai ana e Ihowa ki a ia te whenua katoa o Kireara, a, tae noa ki Rana.
2
A Napatari katoa, te whenua o Eperaima, o Manahe hoki, te whenua katoa o Hura, te moana whakamutunga mai ra ano,
3
Te tonga, te mania, te wahi papatairite i Heriko, i te pa nikau, a Toara atu ana.
4
Na, ka mea mai a Ihowa ki a ia, Ko te whenua tenei i oati ai ahau ki a Aperahama, ki a Ihaka, ki a Hakopa, i mea ai, Ka hoatu e ahau a reira ki ou uri: ka whakatirohia atu e ahau o kanohi ki reira, otiia e kore koe e whiti ki reira.
5
Na, ka mate a Mohi te pononga a Ihowa ki reira ki te whenua o Moapa, ka pera me ta Ihowa i korero ai.
6
A tanumia iho ia e ia ki tetahi kokoru o te whenua o Moapa, i te ritenga atu o Pete-peoro: a kahore ano i kitea e te tangata tona urupa, a, mohoa noa nei.
7
A kotahi rau e rua tekau nga tau o te whanautanga o Mohi i tona matenga ai: kahore ano i ataruatia tona kanohi, kahore ano hoki i heke noa tona kaiotatanga.
8
Na, uhungatia ana a Mohi e nga tamariki a Iharaira i nga mania o Moapa, e toru tekau nga ra: a taka noa nga ra i uhungatia i tangihia ai a Mohi.
9
A ki tonu a Hohua tama a Nunu i te wairua o te matauranga; na Mohi hoki i whakapa ona ringaringa ki runga ki a ia: a, whakarongo mai ana ki a ia nga tamariki a Iharaira, mea ana i nga mea i whakahaua e Ihowa ki a Mohi.
10
A kahore ano kia ara noa i roto i a Iharaira tetahi atu poropiti hei rite mo Mohi, i mohio nei a Ihowa ki a ia, titiro atu, titiro mai,
11
Ara, mo nga tohu katoa, me nga merekara i ungā ai ia e Ihowa ki te mahi ki te whenua o Ihipa, ki a Parao, ratou ko ona tangata katoa, me tona whenua katoa hoki,
12
Mo nga mahi katoa hoki, a te ringaringa kaha, mo nga mea nui katoa, nga mea whakawehi i meatia e Mohi ki nga aroaro o Iharaira katoa.