Ecclesiastes Chapter 2 - Paipera Tapu 1868 | Te Paipera Tapu 1868

Ecclesiastes Chapter 2 - Paipera Tapu 1868

1
I mea ahau i roto i toku ngakau, Tena ra, ka whakamatauria koe e ahau ki te koa; na, te pai ra mau. Nana, he horihori ano hoki tenei.
2
Te kata, kiia iho e ahau he haurangi; te koa, he mahi aha tana?
3
I whai ahau i roto i toku ngakau kia tukua putia toku tinana ki te waina, hei runga ano ia i te whakaaro nui te whakahaere a toku ngakau; kia mau pu ano hoki i a au te wairangi, kia kitea ra ano e ahau he aha ra tena mea pai a nga tamariki a te tangata e mahia nei e ratou i raro i te rangi i nga ra katoa e ora nei ratou.
4
I whakanuia e ahau aku mahi, i hangā e ahau etahi whare moku, i whakatokia e ahau etahi mara waina maku.
5
I hangā e ahau etahi kāri maku, me etahi mara rakau, whakatokia iho e ahau ki reira nga tu rakau katoa e whai hua ano.
6
I hangā e ahau nga poka wai maku hei whakamakuku i te ngahere i tupu ai nga rakau.
7
He pononga tane aku, he pononga wahine, me nga pononga ano i whanau ki te whare, he tini ano hoki aku kau, aku hipi, maha atu i ā te hunga katoa i mua i a au i Hiruharama.
8
I amenea mai ano hoki e ahau he hiriwa, he koura maku, me to nga kingi taonga ake ano, me to nga kawanatanga; i meatia mai ano e ahau nga kai waiata tane, me nga kai waiata wahine, me nga ahuareka ano a nga tamariki a te tangata, nga tini tu mea whakatangi.
9
Heoi kua nui noa atu ahau, neke ake ana aku i ā te hunga katoa i mua ake i a au i Hiruharama, me te mau ano hoki aku whakaaro nui.
10
Nga mea katoa ano hoki i hiahiatia e oku kanohi, kihai i kaiponuhia e ahau ki a raua, kihai ano i pehia e ahau toku ngakau i te meatanga atu ki tetahi whakahari; i hari hoki toku ngakau i oku ruhatanga katoa, ko te wahi hoki tenei ki a au o oku ruhatanga katoa.
11
A i whakaaroa ano e ahau aku mahi katoa i mahia e oku ringa, me te ruhatanga i ruha ai ahau i te mahinga; nana, he horihori katoa, he pouritanga wairua, kahore hoki he hua pai i raro i te ra.
12
I anga ano ahau ki te matakitaki atu ki te whakaaro nui, ki te haurangi, ki te wairangi: he aha hoki ta te tangata e mea ai ina haere mai i muri i te kingi? ko te mea hoki kua oti noa ake.
13
Katahi ahau ka kite, hira ake te whakaaro nui i te wairangi; he pera hoki me te māramatanga e hira ake ana i te pouritanga.
14
Te tangata whakaaro nui, kei tona mahunga ona kanohi, kei te pouri ia te wairangi e haere ana: heoi i kite ano hoki ahau kotahi tonu te mea e pa ana ki a ratou katoa.
15
Katahi ahau ka ki ake i roto i toku ngakau: Te mea i pa atu ki te wairangi e pa ana ano ki a au; he aha hoki aku whakaaro i nui ake ai? Na ko taku kianga ake i roto i toku ngakau, He mea horihori ano hoki tenei.
16
No te mea kahore he maharatanga ki te tangata whakaaro nui raua ko te wairangi, a, ake, ake, ake; nga mea katoa hoki onaianei ka wareware i nga ra e haere ake nei. He pehea ra te matenga o te tangata whakaaro nui?—raua tahi ano ko te wairangi.
17
Na kua kino ahau ki te ora; no te mea he hē ki a au te mahi e mahia ana i raro i te ra: he horihori katoa hoki, he pouritanga wairua.
18
I kino ano hoki ahau ki toku mauiui i mauiui ai ahau i raro i te ra: no te mea ka mahue iho i a au ma te tangata i muri i a au.
19
Ko wai hoki e mohio ana he tangata whakaaro nui ia, he wairangi ranei? Heoi kei a ia te tikanga mo oku mauiui katoa i mauiui ai ahau, i nui ai ano hoki oku whakaaro i raro i te ra. He mea horihori ano hoki tenei.
20
Na ka anga au ka mea kia whakaparahako toku ngakau ki te mauiui katoa i mauiui ai ahau i raro i te ra.
21
He tangata hoki tenei kei runga nei i te whakaaro nui tana mahi, kei runga i te matauranga, kei runga i te tika; heoi ka tukua atu e ia hei wahi ma te tangata kihai nei i mahi. He mea horihori ano hoki tenei, he hē nui.
22
He aha hoki te tukunga iho ki te tangata o tona mauiui katoa, o te pouritanga o tona ngakau i mauiui ai ia i raro i te ra?
23
He pouri hoki ona ra katoa, he ngakau mamae tona raruraru, e kore ano hoki tona ngakau e okioki i te po. He mea horihori ano hoki tenei.
24
Kahore he pai ma te tangata hei rite mo te kai, mo te inu, mo te whakakite mai ano hoki i te pai ki tona wairua i roto i tona mauiui katoa. I kite ano hoki ahau i tenei, no te ringaringa o te Atua tenei.
25
Ko wai hoki hei rite moku ina kai, ko wai hoki e nui atu ana tona hohoro ki te kai?
26
Ki te tangata hoki e pai ana ki to te Atua aroaro e homai ana e ia nga whakaaro nui, te matauranga me te koa; ki te tangata hara ia e homai ana e ia he raruraru, ara, he kohikohi, he amene mea mai hei hoatutanga mana ki te tangata e pai ana ki to te Atua aroaro. He mea horihori ano hoki tenei, he pouritanga wairua.