- 1
- Na, i nga ra o Ahahueruha, (ara, o Ahahueruha i kingi nei i Inia, a tae noa ki Etiopia, kotahi rau e rua tekau ma whitu nga kawanatanga:)
- 2
- I aua ra, i te mea e ata noho ana a Kingi Ahahueruha i runga i te torona o tona kingitanga i Huhana i te whare kingi,
- 3
- I te toru o nga tau o tona kingitanga ka tukua e ia he hakari ma ona rangatira katoa, ratou ko ana tangata; i tona aroaro ano te hunga nunui o Pahia, o Meria, nga tangata rarahi, ratou ko nga rangatira o nga kawanatanga:
- 4
- I te mea e whakakitea ana e ia te taonga me te kororia o tona kingitanga, tona honore, me tona ataahua nui, he maha nga ra, kotahi rau e waru tekau nga ra.
- 5
- Na, te takanga o aua ra, ka tukua he hakari e te kingi ma te iwi katoa i reira i Huhana i te whare kingi, ma te rahi, ma te iti, e whitu nga ra, i te marae i te kari i te whare o te kingi.
- 6
- Nga hipoki he mea ma, he kerīni, he pūru; nga aho he rinena pai, he mea papura, nga mowhiti i mau ai he hiriwa; nga pou he mapere; nga takotoranga he koura, he hiriwa; a, te papa o raro he mapere whero, pounamu, ma, mangu.
- 7
- Nga kapa inu ano hoki ma ratou he oko koura; rere ke tonu ano hoki te ahua o tenei oko, o tenei oko; tona nui ano hoki o te waina kingi, rite tonu ki to te kingi tikanga.
- 8
- I rite ano hoki te inumanga ki te ture, kahore he tohe, na te kingi hoki taua tikanga i whakatakoto ki nga rangatira katoa o tona whare, ko ta te tangata i pai ai ko tana tera e mea ai.
- 9
- I tukua ano hoki e te kuini e Wahati he hakari ma nga wahine i roto i te whare kingi o Kingi Ahahueruha.
- 10
- I te whitu o nga ra, i te mea e koa ana te ngakau o te kingi i te waina, ka mea ia ki a Mehumana, ratou ko Pitita, ko Harapona, ko Pikita, ko Apakata, ko Tetara, ko Karakaha, ki nga rangatira ruma tokowhitu i mahi nei i te aroaro o Kingi Ahahueruha,
- 11
- Kia kawea mai te kuini a Wahati ki te aroaro o te kingi; kia mau ano hoki ki a ia te karauna kuini, kia whakakitea atu ai tona ataahua ki nga iwi, ki nga rangatira: he pai hoki tona ahua.
- 12
- Heoi kihai a Kuini Wahati i pai kia haere mai i ta te kingi kupu i korerotia atu e ana rangatira ruma. Na, whakatakariri rawa te kingi, a mura ana tona riri i roto i a ia.
- 13
- Katahi te kingi ka korero ki nga tangata whai whakaaro i mohio nei ki nga taima, (ko ta te kingi tikanga hoki ia, he mea mea ki te aroaro o te hunga katoa e mohio ana ki te ture, ki te whakarite tikanga;)
- 14
- Ko Karahena hoki i tata ki a ia, ko Hetara, ko Aramata, ko Tarahihi, ko Merehe, ko Marahena, ko Memukana, ara, nga rangatira tokowhitu o Pahia, o Meria, i kite nei i te mata o te kingi, a, i noho hei tuatahi i te kingitanga;
- 15
- Ki ta te ture, ko te aha kia meatia ki te kuini, ki a Wahati, mona kihai i whakarite i te kupu a Kingi Ahahueruha i kawea atu e nga rangatira ruma?
- 16
- Na, ko te meatanga mai a Memukana i te aroaro o te kingi ratou ko nga rangatira, Ehara i te mea hē ki te kingi anake ta Kuini Wahati; ki nga rangatira katoa ano ia, ki nga iwi katoa o nga kawanatanga katoa o Kingi Ahahueruha.
- 17
- Ka haere hoki te rongo o te kuini ki nga wahine katoa, a ka whakahawea o ratou kanohi ki ā ratou tane, ina ka korerotia, I mea a Kingi Ahahueruha kia kawea mai a Kuini Wahati ki tona aroaro, a kihai tera i haere mai.
- 18
- Ka pena ano aianei te kupu a nga wahine rangatira o Pahia, o Meria, ki nga rangatira katoa a te kingi, ina rongo ratou ki te mahi a te kuini. Na, nui atu te whakahawea me te riri.
- 19
- Ki te mea e pai ana ki ta te kingi, kia puta he kupu kingi i tona aroaro, kia tuhituhia hoki ki roto ki nga ture o nga Pahi, o nga Meri, kei taka, ara, kia kaua a Wahati e haere mai ki te aroaro o Kingi Ahahueruha, ko tona kuinitanga ano hoki kia hoatu e te kingi ki tetahi atu e pai ake ana i a ia.
- 20
- A ka rangona ta te kingi tikanga e whakatakoto ai ia puta noa i tona kingitanga, (he nui hoki ia,) katahi nga wahine katoa ka whakahonore i ā ratou tane, i te mea iti, i te mea rahi.
- 21
- Na, pai tonu te kupu ki te whakaaro a te kingi, ratou ko nga rangatira; a, rite tonu ki te kupu a Temukana ta te kingi i mea ai.
- 22
- Na, tukua atu ana e ia etahi pukapuka ki nga kawanatanga katoa a te kingi, ki tenei kawanatanga, ki tenei kawanatanga, he mea whakarite ki to reira tikanga mo te tuhituhi, ki tenei iwi, ki tenei iwi, he mea whakarite ki to reira reo, ara, ko nga tane katoa hei rangatira i roto i o ratou whare; kia korerotia ano hoki i te reo o to reira iwi.
Address: 
Phone: 
Email: