- 1
- Na, ka mea a Ihowa ki a Mohi, Kia kotahi atu whiu e whakapangia atu e ahau ki a Parao, ki Ihipa hoki; muri iho ka tukua atu koutou e ia i konei: ka tukua atu koutou e ia, ina, ka tino peia katoatia atu koutou e ia i konei.
- 2
- Korero atu ki nga taringa o te iwi, kia tonoa atu e ia tangata e ia tangata i tona hoa noho tata, e tera wahine e tera wahine i tona hoa noho tata, nga mea hiriwa, me nga mea koura.
- 3
- A i meinga ano e Ihowa kia paingia te iwi e nga Ihipiana. Ko te tangata hoki, ko Mohi, i nui rawa ki te whenua o Ihipa, ki te aroaro o nga tangata o Parao, ki te aroaro ano hoki o te iwi.
- 4
- Na, ka mea a Mohi, Ko te kupu tenei a Ihowa, Kei waenganui po ka haere atu ahau, a, waenganui atu o Ihipa:
- 5
- A ka mate nga whanau matamua katoa o te whenua o Ihipa, no te matamua a Parao e noho ana i runga i tona torona, a tae iho ana ki te matamua a te pononga wahine i tua i te mira; me te whanau matamua katoa ano hoki a nga kararehe:
- 6
- A ka nui te tangi, puta noa i te whenua katoa o Ihipa, kahore he pera i mua, e kore ano hoki e pera e takoto ake nei.
- 7
- Otira e kore e oraora te arero o tetahi kuri ki tetahi o nga tamariki a Iharaira, ki te tangata, ki te kararehe; kia mohio ai koutou e titore ana a Ihowa i waenga o nga Ihipiana o Iharaira.
- 8
- A e haere ake enei tangata katoa au ki a au, e piko iho ki a au, e mea, Haere koe, me te iwi katoa e haere ana i raro i ou waewae; a, muri iho ka haere ahau. A puta atu ana ia i a Parao, he nui hoki tana riri.
- 9
- A ka mea mai a Ihowa ki a Mohi, E kore a Parao e whakarongo ki a korua, kia maha ai aku merekara ki te whenua o Ihipa.
- 10
- A meatia ana e Mohi raua ko Arona anei merekara katoa ki te aroaro o Parao: a i whakapakeke ano a Ihowa i te ngakau o Parao, a kihai ia i tuku atu i nga tamariki a Iharaira i tona whenua.
Address: 
Phone: 
Email: