Exodus Chapter 30 - Paipera Tapu 1868 | Te Paipera Tapu 1868

Exodus Chapter 30 - Paipera Tapu 1868

1
Me hanga ano e koe he aata, hei tahunga mea kakara: ki te hitimi te rakau e hanga ai e koe taua mea.
2
Kia kotahi whatianga tona roa, kia kotahi hoki whatianga tona whanui; kia tapawha: kia rua hoki nga whatianga tona teitei: ko taua rakau ra ano mo nga haona.
3
Me whakakikorua hoki e koe taua mea ki te koura para-kore, a runga me ona taha, a taka noa, me ona haona hoki; me hanga ano e koe he niao koura mo taua mea, a tawhio noa.
4
Me hanga ano e koe etahi mowhiti koura mona, kia rua, mo raro iho i tona niao, ki ona koki e rua, me hanga e koe aua mea ki ona taha e rua: a hei kuhunga ua mea mo nga amo, hei amohanga.
5
Ko te hitimi ano hoki te rakau e hangā ai e koe nga amo, me whakakikorua ano hoki ki te koura.
6
A me whakatu e koe taua mea ki mua mai o te arai, o tera i te aaka o te whakaaturanga, ki mua mai o te taupoki whakamarietanga i runga ake o te whakaaturanga, o te wahi e tutaki ai ahau ki a koe.
7
A me tahu e Arona he whakakakara reka ki runga i taua mea i tenei ata i tenei ata: me tahu e ia te whakakakara ki runga i taua mea, ina whakapaia e ia nga rama.
8
A ka tahuna e Arona nga rama i te ahiahi, me tahu e ia he whakakakara ki runga i taua mea, he whakakakara e mau tonu ana ki te aroaro o Ihowa, puta noa i o koutou whakatupuranga.
9
Kei whakaekea e koutou he whakakakara ke ki runga ki taua mea, he tahunga tinana ranei, he whakahere toto-kore ranei; kaua ano hoki e ringitia e koutou he ringihanga ki runga ki taua mea.
10
A me mea e Arona he whakamarietanga ki runga ki ona haona, (kia kotahi ano meatanga i te tau kotahi,) ki te toto o nga whakahere hara o nga whakamarietanga: kia kotahi ano whakamarietanga e mea ai ia i te tau kotahi ki runga i taua mea, puta noa i o koutou whakatupuranga: he mea tino tapu tena mea ki a Ihowa.
11
A i korero ano a Ihowa ki a Mohi, i mea,
12
E taua e koe nga tangata o nga tamariki a Iharaira, ara, nga mea o ratou e taua ana, na me homai e ratou, e ia tangata e ia tangata, he utu mo tona wairua ki a Ihowa, ina taua ratou e koe; kia kore ai he whiu i roto i a ratou, ina taua e koe.
13
Ko tenei ta ratou e homai ai, ko nga tangata katoa e haere atu ana ki roto ki te hunga kua taua, hei te hawhe o te hekere, o te hekere o te wahi tapu: (e rua tekau nga kera kei roto i te hekere kotahi:) hei te hawhe hekere te whakahere ki a Ihowa.
14
Ko nga tangata katoa e haere atu ana ki roto ki te hunga kua taua, nga mea e rua tekau o ratou tau, me nga mea i maha atu, me homai e ratou he whakahere ki a Ihowa.
15
E kore e maha ake a te tangata taonga, e kore ano hoki e torutoru iho i te hawhe hekere a te rawa-kore, ina homai e ratou he whakahere ki a Ihowa, hei mea whakamarietanga mo o koutou wairua.
16
Na, me tango e koe te moni whakamarie a nga tamariki a Iharaira a ka waiho mo nga mahi o te tapenakara o te whakaminenga; a hei whakamaharatanga taua mea ki nga tamariki a Iharaira ki te aroaro o Ihowa, hei whakamarietanga mo o koutou wairua.
17
A i korero mai ano a Ihowa ki a Mohi, i mea,
18
Me hanga ano hoki e koe he takotoranga wai ki te parahi, ki te parahi ano hoki tona turanga, hei horoinga: ka whakatu ai ki te takiwa a te aata o te tapenakara o te whakaminenga, me riringi ano hoki e koe he wai ki roto.
19
A me horoi o ratou ringaringa me o ratou waewae e Arona ratou ko ana tama ki taua mea.
20
Ka haere ratou ki roto ki te tapenakara o te whakaminenga, me horoi ratou ki te wai, kei mate; ki te whakatata mai ranei ratou ki te aata ki te minita, ki te tahu i te whakahere ahi ki a Ihowa:
21
Na, ka horoi ratou i o ratou ringaringa, i o ratou waewae, kei mate; a ka waiho hei tikanga pumau ma ratou, mana, ma ona uri, puta noa atu i o ratou whakatupuranga.
22
I korero mai ano a Ihowa ki a Mohi, i mea,
23
Tangohia mai mau nga tino mea kakara, te maira pai, kia rima rau hekere, te hinamona reka, me hawhe tera, ara, kia rua rau kia rima tekau hekere, me te karamuha reka, kia rua rau kia rima tekau hekere,
24
Te kahia hoki, kia rima rau hekere, ki nga hekere o te wahi tapu, me te hinu oriwa, kia kotahi hine:
25
A me hanga e koe hei hinu mo te whakawahinga tapu, he hinu whakaranu, ta te kai whakaranu e hanga ai: ka waiho hei hinu mo te whakawahinga tapu.
26
A me whakawahi e koe te tapenakara o te whakaminenga ki taua mea, me te aaka hoki o te whakaaturanga,
27
Me te tepara, me nga oko katoa i runga, me te turanga rama, me ona oko, me te aata whakakakara,
28
Me te aata tahunga tinana, me ona oko katoa me te takatoranga wai, me tona turanga.
29
A me whakatapu aua mea e koe kia tino tapu: ka tapu nga mea katoa e pa ana ki aua mea.
30
A me whakawahi ano e koe a Arona ratou ko ana tama, me whakatapu ano hoki ratou e koe hei tohunga maku.
31
Me korero ano hoki e koe ki nga tamariki a Iharaira, me ki atu, Hei hinu tenei maku, mo te whakawahinga tapu, puta noa atu i o koutou whakatupuranga.
32
Kei ringitia ki te kikokiko o te tangata, kei hangā ano hoki e koutou tetahi mea pena, he mea e rite ana te hanganga: he mea tino tapu tena, a ka tapu ano ki a koutou.
33
Ki te whakaranua e te tangata tetahi mea pena; ki te meatia atu ranei e ia ki runga ki te tangata ke, ina, ka hatepea atu ia i roto i tona iwi.
34
A i mea ano a Ihowa ki a Mohi, Tangohia mai mau etahi mea kakara, he takete, he oneka, he karapanuma; enei mea kakara me te parakihe para-kore; kia rite te taimaha o tetahi o tetahi:
35
Ka hangā ai e koe hei mea kakara, hei mea whakaranu, ta te kai whakaranu e hanga ai, he mea konatunatu, he mea para-kore, he mea tapu:
36
Na, ka tukia e koe tetahi wahi kia ririki rawa, ka whakatakoto ai i tetahi wahi ki mua mai o te whakaaturanga i roto i te tapenakara o te whakaminenga, ki te wahi e tutaki ai ahau ki a koe: hei mea tino tapu tena ki a koutou.
37
A ko taua mea kakara ka hangā nei e koe, kei hangā tetahi ma koutou e rite ana te hanganga ki to tera: hei mea tapu tena ki a koe ma Ihowa.
38
Ki te hangā e te tangata he mea pena, hei honginga atu mana, ka hatepea atu ia i roto i tona iwi.