Exodus Chapter 8 - Paipera Tapu 1868 | Te Paipera Tapu 1868

Exodus Chapter 8 - Paipera Tapu 1868

1
Na, ka korero mai a Ihowa ki a Mohi, Haere ki a Parao, mea atu ki a ia, E penei mai ana a Ihowa, Tukua mai toku iwi ki te mahi ki a au.
2
A ki te kore koe e rongo ki te tuku i a ratou, na, ka patua e ahau o rohe katoa ki te poroka.
3
A ka whakatupuria ake e te awa tona tini noa iho o te poroka, a e ngahue ake ratou ki roto ki tou whare, ki tou whare moenga hoki, ki runga hoki ki tou moenga, ki roto hoki ki te whare o ou tangata, ki runga hoki ki tou iwi, ki roto ano hoki ki au oumu, ki roto hoki ki o pokepokenga paraoa:
4
A e haere ake te poroka ki runga ki a koe, ki runga ano hoki ki tou iwi, ki runga hoki ki ou tangata katoa.
5
A i korero ano a Ihowa ki a Mohi, Mea atu ki a Arona, Torona atu tou ringaringa, me to tokotoko, ki runga i nga wai e rere ana, ki runga i nga awa, ki runga i nga roto, kia haere ake ai nga poroka ki runga ki te whenua o Ihipa.
6
A te toronga atu o te ringaringa o Arona ki runga i nga wai o Ihipa; na, ngahue ake ana nga poroka, a kapi ana te whenua o Ihipa.
7
A i peratia ano e nga tohunga ki a ratou karakia maori, a whakaputaina ake ana e ratou nga poroka ki te whenua o Ihipa.
8
Na, ka karanga a Parao ki a Mohi raua ko Arona, a ka mea atu, Inoi atu ki a Ihowa, kia tangohia atu e ia nga poroka i a au, i toku iwi hoki; a ka tuku atu ahau i te iwi, ki te mea patunga tapu ki a Ihowa.
9
Na, ko te meatanga mai a Mohi ki a Parao, Kia whakanuia ake koe i a au; ahea inoi atu ai ahau mou, mo o tangata, mo to iwi hoki, kia whakakahoretia atu nga poroka i a koe, i ou whare ano hoki, kia toe ki te awa anake?
10
A ka mea ia, Hei apopo. Na, ka mea mai ia, Ka whakaritea tau kupu, kia mohio ai koe kahore tetahi e rite ana ki a Ihowa ki to matou Atua.
11
A ka mawehe atu i a koe nga poroka, i ou whare hoki, i o tangata, i tou iwi ano hoki; a e toe ki te awa anake.
12
A, te haerenga atu o Mohi raua ko Arona i a Parao, na, ka karanga a Mohi ki a Ihowa, mo nga poroka i whakamuia ake e ia ki a Parao.
13
A peratia ana e Ihowa me ta Mohi i mea ai; na, ka mate atu nga poroka i nga whare, i nga kāinga, i nga mara ano hoki:
14
A apoapohia ana e ratou, puranga atu puranga atu: a, piro ana te whenua.
15
A ka kite a Parao ka whai taanga manawa, ka whakapakeke ano i tona ngakau, kahore hoki i whakarongo ki a raua; i rite tonu ki ta Ihowa i korero ai.
16
Na, ko te meatanga mai a Ihowa ki a Mohi, Mea atu ki a Arona, Torona atu to tokotoko, patua hoki te puehu o te whenua, kia whakakutu ai ki te whenua katoa o Ihipa.
17
A peratia ana e raua; te toronga atu o te ringaringa o Arona me tana tokotoko, patua ana te puehu o te whenua, a ka meinga hei kutu ki te tangata, ki te kararehe; he kutu kau te puehu katoa o te oneone, puta noa i te whenua katoa o Ihipa.
18
A peratia ana ano hoki e nga tohunga ki a ratou whakananakia, hei whakangahue ake i te kutu; otira, kihai i ahei i a ratou; a muia ana te tangata me te kararehe e te kutu.
19
Katahi ka mea atu nga tohunga ki a Parao, Na te matikara o te Atua tenei: a ka whakapakeketia te ngakau o Parao, kihai hoki ia i rongo ki a raua; i rite tonu ki ta Ihowa i korero ai.
20
Na, ka korero mai a Ihowa ki a Mohi, Kia maranga wawe koe i te ata, a ka tu ki te aroaro o Parao; na, e haere mai ana ia, ki te wai; a ka mea atu ki a ia, E penei mai ana a Ihowa, Tukua mai toku iwi ki te mahi ki a au.
21
A ki te kahore koe e tuku mai i toku iwi, na, ka tukua atu e ahau nga huihuinga namu ki a koe, ki o tangata hoki, ki tou iwi, ki roto hoki i ou whare; a e ki nga whare o nga Ihipiana i nga huihuinga namu, me te whenua hoki e noho nei ratou.
22
A ka wehewehea e ahau, i taua ra, te whenua o Kohena, e noho nei toku iwi, kei whai huihuinga namu a reira; kia mohio ai koe ko Ihowa ahau i waenganui o te whenua.
23
A maku e whakatakoto he arai ki waenganui o toku iwi, o tou iwi: ko apopo tenei tohu meatia ai.
24
A peratia ana e Ihowa; te tino putanga mai o te huihuinga namu, tona nanakia ra, ki roto ki te whare o Parao, ki roto hoki ki nga whare o ana tangata, ki te whenua katoa ano hoki o Ihipa; ngaro ana te whenua i te huihuinga namu.
25
Na, ka karanga a Parao ki a Mohi raua ko Arona, a ka mea, Haere koutou, meatia nga patunga tapu ki to koutou Atua ki tenei whenua ano.
26
A ka mea mai a Mohi, E kore e pai kia pena; ta te mea ka meatia e matou hei patunga tapu ki a Ihowa ki to matou Atua, nga mea e morikarika ai nga Ihipiana: na, ki te patua e matou ki to ratou aroaro nga mea e morikarika ai nga Ihipiana, e kore ranei ratou e aki i a matou ki te kohatu?
27
Ka haere matou ki te koraha, kia toru nga ra ki te ara, ka mea patunga tapu ai ki a Ihowa ki to matou Atua, ka pera ano me tana i ako mai ai ki a matou.
28
Na, ka mea a Parao, Ka tukua atu koutou e ahau ki te mea patunga tapu ki a Ihowa ki to koutou Atua, ki te koraha; otiia aua e haere rawa ki tawhiti: inoi atu korua moku.
29
A ka mea a Mohi, Nana, ka mawehe atu ahau nei i a koe, na, ka inoi atu ahau ki a Ihowa kia turere atu nga huihuinga namu i a Parao, i ona tangata, i tona iwi ano hoki apopo: otiia kaua a Parao e tinihanga ano, e mea kia kaua e tukua atu te iwi ki te mea patunga tapu ki a Ihowa.
30
Na, ka mawehe atu a Mohi i a Parao, a ka inoi atu ki a Ihowa.
31
A peratia ana e Ihowa me ta Mohi i mea ai; a ka mea ia i nga huihuinga namu kia rere atu i a Parao, i ona tangata, i tona iwi ano hoki; kihai i toe te tahi.
32
Na, ka whakapakeke a Parao i tona ngakau i taua taima ano hoki, kihai ano hoki i tuku atu i te iwi.