Ezekiel Chapter 10 - Paipera Tapu 1868 | Te Paipera Tapu 1868

Ezekiel Chapter 10 - Paipera Tapu 1868

1
Na taku tirohanga atu, nana, i te kikorangi, i runga ake i te māhunga o nga kerupima, ka kitea i runga i a ratou me te mea ko te kohatu hapaira, rite tonu ki te ahua o te torona ki te titiro atu.
2
Na, ka korero atu ia ki te tangata i te kakahu rinena, i mea atu ia, Tomo atu ki waenganui o nga wīra, ki raro i te kerupa, whakakīa to ringaringa ki nga waro ahi i waenganui i nga kerupima, ka rui atu ki runga ki te pa. Na, haere atu ana ia me te titiro atu ano ahau.
3
Na, tu tonu nga kerupima i te taha ki matau o te whare, i te haerenga atu o taua tangata; kī tonu hoki to roto marae i te kapua.
4
Katahi ka kake atu te kororia o Ihowa i te kerupa ki te korupe o te whare, kī tonu iho te whare i te kapua, kī tonu hoki te marae i te kanapatanga o to Ihowa kororia.
5
A i rangona mai te haruru o nga parirau o nga kerupima i te marae ano o waho, me te mea ko te reo o te Atua Kaha-rawa ina korero.
6
Na, i tana whakahaunga atu i te tangata i te kakahu rinena, i tana meatanga atu, Tikina atu he ahi i roto i nga wīra, i roto i nga kerupima; katahi tera ka haere atu ka tu ki te taha o nga wīra.
7
Na, ka totoro atu te ringaringa o tetahi kerupa i roto i nga kerupima ki te ahi i waenganui i nga kerupima, hapainga mai ana e ia, hoatu ana ki nga ringaringa, o tera i te kakahu rinena. Na, tangohia ana e ia, a haere ana.
8
I kitea atu ano hoki te ahua o te ringaringa tangata i nga kerupima i raro i o ratou parirau.
9
A i kitea atu ano e ahau, na, e wha nga wīra i te taha o nga kerupima, kotahi te wīra i te taha o te kerupa kotahi, kotahi te wīra i te taha o te kerupa kotahi. Na, te ahua o nga wīra koia ano kei te kara o taua kohatu nei, o te perira.
10
Na, ki te tirohia atu aua mea, kotahi ano te ahua o ratou e wha, me te mea ano kotahi te wīra i roto i te wīra.
11
I to ratou haerenga i haere ratou i o ratou taha e wha; kihai ratou i tahuri i a ratou i haere ra; na, te wahi i anga atu ai te mātenga, whai tonu atu ratou ki reira; kihai ratou i tahuri i a ratou i haere ra.
12
Na, o ratou tinana katoa, o ratou tuara, o ratou ringaringa, o ratou parirau, me nga wīra ano, kapi tonu i te kanohi, a taka noa, taka noa, ara, nga wīra i a ratou tokowha.
13
Na, nga wīra ra, i a au ano e whakarongo ana, ka pa te karanga ki a ratou, Hurihuri,
14
Na, e wha nga mata o tetahi, o tetahi, o ratou; te mata tuatahi he mata kerupa, te mata tuarua he mata tangata, te tuatoru he mata raiona, te tuawha he mata ekara.
15
I whakanekehia ano hoki nga kerupima ki runga. Ko te mea ora tenei i kitea e ahau ki te awa, ki Kepara.
16
Na, i te haerenga o nga kerupima, i haere ano nga wīra, i to ratou taha, a ka ara ake nga parirau o nga kerupima, he mea kia maiangi ake ai ratou ki runga atu i te whenua, kihai ano aua wīra i tahuri ke i to ratou taha.
17
Ka tu era, ka tu enei; ka maiangi era ki runga, ka maiangi ano enei ki runga; no te mea i roto i a ratou te wairua o te mea ora.
18
Na, kua riro atu te kororia o Ihowa i runga i te korupe o te whare, tau tonu iho ki runga ki nga kerupima.
19
Katahi ka ara nga parirau o nga kerupima, maiangi atu ana ratou i runga i te whenua, me te titiro atu ano ahau: i to ratou taha ano nga wīra i to ratou haerenga atu, a tu ana tenei tenei i te kuwaha o te keti o te whare o Ihowa i te taha ki te rawhiti; i runga ano i a ratou te kororia o te Atua o Iharaira i te taha ki runga.
20
Ko te mea ora tenei i kitea e ahau i raro i te Atua o Iharaira i te awa, i Kepara; i mohio ano hoki ahau ko nga kerupima ena.
21
E wha nga mata o tenei, o tenei, e wha ano nga parirau o tenei, o tenei; i raro ano i o ratou parirau te ahua o nga ringaringa o te tangata.
22
Na, te ahua o o ratou mata ko aua mata na ano i kitea e ahau ki te awa, ki Kepara, ko o ratou ahua ko ratou na ano hoki; i tika tonu atu ratou tetahi, tetahi.