- 1
- Na, ko tana meatanga mai ki a au, E te tama a te tangata, e tu o waewae ki runga, a ka korero ahau ki a koe.
- 2
- Na, kua tae mai te wairua ki roto ki a au i tana korerotanga ki a au, i tana meatanga kia tu oku waewae ki runga, i taku rongonga ano i a ia e korero mai ana ki a au.
- 3
- Na, ko tana meatanga mai ki a au, E te tama a te tangata, ka ungā atu koe e ahau ki nga tamariki a Iharaira, ki te iwi whakakeke kua whakakeke nei ki a au; ko ratou ko o ratou mātua kua tutu ki a au, a taea noatia tenei ra nei ano.
- 4
- He tamariki tohe hoki ratou, he ngakau pakeke. Ka ungā atu koe e ahau ki a ratou, a me ki atu e koe ki a ratou, Ko te kupu tenei a te Ariki a Ihowa.
- 5
- Na, ko ratou, ahakoa rongo, ahakoa kore e rongo, (he whare whakakeke hoki ratou,) ka mohio i roto i a ratou te poropiti e noho ana.
- 6
- Na, ko koe, e te tama a te tangata, kaua e wehi i a ratou, kaua e wehi i ā ratou kupu; ahakoa e meatia ana koe e nga tataramoa, e nga tumatakuru, a e noho ana koe i roto i nga kopiona; kaua e wehi i ā ratou kupu; kaua hoki e pairi ina titiro mai ratou; he whare whakakeke hoki ratou.
- 7
- Me korero ano e koe aku kupu ki a ratou, ma ratou e whakarongo, ma ratou ranei e kore e whakarongo: nui atu hoki to ratou whakakeke.
- 8
- Ko koe ia, e te tama a te tangata, whakarongo mai ki taku e mea atu nei ki a koe; Kaua koe e whakakeke, kei rite koe ki taua whare whakakeke: hamama to mangai, kainga hoki te mea ka hoatu nei e ahau ki a koe.
- 9
- Na, taku tirohanga atu, nana, ko tetahi ringaringa e totoro mai ana ki a au me te pupuri ano i tetahi pokai pukapuka.
- 10
- Na, wherahia ana e ia taua pukapuka ki toku aroaro, a he mea tuhituhi a roto, a waho: te mea i tuhituhia ki reira he tangi, he uhunga, he aue.
Address: 
Phone: 
Email: