Ezekiel Chapter 30 - Paipera Tapu 1868 | Te Paipera Tapu 1868

Ezekiel Chapter 30 - Paipera Tapu 1868

1
I puta mai ano te kupu a Ihowa ki a au, i mea,
2
E te tama a te tangata, poropiti, mea atu, Ko te kupu tenei a te Ariki a Ihowa; E aue koutou, Taukiri e, taua rangi nei!
3
Kua tata mai hoki te ra, te ra o Ihowa kua tata mai, he rangi tuku pu, ko te wa ia o nga iwi.
4
A ka tae mai te hoari ki Ihipa, ka nui ano hoki te mamae o Etiopia, ina hinga nga tupapaku ki Ihipa, ina riro i a ratou ona mano, ina wahia iho ona turanga.
5
Ko Etiopia, ko Putu, ko Ruru, ko te iwi whakauru katoa, ko Kupu, ko nga tangata ano o te whenua o te kawenata, ka hinga ngatahi ratou i te hoari.
6
Ko te kupu tenei a Ihowa; Ka hinga ano nga kai awhina o Ihipa; ka riro iho ano hoki te whakapehapeha o tona kaha; ka hinga ratou i te hoari i reira, i Mikiroro atu ano, a, Hiene atu ano, e ai ta te Ariki ta Ihowa.
7
Ka noho kau noa iho ano hoki ratou i waenganui o nga whenua tuhea, ka tu ano hoki ona pa i waenganui i nga pa kua ururuatia.
8
A ka mohio ratou ko Ihowa ahau, ina tukua atu e ahau he ahi ki Ihipa, ina whati ona kai awhina katoa.
9
I taua rangi ka haere atu nga karere i toku aroaro i runga i nga kaipuke, ki te whakawehi i nga Etiopiana kahore nei e ohooho, ka nui ano hoki to ratou mamae, ka rite ki to te ra o Ihipa: nana, te haere mai nei!
10
Ko te kupu tenei a te Ariki a Ihowa; Ka meinga ano e ahau te ringaringa o Nepukararetara kingi o Papurona, hei whakamutu i nga mano tini o Ihipa.
11
Ka kawea mai ia, ratou ano ko tona iwi, ko te hunga nanakia o nga iwi, ki te huna i te whenua: ka maunu ano a ratou hoari ki Ihipa, a ka kapi te whenua i nga tupapaku.
12
Ka meinga ano nga awa e ahau kia maroke, ka hokona atu ano te whenua ki te ringaringa o te hunga kino: ka whakaururuatia ano e ahau te whenua, me ona tini mea, mea rawa ki te ringaringa o nga tautangata: naku na Ihowa te kupu.
13
Ko te kupu tenei a te Ariki a Ihowa; Ka whakangaromia ano hoki e ahau nga whakapakoko, ka whakamutua ano hoki nga whakaahua o Nopo; kore ake he rangatira mo te whenua o Ihipa; ka tukua atu ano hoki e ahau he wehi ki runga ki te whenua o Ihipa.
14
Ka whakaururuatia ano e ahau a Patoro, ka tukua atu ano hoki he ahi ki Toana, ka mahia ano e ahau he whakarite whakawa ki No.
15
Ka ringitia atu ano e ahau taku weriweri ki runga ki Hini, ki to Ihipa kaha; ka hatepea atu ano e ahau nga mano tini o No.
16
Ka tukua atu ano e ahau he ahi ki runga ki Ihipa; ka nui noa atu te mamae o Hini, ka haehaea putia a No, ka raruraru a Nopo i ia rangi, i ia rangi.
17
Nga taitamariki o Awene, o Pi-pehete, ka hinga ratou i te hoari: ka riro ano enei pa i te whakaraunga.
18
Ka whakapouritia ano te ra ki Tehapanehe, ina pakaru i a au nga ioka o Ihipa ki reira: a ka mutu i roto i a ia te whakapehapeha o tona kaha: ko ia ano ka taupokina e te kapua, ka riro ano hoki ana tamahine i te whakaraunga.
19
A ka mahia e ahau nga whakaritenga whakawa ki Ihipa, e mohio ai ratou ko Ihowa ahau.
20
Na, i te tekau ma tahi o nga tau, i te marama tuatahi, i te whitu o nga ra o te marama, ka puta mai te kupu a Ihowa ki a au; i mea ia,
21
E te tama a te tangata kua whati i a au te ringaringa o Parao kingi o Ihipa; nana, e kore e takaia hei meatanga iho mo te rongoa, e kore e meatia iho te takai hei takai, kia kaha ai ki te pupuri hoari.
22
Na, ko te kupu tenei a te Ariki a Ihowa; Nana, hei hoa riri ahau mo Parao kingi o Ihipa, ka whati ano i a au ona ringa, te mea kaha, te mea ano i whati; ka meinga ano e ahau te hoari kia marere i roto i tona ringa.
23
Ka whakamararatia ano e ahau nga Ihipiana ki roto ki nga tauiwi, ka titaritaria atu ano hoki ki nga whenua.
24
Ka whakakahangia ano e ahau nga ringaringa o te kingi o Papurona, ka hoatu ano hoki e ahau taku hoari ki tona ringa: ka whati ia i a au nga ringaringa o Parao, a no te tangata i werohia nga aue e aue ai ia ki tona aroaro.
25
Ka whakakahangia ia e ahau nga ringaringa o te kingi o Papurona; nga ringaringa ia o Parao ka tukua iho; a ka mohio ratou ko Ihowa ahau, ina hoatu e ahau taku hoari ki te ringaringa o te kingi o Papurona, a ka whakatorona atu e ia ki runga ki te whenua o Ihipa.
26
Ka whakamararatia atu ano hoki e ahau nga Ihipiana ki roto ki nga iwi, ka titaritaria ano ratou ki nga whenua; a ka mohio ratou ko Ihowa ahau.