- 1
- Na, i te tekau ma rua o nga tau, i te tekau ma rua o nga marama, i te tuatahi o nga ra o te marama, ka puta mai te kupu a Ihowa ki a au; i mea ia,
- 2
- E te tama a te tangata, kia ara to tangi mo Parao kingi o Ihipa, mea atu hoki ki a ia, To rite kei te kuao raiona o nga iwi, e rite ana hoki koe ki te tarakona i nga moana: i puta mai ano koe i roto i o awa, whakaoraorangia ana hoki e koe nga wai ki o waewae, whakaparua ana e koe o ratou awa.
- 3
- Ko te kupu tenei a te Ariki a Ihowa; Ka horahia atu ano e ahau taku kupenga ki runga ki a koe, he huihuinga ano hoki no nga iwi maha; a ka riro ake koe i taku kupenga.
- 4
- Ka waiho ano hoki koe e ahau ki runga ki te whenua, ka akiritia atu ano koe ki te mata o te parae, maku ano hoki e mea kia nohoia koe e nga manu katoa o te rangi, kia makona ano hoki nga kirehe o te whenua katoa i a koe.
- 5
- Ka takoto ano i a au ou kikokiko ki runga ki nga maunga, ka whakakīa ano hoki nga awaawa ki a koe e tiketike na.
- 6
- Ka whakamakukuria ano e ahau ki ou toto te whenua e kau na koe, a tutuki noa ki nga maunga; ka ki ano hoki nga awa i a koe.
- 7
- A ka oti koe te tinei e ahau, ka hipokina e ahau te rangi, ka whakapouritia ano hoki nga whetu o reira; ka hipokina e ahau te ra ki te kapua, e kore ano e titi te atarau.
- 8
- Na, nga whakamārama katoa e mārama mai nei te rangi, ka whakapouritia ratou e ahau ki runga ki a koe, ka hoatu ano e ahau he pouritanga ki runga ki to whenua, e ai ta te Ariki ta Ihowa.
- 9
- He maha ano nga iwi e mamae o ratou ngakau i a au, ina meinga e ahau kia tae atu to wawahanga ki nga iwi, ki nga whenua kihai i mohiotia e koe.
- 10
- Ina, he maha nga iwi e meinga e ahau kia ketekete ki a koe, ka nui ano te wehi o o ratou kingi, ina whakaaro ki a koe, ua ka wherikoriko taku hoari ki to ratou aroaro; hono tonu ano hoki to ratou wiri ia tangata, ia tangata, i te wehi i a ia i te ra e hinga ai koe.
- 11
- No te mea ko te kupu tenei a te Ariki a Ihowa; Tera e tae mai te hoari a te kingi o Papurona ki a koe.
- 12
- Ka meinga e ahau o mano tini, te hunga nanakia o nga iwi, ratou katoa, kia hinga i nga hoari a nga marohirohi: a ka pahuatia e ratou nga mea whakaī a Ihipa, ka ngaro ano hoki o reira mano tini katoa.
- 13
- Ka whakangaromia ano e ahau o reira kararehe i te taha o nga wai nunui katoa; kahore ano hoki he waewae tangata hei whakaoraora i aua wai a muri ake nei, kahore ano he waewae kararehe hei whakaoraora.
- 14
- Ko reira ahau mea ai i o ratou wai kia hohonu, ka meinga ano e ahau o ratou awa kia rite ki te hinu te rere, e ai ta te Ariki ta Ihowa.
- 15
- Kia meinga e ahau te whenua o Ihipa hei ururua, a kore iho nga tini mea o te whenua, kia patua ano e ahau te hunga katoa e noho ana i reira, katahi ratou ka mohio ko Ihowa ahau.
- 16
- Ko te tangihanga tenei e tangihia ai ia e ratou, ka tangihia ia e nga tamahine a nga iwi: ka tangihia ia e ratou, ara, a Ihipa ratou ko ana mano tini, e ai ta te Ariki ta Ihowa.
- 17
- Na, i te tekau ma rua o nga tau, i te tekau ma rima o nga ra o te marama, ka puta mai te kupu a Ihowa, ki a au; i mea ia,
- 18
- E te tama a te tangata, e aue ki te mano tini o Ihipa, makā iho ano hoki ratou, a ia, me nga tamahine ano a nga iwi nunui, ki nga wahi o raro rawa o te whenua, ratou tahi ano ko te hunga e heke atu ana ki te rua.
- 19
- He ataahua rawa koe i a wai? heke iho, takoto tahi koutou ko te hunga kokoti-kore.
- 20
- Ka hinga ngatahi ratou ko te hunga i patua ki te hoari: kua tukua atu ia ki te hoari: toia atu me ona mano tini katoa.
- 21
- Ka korero mai nga tangata kaha o nga marohirohi ki a ia i roto i te reinga, ratou tahi ano ko ona kai awhina: kua heke ratou ki raro, kei te takoto ratou he hunga kokoti-kore, he mea patu ki te hoari.
- 22
- Kei reira ano a Ahuru ratou ko tona whakaminenga katoa: ona urupa, kei tetahi taha ona, kei tetahi taha; he mea patu katoa, kua hinga i te hoari.
- 23
- Ona urupa ano hoki, he mea mahi ki nga taha o te rua; tona whakaminenga ano hoki kei tetahi taha o tona urupa, kei tetahi taha; he mea patu katoa ratou, kua hinga i te hoari, te hunga i puta ai te wehi ki te whenua o te hunga ora.
- 24
- Kei reira a Erama, ratou ko ana mano tini i tetahi taha o tona urupa, tetahi taha, ratou katoa he mea patu, kua hinga i te hoari, he hunga kua heke kokoti-kore atu ki nga wahi o raro rawa o te whenua, he hunga i mea i to ratou wehi kia puta ki te whenua o te hunga ora; heoi kei te waha ratou i to ratou whakama, ratou tahi ano ko te hunga e heke atu ana ki te rua.
- 25
- Kua hangā te takotoranga mona ki roto ki te hunga i patua, mo ratou ano ko ana mano tini katoa: ona urupa kei tetahi taha ona, kei tetahi taha; he kokoti-kore ratou katoa, he mea patu ki te hoari: ahakoa i puta to ratou wehi ki te whenua o te hunga ora, heoi kua wahā nei ano e ratou to ratou whakama i roto i te hunga e heke atu ana ki te rua: kua tukua atu ia ki roto ki te hunga i patua.
- 26
- Kei reira a Meheke, a Tupara, ratou ko ana mano tini katoa; ona urupa kei tetahi taha ona, kei tetahi taha, he mea kokoti-kore ratou katoa, he mea patu ki te hoari; i puta ano hoki to ratou wehi i mua ki te whenua o te hunga ora.
- 27
- E kore ano ratou e takoto i roto i nga marohirohi o nga kokoti-kore kua hinga, kua heke ki te reinga me a ratou patu ano o te whawhai: i whakatakotoria ano e ratou a ratou hoari ki raro i o ratou māhunga; otiia ka mau o ratou kino ki o ratou wheua; ko te hunga hoki tena i wehi ai nga marohirohi o te whenua o te ora.
- 28
- Ina, ka whati koe i roto i te hunga kokoti-kore, ka takoto tahi hoki koutou ko te hunga i patua ki te hoari.
- 29
- Kei reira a Eroma, ona kingi, ona rangatira katoa i tukua atu nei i runga i to ratou marohirohi ki roto ki te hunga i werohia e te hoari: ka takoto tahi ratou ko nga kokoti-kore, ratou ano ko te hunga e heke atu ana ki te rua.
- 30
- Kei reira nga ariki o te nota, ratou katoa, me nga Haironi katoa ano i heke atu nei i roto i te hunga i patua i runga ano i to ratou wehi; whakama iho ratou ki to ratou marohirohi, a takoto kokoti-kore ana ratou i roto i te hunga i patua ki te hoari, me te waha ano ratou i to ratou whakama i roto i te hunga e heke atu ana ki te rua.
- 31
- E kite a Parao i a ratou, a ka whai whakamarietanga ki ana mano tini katoa, i patua ki te hoari, a Parao, ratou ko tona ope katoa, e ai ta te Ariki ta Ihowa.
- 32
- No te mea kua tukua atu e ahau toku wehi ki te whenua o te hunga ora: a ka whakatakotoria ia ki roto ki te hunga kokoti-kore, ratou tahi ano ko te hunga i patua ki te hoari, a Paroa ratou ko ana mano tini, e ai ta te Ariki ta Ihowa.
Address: 
Phone: 
Email: