- 1
- I puta mai ano te kupu a Ihowa ki a au; i mea,
- 2
- E te tama a te tangata, anga atu to mata ki Maunga Heira, poropititia te he mo reira.
- 3
- Mea atu hoki ki a ia, Ko te kupu tenei a te Ariki a Ihowa; Nana, hei hoa riri ahau mou, e Maunga Heira, ka whakamarokia ano hoki toku ringa ki runga ki a koe, ka meinga ano koe e ahau kia ururuatia rawatia.
- 4
- Ka meinga e ahau o pa kia tuheatia, ka ururuatia ano hoki koe, a ka mohio koe ko Ihowa ahau.
- 5
- Na, he riri mau tonu tau, a meinga ana e koe nga tamariki a Iharaira kia rere a wai i te kaha o te hoari i te wa o to ratou aitua, i te wa i whai mutunga ai to ratou kino.
- 6
- Mo reira, e ora ana ahau, e ai ta te Ariki ta Ihowa; Ka mahia koe e ahau hei mea mo te toto, ka whaia ano hoki koe e te toto; kihai na koe i kino ki te toto, na ka whaia koe e te toto.
- 7
- Na, ka meinga a Maunga Heira e ahau kia ururuatia rawatia, ka hatepea atu ano hoki e ahau te tangata e tika ana na reira, te tangata ano e hoki mai ana.
- 8
- Ka whakakapia ano hoki e ahau ona maunga ki ona tupapaku. O pukepuke, o awaawa, o awa katoa, ka hinga ki reira te hunga i patua ki te hoari.
- 9
- Ka meinga koe e ahau kia ururuatia, a ake ake ake; e kore ano o pa e nohoia, ka mohio koutou ko Ihowa ahau.
- 10
- Na, kua mea na koe, Enei iwi e rua, enei whenua e rua, naku, ka mau tonu hoki i a tatou; i te mea kei reira nei ano a Ihowa:
- 11
- Mo reira, e ora ana ahau, e ai ta te Ariki ta Ihowa, ka rite taku mahi ki to riri, ki to hae, i hae ai koe i a koe i mauahara ra ki a ratou; a ka whakakitea atu ahau ki a ratou, ina whakaritea e ahau te whakawakanga mou.
- 12
- Katahi koe ka mohio ko Ihowa ahau, a kua rangona e ahau o mea whakarihariha katoa i korerotia e koe mo nga maunga o Iharaira, i a koe i ki ra, Kua ururuatia, kua homai hei kai ma tatou.
- 13
- Ko te whakakake tenei o o koutou mangai ki a au, whakamahā ana e koutou a koutou kupu moku: kua rongo atu ahau.
- 14
- Ko te kupu tenei a te Ariki a Ihowa; I te wa e koa ai te whenua katoa, ka meinga koe e ahau kia ururuatia.
- 15
- Ka rite ki to koa ki te kāinga tupu o te whare o Iharaira, i te mea ka ururuatia, ka peratia ano koe e ahau: ka ururuatia koe, e Maunga Heira, e Irumea katoa, ae ra, katoa; a ka mohio ratou ko Ihowa ahau.
Address: 
Phone: 
Email: