- 1
- Na, e te tama a te tangata, poropititia he hē mo Koko, mea atu, Ko te kupu tenei a te Ariki a Ihowa; Nana, hei hoa riri ahau mou e Koko, e te tino rangatira o Meheke, o Tupara:
- 2
- Ka whakatahuritia atu ano koe e ahau, ka whakahaereerea, ka meinga ano koe kia haere mai i nga taha ki te nota, ka kawea ano koe e ahau ki nga maunga o Iharaira.
- 3
- Ka patua atu ano e ahau to kopere i roto i to ringa maui, ka meinga ano hoki o pere kia marere i roto i to ringa matau.
- 4
- Ka hinga koe ki runga ki nga maunga o Iharaira, a koe, me o ropu katoa, me nga iwi ano i a koe: ka hoatu koe e ahau hei kai ma nga manu kai kino o ia ahua, o ia ahua, ma nga kirehe ano hoki o te parae.
- 5
- Ka hinga koe ki runga ki te mata o te parae: naku hoki te kupu, e ai ta te Ariki ta Ihowa.
- 6
- Ka tukua atu ano hoki e ahau he ahi ki a Makoko, ratou ko te hunga e noho humarie ana i nga motu, a ka mohio ratou ko Ihowa ahau.
- 7
- A, ka meinga e ahau toku ingoa tapu kia mohiotia i roto i toku iwi, i a Iharaira, e kore ano e tukua e ahau kia whakapokea toku ingoa tapu a muri ake nei: a ka mohio nga tauiwi ko Ihowa ahau, ko te Mea Tapu i roto i a Iharaira.
- 8
- Nana, kua tae mai, kua oti ano hoki, e ai ta te Ariki ta Ihowa; ko te rangi tenei i korerotia e ahau.
- 9
- Ka puta atu ano hoki te hunga e noho ana i nga pa o Iharaira, a ka tahuna e ratou, ka wera ano i a ratou nga patu, nga whakangungu rakau, nga puapua, nga kopere, nga pere, nga hani, nga tao; nga tau e tahuna ai aua mea e ratou, e whitu.
- 10
- E kore ano e maua mai e ratou he wahie i te parae, e kore ano e tapahia mai i nga ngahere; no te mea ka tahuna e ratou nga patu ki te ahi: ka pahuatia ano hoki e ratou o ratou kai pahua, ka murua ano hoki nga taonga o o ratou kai muru, e ai ta te Ariki ta Ihowa.
- 11
- Na, i taua rangi ka hoatu e ahau ki a Koko he wahi tanumanga ki reira i roto i a Iharaira, te raorao o nga tira-haere i te taha ki te rawhiti o te moana; kutia iho i reira nga ihu o nga tira-haere: ka tanumia ano hoki e ratou ki reira a Koko ratou ko ana mano tini: ka karangatia ano a reira, Ko te raorao o Hamono-Koko.
- 12
- A, e whitu nga marama e tanumia ai ratou e te whare o Iharaira, kia watea ai te whenua.
- 13
- Ina, ka tanumia ratou e te iwi katoa o te whenua; a hei ingoa nui ki a ratou te ra e whakakororiatia ai ahau, e ai ta te Ariki ta Ihowa.
- 14
- Ka wehea mai ano hoki e ratou etahi tangata, he mea tūturu, hei haere atu i runga i te whenua, hei hoa mo nga tira-haere ki te tanu i te hunga o ratou i toe i runga i te mata o te whenua, kia watea ai: i te mutunga o nga marama e whitu ka rapua e ratou.
- 15
- Na, nga tira-haere e haere ana i te whenua, ka kite tetahi i te wheua tangata, ka hangā e ia tetahi tohu ki te taha o taua wheua, kia tanumia ra ano e nga kai tanu ki te raorao o Hamono-Koko.
- 16
- Te ingoa ano hoki o te pa Ko Hamona. Na, ka watea te whenua.
- 17
- Na, e koe, e te tama a te tangata, ko te kupu tenei a te Ariki a Ihowa; Mea atu ki nga manu o ia ahua, o ia ahua, ki nga kirehe katoa ano hoki o te parae, Huihui mai koutou, haere mai; whakamine mai i tetahi taha, i tetahi taha, ki taku patunga tapu e patua nei e ahau ma koutou, he patunga nui ki runga ki nga maunga o Iharaira, kia kai kikokiko ai, kia inu toto ai koutou.
- 18
- Ka kai koutou i nga kikokiko o te hunga marohirohi, ka inumia ano nga toto o nga rangatira o te whenua, o nga hipi toa, o nga reme, o nga koati, o nga puru, he mea momona katoa no Pahana.
- 19
- Ka kai kikokiko ano koutou, a makona noa koutou, ka inu toto ano koutou, a haurangi noa, he mea no taku patunga tapu e patua e ahau ma koutou.
- 20
- Na, ka makona koutou i nga hoiho o taku tepu, i nga hoiho hariata, i nga marohirohi, i nga tangata whawhai katoa, e ai ta te Ariki ta Ihowa.
- 21
- Ka whakaputaina ano e ahau toku kororia ki roto ki nga tauiwi, a ka kite nga tauiwi katoa i taku whakaritenga whakawa e whakaritea e ahau, i toku ringa ano ka pa atu nei ki a ratou.
- 22
- Ka mohio ano hoki te whare o Iharaira, ko Ihowa ahau, ko to ratou Atua, i taua rangi ano, a ake ake.
- 23
- Ka mohio ano nga tauiwi, he hē no te whare o Iharaira i whakaraua atu ai ratou: he pokanga ketanga no ta ratou ki a au i hunā ai e ahau toku mata ki a ratou, i tukua atu ai ratou e ahau ki te ringaringa o o ratou hoa riri: a hinga ana ratou katoa i te hoari.
- 24
- Taku i mea ai ki a ratou rite tonu ki to ratou poke, ki ā ratou pokanga ketanga, a hunā ana e ahau toku mata ki a ratou.
- 25
- Na, ko te kupu tenei a te Ariki a Ihowa; Ka whakatahuritia e ahau aianei te whakaraunga o Hakopa, ka aroha atu ano ahau ki te whare katoa o Iharaira, ka hae ano hoki ahau, he whakaaro ki toku ingoa tapu;
- 26
- Kia wahā ano ia e ratou to ratou whakama, me o ratou pokanga ketanga katoa i poka ke ai ta ratou ki a au, i a ratou e noho humarie ana i to ratou oneone, tē ai he tangata hei whakawehi.
- 27
- Ka oti ratou te whakahoki mai e ahau i roto i nga iwi, a ka kohikohia mai ratou i nga whenua o o ratou hoa riri, ka whakatapua ano hoki ahau i runga i a ratou i te tirohanga mai a nga iwi maha;
- 28
- Katahi ratou ka mohio ko Ihowa ahau, ko to ratou Atua, i mea nei kia whakaraua atu ratou ki roto ki nga tauiwi, i kohikohi ano hoki i a ratou ki to ratou oneone, a kahore noa iho tetahi o ratou i mahue i a au ki reira.
- 29
- E kore ano e hunā e ahau toku mata a muri ake nei ki a ratou: kua ringitia hoki e ahau toku wairua ki runga ki te whare o Iharaira, e ai ta te Ariki ta Ihowa.
Address: 
Phone: 
Email: