- 1
- I nga wa ano hoki e wehea ai e koutou te whenua hei wahi tupu, me whakahere ano e koutou he whakahere ma Ihowa, me whakatapu tetahi wahi o te whenua: tona roa ko te roa o nga kakaho e rua tekau ma rima mano; te whanui kotahi tekau nga mano. Ka tapu tenei, ona taha katoa, a tawhio noa.
- 2
- Waiho tetahi wahi o tenei kia rima rau te roa mo te wahi tapu, kia rima rau te whanui, he taha-wha, a tawhio noa, kia rima tekau ano hoki nga whatianga mo waho ake, a tawhio noa.
- 3
- Me whangangā ano e koe tetahi wahi o tenei ka oti nei te whanganga, kia rua tekau ma rima mano te roa, kia tekau nga mano te whanui: a hei reira te wahi tapu, me te wahi tapu rawa ano.
- 4
- Te wahi whenua ka oti nei te whakatapu, ma nga tohunga tera, ma nga minita o te wahi tapu e whakatata mai ana ki te minita ki a Ihowa: hei wahi ano tera mo o ratou whare, hei wahi tapu ano mo te wahi tapu.
- 5
- Na, tera, e rua tekau ma rima mano nei te roa, tekau nga mano te whanui, mo nga Riwaiti ano hoki, mo nga minita o te whare, hei wahi mo ratou, mo nga ruma e rua tekau.
- 6
- Me whakarite ano e koutou te wahi mo te pa, e rima mano te whanui, e rua tekau ma rima mano te roa, ki te taha o te wahi tapu ka whakaherea nei: mo te whare katoa o Iharaira tera.
- 7
- Mo te rangatira ano tetahi wahi i tetahi taha, i tetahi taha o te wahi ka oti nei te whakatapu, a ka whakaherea nei; o te wahi ano hoki i te pa, i te ritenga ake o te wahi tapu ka whakaherea nei, i te ritenga ake ano o te wahi i te pa, i te taha ki te hauauru whaka-te-hauauru, i te taha ano ki te rawhiti whaka-te-rawhiti: kia rite ano te roa ki to tetahi o aua wahi, me timata i te rohe ki te hauauru a tae noa ki te rohe ki te rawhiti.
- 8
- Kei te whenua te wahi mona i roto i a Iharaira: e kore ano oku rangatira e whakatupu kino i toku iwi a muri ake nei; me hoatu ano e ratou te toenga o te whenua ki te whare o Iharaira, ki tenei hapu, ki tenei hapu.
- 9
- Ko te kupu tenei a te Ariki a Ihowa, Kati ta koutou, e nga rangatira o Iharaira; whakarerea atu te tukino, te pahua, mahia te whakarite whakawa, me te tika, whakamutua a koutou peinga i toku iwi, e ai ta te Ariki ta Ihowa.
- 10
- Kia tika a koutou pauna, kia tika te epa, kia tika te pati.
- 11
- Kia kotahi te mehua mo te epa, mo te pati, to te pati kia rite ki te whakatekau o nga wahi o te homa, ko te epa ano te whakatekau o nga wahi o te homa: te mehua mo taua mea ko te homa.
- 12
- Kia rua tekau ano hoki nga kera o te hekere: o ta koutou mane kia rua tekau nga hekere, kia rua tekau ma rima nga hekere kia kotahi tekau ma rima nga hekere.
- 13
- Ko te whakahere tenei e whakaherea e koutou; he witi ko te whakaono o nga wahi o to te homa epa; me homai ano he parei e koutou, te whakaono o nga wahi o to te homa epa.
- 14
- Na, te tikanga mo te hinu, mo te pati hinu, me whakahere e koutou te whakatekau o nga wahi o te pati i roto i te mehua, he homa nei tana, ara, tekau nga pati; kotahi tekau hoki nga pati o te homa:
- 15
- Kia kotahi ano reme i roto i te kahui, i roto i nga rau e rua, he mea no nga haereerenga makūkū o Iharaira, hei whakahere toto-kore, hei tahunga tinana, hei whakamarietanga, hei mea whakamarietanga mo ratou, e ai ta te Ariki ta Ihowa.
- 16
- Me hoatu tenei whakahere e te iwi katoa o te whenua ki te rangatira i roto i a Iharaira.
- 17
- Na, ko tenei ta te rangatira, he homai i nga tahunga tinana, i nga whakahere toto-kore, i nga ringihanga, mo nga hakari, mo nga kowhititanga marama, mo nga hapati, mo nga huihuinga nui katoa o te whare o Iharaira: kia rite mai ano i a ia te whakahere hara, te whakahere toto-kore, te tahunga tinana, nga whakamarietanga, hei mea whakamarietanga mo te whare o Iharaira.
- 18
- Ko te kupu tenei a te Ariki a Ihowa; I te marama tuatahi, i te tuatahi ano o nga ra o te marama, me tiki atu e koe he puru kuao, ki te mea koha-kore, ka pure i te wahi tapu.
- 19
- Me tango ano e te tohunga tetahi wahi o te toto o te whakahere hara, ka pani atu ki nga pou o te whare, ki nga koki ano e wha o te papa i te aata, ki nga pou ano o te kuwaha o to roto marae.
- 20
- Ko tau ano tena e mea ai i te whitu o nga ra o te marama hei mea mo te tangata i te he, mo te kuare: a ka oti te whare te whakamarie e koutou.
- 21
- I te marama tuatahi i te tekau ma wha o nga ra o te marama, me whakarite e koutou te kapenga, he hakari, e whitu nga ra; te taro hei kai, he mea rewena-kore.
- 22
- Kia rite mai ano hoki i te rangatira i taua ra he puru hei whakahere hara mona, mo te iwi katoa o te whenua.
- 23
- Kia rite mai ano i a ia i nga rangi e whitu o te hakari he tahunga tinana ma Ihowa, e whitu nga puru, e whitu nga hipi toa, he mea koha-kore i tenei ra, i tenei ra, i nga rangi e whitu, me tetahi kuao koati i tenei ra, i tenei ra, hei whakahere hara.
- 24
- Kia rite mai ano i a ia he whakahere toto-kore, kotahi te puru kia kotahi ano te epa, kotahi te hipi toa kia kotahi ano epa, kotahi te epa kia kotahi hini hinu.
- 25
- I te whitu o nga marama i te tekau ma rima o nga ra o te marama i te hakari, ka mahia mai e ia enei mea, kia whitu nga ra,—te whakahere hara, te tahunga tinana, te whakahere toto-kore, te hinu.
Address: 
Phone: 
Email: