- 1
- Katahi ahau ka whakahokia e ia ki te tatau o te whare; na, he wai e pupu mai ana i raro i te paepae o te whare ki te taha ki te rawhiti: e anga ana hoki te aronga o te whare ki te rawhiti, a i heke mai nga wai i raro i te taha ki matau o te whare, i te taha ki te tonga o te aata.
- 2
- Katahi ahau ka arahina atu e ia i te ara o te kuwaha ki te nota, a arahina taiawhiotia ana ahau e ia na te ara o waho ki to waho kuwaha, na te ara e anga ana ki te rawhiti; na, ko nga wai e rere ana i te taha ki matau.
- 3
- Na, te haerenga atu o te tangata i tona ringa nei te aho, ki te taha ki te rawhiti, kotahi mano nga whatianga i whangangā e ia, katahi ahau ka meinga e ia kia tika na roto i nga wai; to nga whatianga raparapa te wai.
- 4
- I whangangā ano he mano e ia, a meinga ana ahau e ia kia tika na roto i nga wai; to nga turi te wai. I whangangā ano e ia he mano, a meinga ana ahau e ia kia tika i waenga; to nga hope te wai.
- 5
- I whangangā ano e ia he mano; na, he awa kihai i taea te whiti; kua neke ake hoki nga wai, he wai e kauria, he awa e kore e whitingia.
- 6
- Na, ko tana meatanga mai ki a au; Ka kite ranei koe, e te tama a te tangata? Katahi ahau ka arahina e ia, ka whakahokia ki te parengarenga o te awa.
- 7
- Hoki rawa atu ahau, na, i te parengarenga o te awa tona tini o te rakau i tetahi taha, i tetahi taha.
- 8
- Na, ko tana meatanga mai ki a au, E puta atu ana enei wai ki te wahi ki te rawhiti, ka rere ano ki raro ki te koraha, tae tonu atu ki te moana: te putanga atu ki te moana, ka ai hei rongoa mo nga wai.
- 9
- Na, nga mea ora katoa e korikori ana, nga mea e tae atu ai nga awa, ka ora; ka maha noa atu ano hoki nga ika, no te mea ka tae atu enei wai ki reira: ka waimaoritia hoki; a ka ora nga mea katoa e tae atu ai te awa.
- 10
- Na, ka tu nga kai hao ki tona taha, ki Ene-keri, a tae noa ki Ene-ekeraima, hei wahi raua e horahia ai nga kupenga; nga ika o aua wahi ka rite ki o ratou ahua, ka rite ki nga ika o te moana nui, he tini noa iho.
- 11
- Na, e kore e whakawaimaoritia nga wahi oru o reira, me nga repo o reira; ka tukua atu ki te tote.
- 12
- Na, ka tupu ki te taha o te awa ki tona parengarenga ki tetahi taha, ki tetahi taha, nga rakau kai katoa; e kore o ratou rau e memenge, e kore ano nga hua e pau; ona hua hou tonu i o ratou marama ano, no te mea i puta mai o ratou wai i te wahi tapu; na, hei kai ona hua, hei rongoa tona rau.
- 13
- Ko te kupu tenei a te Ariki a Ihowa; Ko te rohe tenei o te whenua ka riro nei i a koutou, he mea whakarite ki nga hapu kotahi tekau ma rua o Iharaira: kia rua nga wahi ma Hohepa.
- 14
- Ka riro hoki a reira i a koutou, ta tetahi, ta tetahi, rite tonu: he wahi hoki ia i ara ai toku ringa kia hoatu a reira ki o koutou mātua: ina, ka taka mai ano tenei whenua ki a koutou hei kāinga tupu.
- 15
- Ko te rohe ano tenei o te whenua i te taha ki te nota; ina anga mai i te moana nui i te ara ki Heterono, i te mea ka haere te tangata ki Terara;
- 16
- Ko Hamata, ko Perota, ko Hipiraima i te takiwa o te rohe ki Ramahiku, o te rohe ki Hamata, ko Hatarahatikono i te taha o te rohe ki Haurana.
- 17
- Na, te rohe, i te mea ka anga mai i te moana, ko Hatara-enana, ko te rohe ki Ramahiku, me te taha ano ki te nota whaka-te-nota, me te rohe ano ki Hamata. Ko te taha ki te nota hoki tenei.
- 18
- Me whangangā ano e koutou te taha ki te rawhiti, tera i Haurana, i Ramahiku, i Kireara, i te whenua ano o Iharaira i te taha o Horano, i te rohe ano tae noa ki te moana ki te rawhiti, Na, ko te taha ki te rawhiti tenei.
- 19
- Na, to taha ki te tonga whaka-te-tonga ka takoto atu i Tamara tae noa ki nga wai o te totohe i Karehe, ki te awa ki te moana nui. Na, ko te taha tenei ki te tonga whaka-te-tonga.
- 20
- Na, te rohe ki te hauauru ko te moana nui, ka takoto atu i te rohe, a tae noa ki te ritenga atu o Hamata. Ko te taha tenei ki te hauauru.
- 21
- Na, ka wehea e koutou tenei whenua mo koutou he mea whakarite ki nga hapu o Iharaira.
- 22
- Ina, me wehe e koutou tenei whenua, hei kāinga tupu mo koutou, mo nga tautangata e noho ana i roto i a koutou, a ka whanau a ratou tamariki i roto i a koutou. Na, ki ta koutou kia rite ratou ki te tangata whenua i roto i nga tamariki a Iharaira; kia taka mai he wahi mo ratou i roto i a koutou i roto i nga hapu o Iharaira.
- 23
- Na, te hapu e noho ai te tautangata, me hoatu e koutou he wahi mona ki reira, e ai ta te Ariki ta Ihowa.
Address: 
Phone: 
Email: