Ezekiel Chapter 8 - Paipera Tapu 1868 | Te Paipera Tapu 1868

Ezekiel Chapter 8 - Paipera Tapu 1868

1
Na, i te ono o nga tau, i te ono o nga marama, i te rima o nga ra o te marama, e noho ana ahau i roto i toku whare, me te noho ano nga kaumatua o Hura i toku aroaro. Na, ko te taunga iho i reira o te ringa o te Ariki o Ihowa ki runga ki a au.
2
A, taku tirohanga atu, na, ko tetahi ahua me he mea he ahi ki te titiro atu; i tona hope a haere whakararo, he ahi ki te titiro atu; i tona hope ano, a haere whakarunga, he wherikotanga ki te titiro atu, he mea e rite ana te kara ki to te amipere.
3
Na, kua totoro mai te ahua o te ringaringa, a hopukia ana ahau e ia i tetahi o nga makawe o toku mātenga: katahi ahau ka hapainga atu e te wairua ki waenganui o te whenua, o te rangi, a kawea ana ahau e ia ki Hiruharama, he whakakitenga hoki na te Atua, ki te kuwaha o to roto keti e anga ana ki te nota; kei reira nei te nohoanga o te whakapakoko o te hae, e puta ai te hae.
4
Na, i reira ano te kororia o te Atua o Iharaira, he pera ano me te kitenga i kitea nei e ahau i te mānia.
5
Na, ko tana meatanga mai ki a au, E te tama a te tangata, tena ra, anga atu o kanohi whaka-te-ara ki te nota. Katahi ka anga atu oku kanohi whaka-te-ara ki te nota, nana, i te taha ki te nota, i te kuwaha o te aata, ko tenei whakapakoko o te hae i te tomokanga atu.
6
I mea mai ano ia ki a au, E te tama a te tangata, ka kite ranei koe i ta ratou e mea nei? i nga mea whakarihariha nui e mahia nei e te whare o Iharaira ki konei, e matara atu ai ahau i toku wahi tapu? otiia tahuri atu ano koe kia kite ai koe i etahi mea whakarihariha e nui atu ana.
7
Katahi ahau ka kawea e ia ki te kuwaha o te marae. Na, taku tirohanga atu, nana, ko tetahi puta i te taiepa.
8
Na, ko tana meatanga mai ki a au, E te tama a te tangata, tena, keria te taiepa: a taku keringa i te taiepa, na, ko tetahi kuwaha.
9
Katahi tera ka mea mai ki a au, Haere ki roto, kia kite ai koe i nga mea whakarihariha, i nga mea kino e mahia nei e ratou ki konei.
10
Na, haere ana ahau ki roto, a taku tirohanga atu, na, ko nga ahua katoa o nga mea ngokingoki, o nga kararehe whakarihariha ano hoki, me nga whakapakoko katoa o te whare o Iharaira, tuhituhi rawa ki te taha o te whare, a taka noa, taka noa.
11
A e whitu tekau nga tangata, no nga kaumatua o te whare o Iharaira, me Taatania ano tama a Hapana e tu ana i waenganui i a ratou, tu ana tera ratou i mua i aua mea, me tana tahu whakakakara ano hoki i te ringa o tenei, o tenei, a me te mea he kapua matotoru te whakakakara e kake ana ki runga.
12
Na, ko tana meatanga mai ki a au, Ka kite ranei koe, e te tama a te tangata, i ta nga kaumatua o te whare o Iharaira e mea na i te pouri, ia tangata, ia tangata, i ona whare whakaahua? e ki ana hoki ratou, E kore a Ihowa e kite i a tatou; kua mahue te whenua i a Ihowa.
13
I mea mai ano ia ki a au, Tena ano, tahuri atu, kia kite ai koe i nga mea whakarihariha nui e mahia nei e ratou.
14
Katahi ahau ka kawea e ia ki te kuwaha o te keti o te whare o Ihowa, e anga ana whaka-te-nota, na, ko etahi wahine e noho ana i reira, e tangi ana ki a Tamutu.
15
Na, ko tana meatanga mai ki a au, Ka kite ranei koe, e te tama a te tangata? Tena ano, tahuri atu, kia kite ai koe i etahi mea whakarihariha e nui atu ana i enei.
16
Na, ka kawea ahau e ia ki to roto marae o te whare o Ihowa; na, i te kuwaha o te temepara o Ihowa, i te takiwa o te whakamahau o te aata, ko etahi tangata, ki te whakaaro iho e rua tekau ma rima, ko o ratou tuara e anga ana ki te temepara o Ihowa, ko o ratou mata ki te rawhiti, a e koropiko atu ana ki te ra ki te taha ki te rawhiti.
17
Na, ko tana meatanga mai ki a au, Ka kite ranei koe, e te tama a te tangata? He mea māmā noa ake ianei tenei ki te whare o Hura kia mahia e ratou nga mea whakarihariha e mahia nei e ratou ki konei? na ratou hoki i kapi ai te whenua i te mahi nanakia, hoki mai ana ratou ki te whakapataritari i a au: nana, kei te whakapa ano ratou i te manga ki o ratou ihu.
18
Na, ka mahi ano hoki ahau i runga i te weriweri; e kore toku kanohi e manawapa, e kore ano ahau e tohu, ahakoa nui to ratou reo e karanga ai ratou ki oku taringa, e kore ahau e whakarongo ki a ratou.