- 1
- Na, ka turia atu e Aperahama i reira ki tetahi whenua i te tonga, a ka noho ki te takiwa o Karehe, o Huru, a i noho haere ano ia ki Kerara.
- 2
- Na, ka kiia a Hara tana wahine e Aperahama, Ko taku tuahine ia: a ka tono mai a Apimereke kingi o Kerara, a tangohia ana a Hara.
- 3
- Na, ka haere moemoea mai te Atua ki a Apimereke i te po, a ka mea ki a ia, Nana, ka mate koe mo te wahine i tangohia nei e koe; he wahine tangata hoki ia.
- 4
- Kahore ano ia a Apimereke kia tata noa ki a ia: a ka mea atu ia, E te Ariki, ka whakamate ano hoki ranei koe i te iwi tika?
- 5
- Kahore ranei ia i mea mai ki a au, Ko taku tuahine ia? me te wahine hoki, i mea mai ano ia, Ko taku tungane ia: he tapatahi toku ngakau, he harakore hoki oku ringa i mea ai ahau i tenei mea.
- 6
- A ka mea moemoea mai ano te Atua ki a ia, I mohio ano ahau he tapatahi tou ngakau i a koe i mea i tenei mea; a i pupuri ahau i a koe kei hara koe ki a au: na reira koe tē tukua ai e ahau kia pa atu ki a ia.
- 7
- Na, whakahokia ra akuanei te wahine a tena tangata; no te mea hoki he poropiti ia, a mana e inoi mou, a ka ora koe: tena ko tenei ka kore e whakahokia e koe, kia mohio koe, ka tino mate koe, koutou ko nga mea katoa i a koe.
- 8
- Na, ka maranga wawe a Apimereke i te ata, a ka karangatia ana tangata katoa, a korerotia atu ana enei mea katoa ki o ratou taringa: a nui atu te wehi o aua tangata.
- 9
- Na, ka karanga atu a Apimereke ki a Aperahama, ka mea ki a ia, He mahi aha tenei au ki a matou? he aha hoki taku hara ki a koe, i takina mai ai e koe he hara nui ki a au, ki taku kingitanga ano hoki? ehara i te mea tika nga mea kua meinga nei e koe ki a au.
- 10
- A i mea atu ano a Apimereke ki a Aperahama, i kite koe i te aha, i meatia ai tenei mea e koe?
- 11
- Na, ka mea mai a Aperahama, I mea hoki ahau, he pono, kahore te wehi o te Atua i tenei wahi; a ka patua ahau e ratou mo taku wahine.
- 12
- A he pono ano hoki ko taku tuahine ia; ko te tamahine hoki a toku papa, otiia ehara i te tamahine na toku whaea; a meinga ana ia hei wahine maku.
- 13
- A i ta te Atua meatanga i a au kia kopikopiko mai i te whare o toku papa, na, ka mea atu ahau ki a ia, Ko tou aroha tenei e whakaputaina mai e koe ki a au; korerotia ahau i nga wahi katoa e tae ai taua, Ko taku tungane ia.
- 14
- Na, ka tango a Apimereke i etahi hipi, me etahi kau, me etahi pononga tane, me etahi pononga wahine, a hoatu ana e ia ki a Aperahama, a i whakahokia mai ano e ia a Hara tana wahine ki a ia.
- 15
- A ka mea mai ano a Apimereke, Nana, kei tou aroaro toku whenua: nohoia e koe te wahi e pai ana ki tau titiro.
- 16
- A i mea mai ano ia ki a Hara, Nana, kotahi mano hiriwa ka hoatu nei e ahau ki tou tungane: nana, hei uhi ia mo ou kanohi ki nga tangata katoa i a koe, ki nga tangata ke katoa hoki: na, ka riria tona he.
- 17
- Katahi ka inoi a Aperahama ki te Atua: a ka mea te Atua kia ora a Apimereke, ratou ko tana wahine, ko ana pononga wahine; a ka whanau tamariki ratou.
- 18
- Kua tutakina hoki e Ihowa nga kopu katoa o te whare o Apimereke, mo Hara hoki mo te wahine a Aperahama.
Address: 
Phone: 
Email: