Genesis Chapter 25 - Paipera Tapu 1868 | Te Paipera Tapu 1868

Genesis Chapter 25 - Paipera Tapu 1868

1
Na, ka tangohia ano e Aperahama tetahi wahine, tona ingoa ko Ketura.
2
A whanau ake a raua tamariki ko Timirana, ko Iokohana, ko Merana, ko Miriana, ko Ihipaka, ratou ko Huaha.
3
A whanau ake a Iokohana ko Hepa, ko Rerana. A ko nga tamariki a Rerana, ko Ahurimi, ko Retuhimi, ko Reumime.
4
A ko nga tamariki a Miriana; ko Epa ko Epere, ko Hanoka, ko Apira, ko Ereraaha. He tamariki katoa enei na Ketura.
5
A i hoatu e Aperahama ana mea katoa ki a Ihaka.
6
Ko nga tamariki ia a nga wahine iti a Aperahama, i hoatu e Aperahama etahi taonga ki a ratou, a tonoa atu ana e ia i a ia ano e ora ana, whaka-te-rawhiti, ki te whenua i te rawhiti, i te taha o Ihaka o tana tamaiti.
7
A ko nga ra enei o nga tau o te oranga o Aperahama i ora ai ia, kotahi rau e whitu tekau ma rima nga tau.
8
Na, ka hemo a Aperahama, a ka mate, he pai hoki tona koroheketanga, he koroheke, kua ata tutuki ano hoki ona ra; a kohia atu ana ia ki tona iwi.
9
A ka tanumia ia e ana tamariki e Ihaka raua ko Ihimaera ki roto ki te ana o Makapera, ki te wahi o Eperona tama a Tohara Hiti, i te ritenga mai o Mamere;
10
Ki te wahi i hokona e Aperahama i nga tamariki a Hete: i tanumia ki reira a Aperahama, raua ko Hara ko tana wahine.
11
A, muri iho i te matenga o Aperahama, na ka manaakitia e te Atua a Ihaka tana tamaiti; a ka noho a Ihaka ki te taha o te puna o Rahai-roi.
12
Na, ko nga whakatupuranga enei o Ihimaera, o te tama a Aperahama, i whanau nei ma Aperahama i a Hakara, i te wahine o Ihipa, i te pononga wahine a Hara.
13
A ko nga ingoa enei o nga tamariki a Ihimaera, to tenei ingoa to tenei ingoa, ki te tikanga iho o o ratau whakatupuranga: ko ta Ihimaera matamua ko Nepaiota; muri iho ko Kerara, ko Arapeere, ko Mipihama,
14
Ko Mihima, ko Ruma, ko Maha,
15
Ko Hatara, ko Tema, ko Ieturu, ko Napihi, ko Kerema:
16
Ko nga tamariki enei a Ihimaera, ko o ratou ingoa enei i o ratou pa, i o ratou whare rangatira; kotahi tekau ma rua nga rangatira o o ratou iwi.
17
A ko nga tau enei o te oranga o Ihimaera, kotahi rau e toru tekau ma whitu nga tau: na ka hemo ia, a ka mate; a ka kohia atu ki tona iwi.
18
A i Hawira o ratou nohoanga, a tae noa ki Huru, i te ritenga mai o Ihipa, ina haere koe ki Ahiria: i riro mai he nohoanga mona ki te aroaro o ona teina katoa.
19
A, ko nga whakatupuranga enei o Ihaka tama a Aperahama: he whanau na Aperahama a Ihaka:
20
A no te wha tekau o nga tau o Ihaka i tango ai ia i a Ripeka hei wahine mana, i te tamahine a Petuere Hiriani o Parana-arama, i te tuahine o Rapana Hiriani.
21
Na, ka inoi a Ihaka ki a Ihowa mo tana wahine, no te mea he pakoko ia: a ka whakaae mai a Ihowa ki a ia, a ka hapu a Ripeka tana wahine.
22
Na, ka takatakahi nga tamariki i a raua i roto i a ia; a ka mea ia, Ki te mea ko tenei, na te aha i penei ai ahau? Na, haere ana ia ki a Ihowa ki te ui.
23
A ka mea mai a Ihowa ki a ia, E rua nga iwi kei roto i tou kopu, a e rua nga iwi e wehea mai i roto i ou whekau; a ka kaha tetahi iwi i tetahi iwi; a ka waiho te tuakana hei apa mo te teina.
24
A ka rite ona ra e whanau ai ia, na, he mahanga kei roto i tona kopu.
25
Na, ka puta mai te tuatahi, he mea whero, rite katoa ia ki te kakahu huruhuru; a huaina ana e ratou tona ingoa ko Ehau.
26
A, muri iho ka puta mai tona teina, me te pupuri ano tona ringaringa i te rekereke o Ehau; a huaina iho tona ingoa ko Hakopa; a e ono tekau nga tau o Ihaka i to raua whanautanga.
27
Na, ka kaumatua ake nga tamariki: a he tangata mohio ki te hopu kirehe mohoao a Ehau, he tangata noho koraha; ko Hakopa ia he tangata noho pai, he tangata noho teneti.
28
A i aroha a Ihaka ki a Ehau, mona i hopu mai i te kai mana: ko Ripeka ia i aroha ki a Hakopa.
29
Na, ka kohuatia he kai e Hakopa, a ka haere mai a Ehau i te koraha, a e hemo ana ia:
30
Na, ka mea mai a Ehau ki a Hakopa, Maku tetahi kai i taua mea whero e whero ra, ne? e hemo ana hoki ahau: koia i huaina ai tona ingoa ko Eroma.
31
Na, ko te meatanga mai a Hakopa, Hokona mai ki a au akuanei tou matamuatanga.
32
Na, ka mea a Ehau, Ka tata nei ahau te mate: a, hei aha maku tenei matamuatanga?
33
A ka mea atu a Hakopa, Oati mai ki a au aianei; na, ka oati ia ki a ia: a ka hokona atu e ia tona matamuatanga ki a Hakopa.
34
Katahi ka hoatu e Hakopa he taro ki a Ehau me nga pi i kohuatia ra: na ka kai ia, ka inu, ka whakatika hoki, a ka haere: a whakahaweatia ana e Ehau tona matamuatanga.