Genesis Chapter 29 - Paipera Tapu 1868 | Te Paipera Tapu 1868

Genesis Chapter 29 - Paipera Tapu 1868

1
Na, ka turia atu e Hakopa, a ka haere ki te whenua o nga tangata o te rawhiti.
2
A tana tirohanga atu, na ko tetahi poka i te parae, a kei reira ano hoki etahi kahui hipi e toru e takoto ana; i whakainumia hoki e ratou nga kahui ki te wai o taua poka: me tetahi kohatu nui hoki i te waha o te poka.
3
A i huihuia ki reira nga kahui katoa: a i whakatakā atu e ratou te kohatu i te waha o te poka, kia whakainumia ai nga hipi, na, ka whakahokia ano e ratou te kohatu ki te waha o te poka ki tona wahi ano.
4
Na, ka mea a Hakopa ki a ratou, E aku tuakana, no hea koutou? a ka mea mai ratou, No Harana matou.
5
Na, ka mea ia ki a ratou, E mohio ana ianei koutou ki a Rapana tama a Nahora? A ka mea mai ratou, E mohio ana ano matou.
6
A ka mea ia ki a ratou, E ora ana ranei ia? A ka mea mai ratou, E ora ana ano: a ko Rahera tenei ko tana tamahine, te haere mai nei me nga hipi.
7
Na, ka mea atu ia, Nana, e nui ana ano te ra, ehara tenei i te wa hei huihuinga mai mo nga kararehe: whakainumia nga hipi, haere hoki ki te whangai.
8
Na, ka mea mai ratou, E kore e taea e matou, kia huihuia mai ra ano nga kahui katoa, kia whakatakā hoki e ratou te kohatu i te waha o te poka; katahi ka whakainu matou i nga hipi.
9
I a ia ano e korero ana ki a ratou, na, ka puta mai a Rahera me nga hipi a tona papa: ko ia hoki te kai whangai.
10
A te kitenga o Hakopa i a Rahera tamahine a Rapana tungane o tona whaea, me nga hipi hoki a Rapana tungane o tona whaea, na, ka haere atu a Hakopa, a whakatakā atu ana e ia te kohatu i te waha o te poka, whakainumia ana e ia nga hipi a Rapana tungane o tona whaea.
11
Na, ka kihi a Hakopa i a Rahera, a nui atu tona reo ki te tangi.
12
Na, ka korerotia mai e Hakopa ki a Rahera ko ia te teina o tona papa, he tamaiti hoki na Ripeka: a ka rere atu ia ki te korero ki tona papa.
13
A te rongonga o Rapana i te rongo o Hakopa o te tamaiti a tona tuahine, na, ka rere ia ki te whakatau i a ia, a ka awhi i a ia, ka kihi hoki i a ia, kawea ana ia e ia ki tona whare. A ka korerotia mai e ia enei mea katoa ki a Rapana,
14
Na, ka mea mai a Rapana ki a ia, He pono ko toku wheua me toku kikokiko koe. A kotahi te marama i noho ai ia ki a ia.
15
Na, ka mea mai a Rapana ki a Hakopa, No te mea ko taku teina koe, me mahi noa ano koe ki a au? korerotia mai ki a au, me aha he utu mou?
16
Na, tokorua nga tamahine a Rapana: te ingoa o te tuakana ko Rea, te ingoa hoki o te teina ko Rahera.
17
A he papahewa nga kanohi o Rea; he mea ahuareka ia a Rahera, he ataahua hoki ki te titiro atu.
18
A i aroha a Hakopa ki a Rahera; a ka mea ia, Kia whitu nga tau e mahi ahau ki a koe mo Rahera mo to tamahine o muri.
19
Na, ka mea mai a Rapana, Engari te hoatu e ahau ki a koe, kei hoatu ki te tangata ke: e noho ki a au.
20
Na, e whitu nga tau i mahi ai a Hakopa mo Rahera; a he rangi torutoru noa ake te rite o aua tau ki tana whakaaro iho, i tona aroha hoki ki a ia.
21
Na, ka mea atu a Hakopa ki a Rapana, Homai taku wahine, kua rite nei hoki oku ra, a ka haere ahau ki roto ki a ia.
22
Na, ka huihuia mai e Rapana nga tangata katoa o taua wahi, a tukua ana e ia he hakari.
23
A i te ahiahi, na, ka mau ia ki a Rea ki tana tamahine, a kawea atu ana ia ki a ia; a ka haere ia ki roto ki a ia.
24
A i hoatu e Rapana a Tiripa tana pononga wahine hei pononga ma Rea ma tana tamahine.
25
A i te ata, na, ko Rea ia: a ka mea ia ki a Rapana, He aha tenei mahi au ki a au? ehara ianei a Rahera i taku i mahi ai ahau ki a koe? a na te aha koe i tinihanga ai ki a au?
26
Na, ko te meatanga mai a Rapana, Ehara tenei i te tikanga o to matou whenua kia hoatu te teina ki mua o te tuakana.
27
Whakatutukitia te wiki mo tenei, ka hoatu ano hoki ia e matou ki a koe mo te mahi e mahi ai koe ki a au i etahi atu tau e whitu.
28
A pera ana a Hakopa, a whakatutukitia ana e ia te wiki mo tenei: a ka homai e ia a Rahera tona tamahine ki a ia hei wahine mana.
29
A i homai ano e Rapana a Piriha tona pononga wahine ki a Rahera ki tana tamahine, hei pononga mana.
30
Na, ka haere ano hoki ia ki roto ki a Rahera, a nui atu tona aroha ki a Rahera i tona ki a Rea; a e whitu atu nga tau i mahi ai ia ki a ia.
31
A te kitenga o Ihowa e kinongia ana a Rea, na, ka whakatuwheratia e ia tona kopu: he pakoko ia a Rahera.
32
Na, ka hapu a Rea, a ka whanau he tamaiti, a huaina ana e ia tona ingoa ko Reupena: i mea hoki ia, Mo Ihowa hoki i titiro mai ki taku tangihanga; ta te mea hoki akuanei taku tahu aroha ai ki a au.
33
Na, ka hapu ano hoki ia, a ka whanau he tamaiti; a ka mea ia, I rongo hoki a Ihowa e kinongia ana ahau, koia i homai ai hoki e ia tenei ki a au: huaina ana e ia tona ingoa ko Himeona.
34
Na, ka hapu ano hoki ia, a ka whanau he tamaiti; a ka mea ia, Katahi ano taku tahu ka piri mai ki a au, no te mea hoki ka tokotoru a maua tamariki ka whanau; no reira i huaina ai e ia tona ingoa ko Riwai.
35
Na, ka hapu ano hoki ia, a ka whanau he tamaiti; a ka mea ia, Katahi au ka whakamoemiti atu ki a Ihowa: koia i huaina ai e ia tona ingoa ko Hura; a ka mutu ona whanautanga.