- 1
- Na, ka karanga atu a Hakopa ki ana tamariki, a ka mea atu, Huihui mai koutou, a ka korerotia atu e ahau ki a koutou nga mea e pono mai ki a koutou i nga ra o te whakamutunga.
- 2
- Huihui mai, whakarongo hoki, e nga tamariki a Hakopa; whakarongo hoki ki a Iharaira ki to koutou papa.
- 3
- E Reupena, ko koe taku matamua, toku pakaritanga, me te timatanga hoki o toku kaha, te hiranga ake o te kororia, te hiranga ake hoki o te kaha:
- 4
- He mea pokarekare, ano he wai, e kore koe e kake; mo to pikitanga i te moenga o tou papa; a pokea iho e koe i reira: i pikitia e ia ki toku takotoranga.
- 5
- He tuakana he teina a Himeona raua ko Riwai; he mea nanakia a raua hoari.
- 6
- Kaua e tomo, e taku wairua, ki roto ki to raua runanga; kaua e huihuia, e taku kororia, ki roto ki to raua whakaminenga: i patu tangata hoki raua i a raua e riri ana, a he whakaahuareka noa na raua i whakangongengonge ai raua i te kau.
- 7
- Kia kangā ta raua riri, i kaha nei; me ta raua aritarita, no te mea he nanakia: ka wehea atu raua e ahau ki roto ki a Hakopa, ka whakamararatia atu hoki raua ki roto ki a Iharaira.
- 8
- E Hura, ko koe e whakamoemititia e o tuakana e o teina: ka u to ringaringa ki te kaki o o hoa riri; ka piko iho ki a koe nga tamariki a to papa.
- 9
- He kuao raiona a Hura: i kake atu koe, e taku tamaiti, i te haenga: i piko iho ia, i tapapa iho ia, i pera me te raiona, i pera hoki me te raiona katua; ma wai ia e whakaoho?
- 10
- E kore e riro ke te hepeta a Hura, me te kai whakatakoto tikanga o roto o ona waewae, kia tae mai ra ano a Hiro; a ki a ia te huihuinga o nga iwi.
- 11
- Ka herea e ia tana kuao ki te waina, te tamaiti hoki a tana kaihe ki te waina pai; ka horoia e ia ona kakahu ki roto ki te waina, ona weruweru hoki ki te toto o te karepe:
- 12
- Mumura tonu ona kanohi i te waina, ka ma hoki ona niho i te waiu.
- 13
- Ka noho a Hepuruna ki te wahapu o te moana; hei wahapu ano ia mo nga kaipuke; ka tutuki atu hoki tana rohe ki Hairona.
- 14
- He kaihe kaha a Ihakara, e tapapa iho ana i waenganui i nga pikaunga e ma:
- 15
- A tona kitenga i te okiokinga he mea pai, i te whenua hoki he ahuareka; na ka tukua iho tona pokohiwi ki te nikaunga, a meinga ana ia hei pononga homai takoha.
- 16
- Ka whakariterite whakawa a Rana mo tona iwi, ka pera ano me tetahi o nga iwi o Iharaira.
- 17
- Hei nakahi a Rana ki te ara, hei neke hoki ki te huarahi, hei ngau i te rekereke o te hoiho, a ka hinga ki muri tona kai eke.
- 18
- E tatari atu ana ahau ki tau whakaoranga, e Ihowa.
- 19
- Ko Kara, ka hinga ia i te ope: otiia ka riro mai i a ia te papa.
- 20
- Ko ta Ahera, ka momona tana taro, a he kai kingi ona hua.
- 21
- He hata kua tukua kia haere a Napatari: e homai ana e ia nga kupu papai.
- 22
- He peka hua a Hohepa, he peka hua i te taha o te puna; e totoro atu ana ona manga ki tua o te taiepa:
- 23
- I whakatupu-kino nga kai kopere i a ia, i pere mai hoki, i kino hoki ki a ia:
- 24
- Otiia i mau tana kopere i runga i te kaha, a i whakapakaritia nga tākakau o ona ringa e nga ringa o te Kaha o Hakopa; (no reira nei te hepara, te kamaka o Iharaira:)
- 25
- Ara, e te Atua o tou papa, mana ano koe e awhina; e te Kaha rawa hoki, mana ano hoki e tuku mai ki a koe nga manaakitanga o te rangi i runga, nga manaakitanga hoki o te rire e takoto ana i raro, nga manaakitanga o nga u, o te kopu hoki:
- 26
- Hira ake nga manaakitanga a tou papa i nga manaakitanga a oku tupuna, tae noa atu ki tera taha o nga pukepuke tu tonu: ka tau iho ena mea ki runga ki te mātenga o Hohepa, ki te tumuaki hoki ona i motuhia atu nei i ona tuakana.
- 27
- Ka haehae a Peniamine ano he wuruhi: ka kainga e ia te tupapaku i te ata, a i te ahiahi ka tuwha e ia nga taonga parakete.
- 28
- Ko enei katoa nga iwi kotahi tekau ma rua o Iharaira: ko te korero ano hoki tenei a to ratou papa ki a ratou, me tana manaakitanga hoki i a ratou; i manaakitia ratou e ia, tenei tangata tenei tangata, me tona manaakitanga ano.
- 29
- A i whakahau ano ia i a ratou, i mea ki a ratou, Ka kohia atu ahau ki toku iwi: tanumia ahau ki roto ki oku mātua ki te ana i te wahi oneone o Eperona o te Hiti,
- 30
- Ki te ana i te parae o Makapera, i te ritenga mai o Mamere, i te whenua o Kanaana, ki tera hoki i hokona tahitia me te parae e Aperahama i a Eperona Hiti, kia puritia hei tanumanga.
- 31
- I tanumia e ratou a Aperahama raua ko Hara ko tana wahine ki reira; i tanumia a Ihaka raua ko Ripeka ko tana wahine ki reira; i tanumia hoki a Rea e ahau ki reira.
- 32
- I hokona te parae me te ana i reira ki nga tamariki a Hete.
- 33
- A ka mutu te whakahau a Hakopa, ki ana tamariki, na, ka pepeke ake ona waewae ki roto ki te moenga, a ka hemo, a ka kohia atu ki tona iwi.
Address: 
Phone: 
Email: