- 1
- Na, te whakapono, he whakapumautanga i nga mea e tumanakohia atu ana, he whakakitenga i nga mea kahore nei e kitea.
- 2
- Na konei hoki nga kaumatua i korerotia paitia ai.
- 3
- Na te whakapono i mātau ai tatou he mea hanga nga ao e te kupu a te Atua, a, nga mea e tirohia atu nei kihai i puta ake i roto i nga mea e kitea ana.
- 4
- Na te whakapono i pai ake ai i ta Kaina te patunga tapu i tapaea atu e Apera ki te Atua, a whakaaturia mai ana ia he tangata tika, i whakaatu hoki te Atua ki ana whakahere: na taua mea nei ano, ahakoa mate ia e korero ana ano ia.
- 5
- Na te whakapono a Enoka i kawea ketia ai, tē kite i te mate; na, kahore ia i kitea, no te mea kua kawea ketia ia e te Atua: i mua hoki i tona kawenga ketanga i whakaaturia mai ia, e ahuareka ana te Atua ki a ia.
- 6
- Na, ki te kahore he whakapono, e kore e taea he mea e ahuareka mai ai ia: ki te haere hoki tetahi ki te Atua, me whakapono ia ko ia ano tenei ko te Atua, a e hoatu ana ano e ia he utu ki te hunga e ata rapu ana i a ia.
- 7
- Na te whakapono a Noa, i tona whakamaharatanga e te Atua ki nga mea kahore ano i kitea, i oho ai, a hangā ana e ia te āka hei whakaora mo tona whare; na tenei ano ia i whakahe ai i te ao, a uru ana ki te tika o te whakapono.
- 8
- Na te whakapono a Aperahama i ngohengohe ai, i tona karangatanga kia haere ki te wahi meake riro i a ia hei kāinga, a haere ana ia, tē mātau ki te wahi e haere ai ia.
- 9
- Na te whakapono ia i noho manene ai ki te whenua i whakaaria mai, he whenua tangata-ke ano ki a ia, a noho teneti ana ia, ratou ko Ihaka ko Hakopa, ona hoa kua uru tahi nei ratou ki taua mea i whakaaria mai ra:
- 10
- I tatari hoki ia ki te pa whai turanga, ko te Atua nei te kai hanga te kai mahi.
- 11
- Me Hera ano hoki, na te whakapono ia i whai kaha ai i hapū ai, a whanau ana tana tamaiti i te mea kua taka ke ona tau, i mahara hoki ia he pono ta te kai whakaari mai.
- 12
- Na, whanau ake i te kotahi, a he tangata ano hoki ia kua whakatupapakutia ki enei mea, me te mea ko nga whetu o te rangi te tini, koia ano kei te onepu i te taha o te moana e kore nei e taea te tatau.
- 13
- I mate katoa enei i runga i te whakapono, kihai i whiwhi ki nga mea i whakaaria mai ra, engari he mea kite atu na ratou i tawhiti, a whakaponohia atu ana e ratou, awhitia atu ana, whakaae ana ratou he manene ratou he noho noa iho i runga i te whenua.
- 14
- Te hunga hoki he penei a ratou korero, e whakakite pu ana ratou he whenua tupu ta ratou e rapu nei.
- 15
- Me i mahara hoki ratou ki taua kāinga i haere mai nei ratou i reira, penei kua atea he hokinga atu ma ratou:
- 16
- Tena ko tenei e hiahia ana ratou ki tetahi kāinga pai ake, ki tera i te rangi: koia te Atua tē whakama ai ki a ratou, kia karangatia ko to ratou Atua; kua rite hoki i a ia tetahi pa mo ratou.
- 17
- Na te whakapono a Aperahama i tapae atu ai i a Ihaka, i tona whakamatautauranga; na, te tangata i a ia nei nga kupu whakaari, tapaea atu ana e ia tana huatahi.
- 18
- Mona nei te kupu, na, Kei a Ihaka he karangatanga mo tou whanau:
- 19
- I whakaaro hoki ia, ahakoa i roto nei ano i te mate, e taea ano ia e te Atua te whakaara ake; a riro mai ana ia i reira he mea ahua.
- 20
- Na te whakapono ta Ihaka kupu manaaki mo Hakopa raua ko Ehau, he meatanga ki nga mea o muri nei.
- 21
- Na te whakapono a Hakopa, i a ia ka tata ki te mate, i manaaki ai i nga tamariki tokorua a Hohepa; a koropiko ana i runga i tona tokotoko.
- 22
- Na te whakapono a Hohepa, i a ia e whakahemohemo ana i whakahua ai i te haerenga mai o nga tamariki a Iharaira; a whakatakoto tikanga ana ia mo ona wheua.
- 23
- Na te whakapono a Mohi, i tona whanautanga, i hunā ai e ona matua e toru nga marama, i kite hoki raua he tamaiti ataahua ia; kihai hoki raua i mataku ki te ture a te kingi.
- 24
- Na te whakapono a Mohi, i tona kaumatuatanga, kihai i pai kia karangatia he tamaiti na te tamahine a Parao;
- 25
- Ki tana hoki, ko te mamae tahi me to te Atua iwi, he mea pai ke atu i nga ahuareka o te hara kia riro mai mo tetahi wa;
- 26
- Ki tona whakaaro, ko te tawainga mo te Karaiti, he taonga nui ke atu i nga taonga o Ihipa: i titiro atu hoki ia ki te utu ka homai.
- 27
- Na te whakapono ia i haere atu ai i Ihipa, kihai hoki i mataku ki te riri a te kingi: i u tonu hoki ia, he titiro nana ki te Atua e kore nei e kitea.
- 28
- Na te whakapono ia, i whakarite ai i te Kapenga, me te ringihanga toto, kei pa ki a ratou te kai whakamate i nga whanau matamua.
- 29
- Na te whakapono ratou i haere ai ra te Moana whero me te mea e na runga ana i te whenua maroke; a, te whakamatauranga a nga Ihipiana, horomia ake ratou.
- 30
- Na te whakapono nga taiepa o Heriko i whenuku ai, i te mea e whitu nga ra e taiawhiotia ana.
- 31
- Na te whakapono a Rahapa te wahine puremu kihai i whakangaromia ngatahitia me te hunga whakapono kore, nona i whakamanuhiri i nga tutei i runga i te rangimarie.
- 32
- Kia pehea ake ano hoki aku korero? e kore hoki e ranea te taima hei korerotanga maku i nga mea a Kireona, a Paraka, a Hamahona, a Hepeta, a Rawiri, a Hamuera, a nga poropiti;
- 33
- Na te whakapono nei i hinga ai i a ratou nga rangatiratanga, i mahia ai e ratou te tika, i whiwhi ai ratou ki nga mea i whakaaria mai i mua, i tutakina ai a ratou nga waha o nga raiona.
- 34
- I tineia ai e ratou te kaha o te ahi, i mawhiti atu ai i te mata o te hoari, i whai kaha ai i runga i te ngoikore, i meinga ai kia kaha i te whawhaitanga, whati ana i a ratou nga taua a nga tauiwi.
- 35
- Riro mai ana i nga wāhine a ratou tupapaku he mea whakaara ake: ko etahi i whakamamaetia, kihai ano i whakaae atu kia whakaorangia; kia whiwhi ai ratou ki te whakaarahanga e pai ke atu ana:
- 36
- Ko etahi i whakamatau i nga tawainga, i nga whiunga, i nga mekameka ano hoki, i te whare herehere.
- 37
- I akina ratou ki te kohatu, i kania, i whakawaia, i mate i te patunga, a te hoari: i haereere ratou he mea whakakakahu ki nga hiako hipi ki nga hiako koati; he hunga rawakore ratou, e tukinotia ana, e whakatupuria kinotia ana;
- 38
- (Kihai nei te ao i pai mo ratou:) i haereere ratou i waenga tahora, i nga maunga, i nga ana, i nga poka o te whenua.
- 39
- Na, pai tonu te korero mo enei katoa, he mea na te whakapono, heoi kihai ratou i whiwhi ki te mea i whakaaria mai ra:
- 40
- Na te Atua hoki i whakaaro wawe ki tetahi mea pai atu mo tatou, kia kaua ai ratou e meinga kia tino tika i te mea kahore nei tatou.
Address: 
Phone: 
Email: