- 1
- Na, e aku teina tapu, e te hunga kua uru nei ki ta te rangi karangatanga, whakaaroa a Ihu Karaiti te Apotoro te Tohunga nui o te tikanga kua whakaaetia nei e tatou;
- 2
- I pono nei ki tona kai whakarite mai, i pera ano me Mohi i tona whare katoa.
- 3
- I tika hoki kia nui ake te kororia mo tenei tangata i to Mohi, no te mea nui ake i to te whare te honore o te kai hanga.
- 4
- He mea hanga hoki na tetahi tangata nga whare katoa; ko te Atua ia te kai hanga o nga mea katoa.
- 5
- A i pono ano a Mohi i roto i tona whare katoa, i pera me te pononga, hei kai whakaatu mo nga mea ka korerotia mai i muri;
- 6
- Ko te Karaiti ia i rite ki te tama i tona whare ano; ko tona whare tonu hoki tatou, ki te u, a taea noatia te mutunga, to tatou maia me te whakamanamana ki te mea e tumanakohia atu nei.
- 7
- Na, kia rite ki ta te Wairua Tapu i mea ai, Ki te rongo koutou ki tona reo aianei,
- 8
- Kaua e whakapakeketia o koutou ngakau, kei pera me o te whakatoinga, i te ra o te whakamatautauranga i te koraha;
- 9
- I a au i whakamatautauria e o koutou mātua, i a au i ata mohiotia, a e wha tekau nga tau i kite ai ratou i aku mahi.
- 10
- Na, ka hoha ahau ki taua whakatupuranga, ka mea, Kotiti ke tonu o ratou ngakau; kahore ratou e mohio i aku ara.
- 11
- No reira i riri ai ahau i oati ai hoki, E kore ratou e tae ki taku okiokinga.
- 12
- Kia tupato, e aku teina, kei noho te ngakau kino te mea whakapono kore i roto i tetahi o koutou, kei whakarerea te Atua ora.
- 13
- Engari me whakahau koutou tetahi i tetahi i tenei ra i tenei ra, i te mea e karangatia ana ko tenei ra, kei whakapakeketia tetahi o koutou e te tinihanga o te hara.
- 14
- Ka uru hoki tatou ki ta te Karaiti, ki te mea ka mau i a tatou te timatanga, ara, te whakaaro pumau, taea noatia te mutunga;
- 15
- I te mea hoki e korerotia ana, Ki te rongo koutou ki tona reo aianei, kaua e whakapakeketia o koutou ngakau, kei pera me o te whakatoinga.
- 16
- Ko wai hoki i whakatoi i to ratou rongonga ai? he teka ianei ko te hunga katoa i haere mai i Ihipa, a Mohi i arahi ra?
- 17
- A i riri ia ki a wai i nga tau e wha tekau? he teka ianei ki te hunga i hara, i hinga na o ratou tinana ki te koraha?
- 18
- A i oati ia ki a wai, e kore ratou e tae ki tona okiokinga? he teka ranei ki te hunga kihai nei i whakapono?
- 19
- Na, ka kite nei tatou kihai ratou i ahei te tae atu i te kore o te whakapono.
Address: 
Phone: 
Email: