- 1
- Na, te kawenata tuatahi he tikanga karakia ano ona, me tetahi wahi tapu he mea maori.
- 2
- I hangā hoki tetahi tapenakara, te tuatahi, i reira te turanga rama, me te tepara, me te taro aroaro, tona ingoa ko te wahi tapu:
- 3
- A i tua atu o te rua o nga arai, ko te tapenakara, e huaina ana ko te wahi tino tapu.
- 4
- I reira nei te tahu kakara koura, me te āka o te kawenata he mea whakakikorua nei nga wahi katoa ki te koura, i roto ano i taua mea ko te oko koura i te mana, me te tokotoko o Arona i pihi ra, me nga papa o te kawenata:
- 5
- A i runga atu i tenei ko nga Kerupima o te kororia, e whakamarumaru ana i te taupoki whakamarie: e kore aua mea e taea te ata korero aianei.
- 6
- Heoi ka ata rite nei enei mea, ka haereere nga tohunga i nga wa katoa ki te tapenakara tuatahi, i a ratou e mahi ana i nga mahi minita.
- 7
- Ki te tuarua ia kotahi ano te haerenga atu, i te tau, a ko te tohunga nui anake, kihai ano i mahue atu nga toto; i tapaea atu hoki mona, mo nga hē ano o te iwi:
- 8
- Ko ta te Wairua Tapu hoki tenei i whakaatu ai, kiano te huarahi ki te wahi tino tapu i whakakitea mai, i te mea e tu ana ano te tapenakara tuatahi:
- 9
- He ahua tenei i taua wa ra, i tapaea atu ai nga whakahere me nga patunga tapu, nga mea kihai i tau hei mea i te tangata nāna tera mahi kia tino tika tona hinengaro;
- 10
- Heoi ano o era he kainga, he inumanga, he horoinga maha, he tikanga na te kikokiko, he mea whakarite mai, a taea noatia te wa whakatikatika.
- 11
- Heoi, te taenga mai o te Karaiti hei tohunga nui mo nga mea pai e whai mai ana i muri, he nui atu ano hoki he tino tika te tapenakara, ehara i te mea hanga na te ringaringa, ara, ehara i te mea no tenei hanganga:
- 12
- Ehara ano hoki i te mea no nga koati nga toto, no nga kuao kau ranei, engari nona ake nga toto i haere atu ai ia, kotahi tonu te haerenga, ki roto ki te wahi tino tapu, i te mea ka whiwhi ki tana mea hei hoko mo tatou a ake tonu atu.
- 13
- Ki te mea hoki ma nga toto o nga puru o nga koati, ma nga pungarehu ranei o te kuao kau, he mea tāuhiuhi atu ki te hunga kua poke, ka tapu ai ka ma ai te kikokiko;
- 14
- Tera atu to nga toto o te Karaiti, nāna nei ia i tapae atu ki te Atua, i runga i ta te Wairua ora tonu, kahore hoki ona koha, ma tera e ma ai o koutou hinengaro i nga mahi mate, e mahi atu ai koutou ki te Atua ora?
- 15
- Mo konei ano ia i meinga ai hei Takawaenga mo te kawenata hou, kia mate ai ia hei utu mo nga hē i raro i te kawenata tuatahi, kia riro ai i te hunga e karangatia ana te wahi tūturu i korerotia i mua.
- 16
- Ki te takoto hoki he ohāki, me whakaatu mai te matenga o te tangata nāna i whakatakoto.
- 17
- Kia mate hoki te tangata, katahi ka whai mana te ohāki: kahore hoki e u i te mea e ora ana te tangata nāna i whakatakoto.
- 18
- Koia hoki tē mahue ai te toto i te whakatapunga o te kawenata tuatahi.
- 19
- I te mutunga hoki o ta Mohi korero i nga tikanga katoa ki te iwi katoa, hei whakaritenga mo ta te ture, ka mau ia ki nga toto o nga kuao kau o nga koati, ki te wai, ki te huruhuru whero, ki te hihopa, a tāuhiuhia atu ana e ia te pukapuka, me te iwi katoa;
- 20
- Me tana ki ano, Ko nga toto enei o te kawenata kua akona mai nei e te Atua ki a koutou.
- 21
- I tāuhiuhia ano hoki e ia ki nga toto te tapenakara, me nga oko katoa mo te mahi minita.
- 22
- He torutoru ano hoki o nga mea katoa ka mahue atu i te ture i te purenga ki te toto; ki te kahore hoki te ringihanga toto, kahore he murunga hara.
- 23
- Koia i tika ai kia purea ki enei nga ritenga o nga mea i te rangi; ko nga tino mea ia o te rangi ki nga patunga tapu e pai rawa atu ana i enei.
- 24
- Ehara hoki i te mea kua tomo a te Karaiti ki nga wahi tapu i hangā e te ringaringa, ki nga ahua o nga tino wahi; engari ki te tino rangi pu ano, puta ai ki te aroaro o te Atua, hei mea i te pai mo tatou:
- 25
- Ehara ano i te mea kia maha ana tapaenga i a ia, kia pera me te tohunga nui e haere nei ki roto ki te wahi tino tapu i tenei tau i tenei tau, no etahi atu ano hoki nga toto;
- 26
- Penei kia maha he mamaetanga mona he mea timata i te hanganga ra ano o te ao: tena ko tenei kotahi tonu tona whakakitenga mai i te mutunga o te ao, hei whakakahore i nga hara, i a ia ka meinga hei patunga tapu.
- 27
- Na, kua takoto nei te tikanga mo nga tāngata kia kotahi tonu te matenga, a muri iho i tenei ko te whakaritenga whakawa;
- 28
- Whaihoki ko te Karaiti kotahi tonu tona tapaenga atu hei pikau i nga hara o te tini, a tenei ake ko te rua o ona whakakitenga mai, kahore ano he hara, hei whakaora i te hunga e tatari ana ki a ia.
Address: 
Phone: 
Email: