Hosea Chapter 4 - Paipera Tapu 1868 | Te Paipera Tapu 1868

Hosea Chapter 4 - Paipera Tapu 1868

1
Whakarongo ki te kupu a Ihowa, e nga tamariki a Iharaira; he whakawa hoki ta Ihowa mo nga tangata o te whenua, no te mea kahore he pono, kahore hoki he tohu tangata, kahore he mātauranga ki te Atua i te whenua.
2
Te oatitanga! te korero teka! te kohuru! te tahae! te puremu! pakaru mai ana ratou; te toto, pa tonu ki te toto.
3
Mo reira te whenua ka pouri, ona tangata katoa ka tangi, me nga kirehe ano hoki o te parae, me nga manu ano hoki o te rangi; ka whakakorea ano hoki nga ika o te moana.
4
Kaua ia tetahi tangata e whakawa, e whakahe i tetahi tangata: e rite ana hoki to iwi ki te hunga e totohe ana ki te tohunga.
5
Mo reira ka hinga koe i te awatea, me te poropiti ano ka hinga ngatahi korua i te po, ka whakangaromia ano hoki e ahau to whaea.
6
Ka ngaro toku iwi i te kore mātauranga; kua paopao na koe ki te mātauranga, na, ka whakaparahako ano ahau ki a koe hei tohunga maku: kua wareware na koe ki te ture a to Atua, ka wareware ano hoki ahau ki o tamariki.
7
I te mea ka nui ratou, katahi ratou ka hara ki a au: na, ka puta ke i a au to ratou kororia hei whakama.
8
Te hara o toku iwi kainga ake e ratou, o ratou ngakau anga tonu ki to ratou he.
9
A ka rite te iwi ki te tohunga: ka whiua ano hoki ratou e ahau mo o ratou ara, ka utua ano hoki ratou e ahau mo a ratou mahi.
10
Ka kai hoki ratou, a e kore e makona: ka puremu ratou, a e kore e whakatokomahatia; mo ta ratou whakarerenga i nga mahara ki a Ihowa.
11
Riro pu te ngakau i te puremu, i te waina, i te waina hou.
12
E ui tikanga ana toku iwi ki ā ratou rakau, ko to ratou tokotoko ano hoki hei whakaatu tikanga ki a ratou: kua whakapohehetia hoki ratou e te wairua o te puremu, kua maunu atu ano ratou i raro i to ratou Atua ki te puremu.
13
E patu ana ratou i nga patunga tapu i runga i nga tihi o nga maunga, e tahu whakakakara ana i runga i nga pukepuke, i raro i nga oki, i nga papirara, i nga eremi, he pai hoki no te taumarumarunga iho o aua rakau: mo reira ka moe puku a koutou tamahine, ka puremu ano hoki o koutou hoa wahine.
14
E kore e whiua e ahau a koutou tamahine ina moe puku, o koutou hoa wahine ano hoki ina puremu; ko ratou nei ano hoki he mea wehe atu ki nga wahine puremu, ko ratou tahi ano ko nga wahine puremu kei te mea patunga tapu: mo reira ka hinga te iwi kahore nei o ratou mātauranga.
15
Ahakoa puremu noa koe, e Iharaira, kaua a Hura e he; kaua ano koutou e haere ki Kirikara, kaua ano hoki e haere ki runga ki Pete-awene, kaua ano e oati, Kei te ora a Ihowa.
16
Kei te whakangutungutu hoki a Iharaira, tona rite kei te kau e whakangutungutu ana: akuanei ratou whangaia ai e Ihowa, peratia ai me te reme i te wahi whanui.
17
Kua honoa a Eperaima ki nga whakapakoko: tukua atu ki tana.
18
Te mea e inumia ana e ratou kua kawa, he puremu tonu ta ratou; ta ona rangatira e pai ai, ko te kupu Homai: —he hanga whakama.
19
Kua oti ia te takai e te hau ki roto ki ona parirau, ka whakama ano hoki ratou ki a ratou patunga tapu.