- 1
- Te kitenga i kite ai a Ihaia tama a Amoho, he mea mo Hura, mo Hiruharama, i nga ra o enei kingi o Hura, o Utia, o Iotama, o Ahata, o Hetekia.
- 2
- Whakarongo, e nga rangi, kia whai taringa mai hoki, e te whenua; he korero hoki na Ihowa, I atawhai, i whakatupu tamariki ahau, na, kua whakakeke nei ratou ki a au.
- 3
- E mohio ana te kau ki tona ariki, te kaihe ki te takotoranga kai a tona rangatira: a Iharaira, kahore ia e mohio; taku iwi, kahore ratou e whakaaro.
- 4
- Aue, e te iwi hara, e te hunga e taimaha ana i te kino, he uri no nga kai mahi i te he, he tamariki whakangau ke, kua whakarerea e ratou a Ihowa, kua whakahawea ki te Mea Tapu o Iharaira, kua riro ke whakamuri.
- 5
- Kia patua ano hoki koutou hei aha? ka tutu ano hoki koutou: kei te mate katoa te mahunga; te ngakau katoa whakaruhi rawa.
- 6
- Kahore ona wahi ora, o te kapu ano o te waewae, a tae noa ki te mahunga; he patunga kautanga, he karawarawa, he whiunga kua pirau, kihai i romia, kihai i takaia, kihai ano hoki i whakangawaritia ki te hinu.
- 7
- To koutou whenua kua ururuatia, o koutou pa kua wera i te ahi, to koutou oneone e kainga ana e nga tangata ke i to koutou aroaro, ururua rawa, koia ano kei ta nga tangata ke whakangaromanga.
- 8
- Na, mahue iho te tamahine a Hiona, ano he tihokahoka i te mara waina, ano he wharau i te mara kukuma, ano he pa e whakapaea ana.
- 9
- Me i kahore a Ihowa o nga mano te whakatoe i tetahi toenga nohinohi rawa nei ki a tatou, kua rite tatou ki Horoma, kua pera ano me Komora.
- 10
- Whakarongo ki te kupu a Ihowa, e nga rangatira o Horoma; kia whai taringa mai ki te ture a to tatou Atua, e te iwi o Komora.
- 11
- Hei aha maku a koutou patunga maha? e ai ta Ihowa: kua makona ahau i nga tahunga o nga tinana o nga hipi toa, i te ngako o nga mea momona kahore hoki aku manakohanga atu ki te toto o nga puru, o nga reme, o nga koati toa.
- 12
- Ka haere mai koutou, ka puta ki toku aroaro, ko wai i ki atu ki tenei mea a o koutou ringa kia takahia aku marae?
- 13
- Kati te mau mai i nga whakahere horihori: te whakakakara, he mea whakarihariha ki a au: te kohititanga marama, te hapati, te karangatanga o te whakaminenga, e kore e manawanuitia e ahau; he mea kino, ae ra, te huihui nui.
- 14
- O koutou kohititanga marama, o koutou whakaminenga, kino rawa ki toku ngakau, he mea whakararu ki a au, he hanga whakahoha.
- 15
- Na, ka wherahia mai o koutou ringa, ka hunā e ahau oku kanohi ki a koutou; ka whakanuia ano hoki e koutou te inoi, e kore ahau e rongo; e kapi ana o koutou ringa i te toto.
- 16
- Horoia koutou, kia ma; whakarerea atu te kino o a koutou hanga i mua i oku kanohi; kati te mahi kino;
- 17
- Akona te mahi pai; rapua te whakarite whakawa; whakatikaia ta te tangata e tukinotia ana; whakaritea te whakawa a te pani; tohea ta te pouaru.
- 18
- Tena ra, tatou ka korerorero, e ai ta Ihowa; ahakoa i rite o koutou hara ki te mea ngangana, ka pera ano me te hukarere te ma; ahakoa i whero me te mea whakawhero, ka rite ano ki te huruhuru hipi.
- 19
- Ki te mea ka pai koutou, a ka rongo, ka kai koutou i nga mea pai o te whenua;
- 20
- Ki te whakakahore koutou, a ka tutu, ka pau koutou i te hoari; kua korero mai hoki te mangai o Ihowa.
- 21
- Aue! kua puremu te pa pono! i mua e ki ana i te whakarite whakawa, he nohoanga ia no te tika; inaiainei no nga kai kohuru.
- 22
- Kua whakapara to hiriwa; to waina, he mea whakaranu ki te wai:
- 23
- Ou rangatira he hunga whakakeke, he hoa ratou no te hunga tahae; ratou katoa e whakapai ana ki te moni whakapati; e whai ana i te utu; kahore ratou e whakarite whakawa mo te pani; e kore ano te tohe a te pouaru e tae ki a ratou.
- 24
- Mo reira, e ai ta te Ariki, ta Ihowa o nga mano, ta te Mea nui o Iharaira, Ha! ka whai whakamarietanga ahau i oku hoa riri, ka riro mai he utu i oku hoa whawhai.
- 25
- Ka tahuri atu ano toku ringa ki a koe, a ka tahia atu e ahau tou para, ka wehea katoatia atu ano tou tine:
- 26
- Ka whakahokia mai ano hoki e ahau o kai whakarite whakawa kia rite ki o mua, me o kai whakatakoto whakaaro, kia rite ki o te timatanga; muri iho ka karangatia koe, Ko te pa tika, ko te pa pono.
- 27
- Ka hokona a Hiona i runga i te whakarite whakawa, me te hunga ano ona e tahuri mai ana i runga i te tika.
- 28
- A ka huihuia kia kotahi te whakangaromanga o te hunga poka ke, o te hunga hara. Te hunga hoki e whakarere ana i a Ihowa, ka moti ratou.
- 29
- Ka whakama hoki ratou i nga oki i matenuitia e koutou, numinumi kau koutou i nga kāri i whiriwhiria e koutou.
- 30
- Ka rite hoki koutou ki te oki kua memenge ona rau, ki te kāri ano hoki kahore nei ona wai.
- 31
- A hei muka te mea kaha, hei korakora ano tana mahi; na ka ngiha ngatahi raua, kahore hoki he tangata hei tinei.
Address: 
Phone: 
Email: