- 1
- Aue te mate mo te hunga e whakatakoto ana i nga tikanga he, mo nga kai tuhituhi ano hoki e tuhituhi nei i te mea nanakia;
- 2
- Hei whakapeau ke i te whakarite whakawa mo nga rawa-kore, hei tango noa iho i te mea e tika ana ma nga ware o toku iwi, hei mea kia ai nga pouaru hei taonga ma ratou, kia pahuatia ai ano hoki nga pani e ratou!
- 3
- Ka pehea ra koutou i te ra o te tirohanga mai, o te whakangaromanga ka pa mai i tawhiti? ka rere koutou ki a wai hei awhina mai, ka waiho ano to koutou kororia ki hea?
- 4
- Ka kore nei au, ka piko iho ratou ki raro i nga herehere, ka hinga ki raro i te hunga i patua. Ahakoa ko tenei katoa, e kore tana riri e tahuri ke, maro tonu tona ringa.
- 5
- Ou, e te Ahiriana, ko ia nei te rakau a taku riri, na, taku whakatakariri te whiu i roto i o ratou ringa.
- 6
- Ka ungā atu ia e ahau ki te iwi ngutu kau, he hē mo te iwi o taku riri taku e whakahau ai ki a ia, kia tangohia nga mea parakete, kia pahuatia nga taonga, kia meinga ano ratou hei takahanga, hei pera me te paru o nga huarahi.
- 7
- Kahore ia ana whakaaro penei, kihai hoki tona ngakau i mea ki te penei; engari he whakangaro ta tona ngakau, kia kaua ano hoki e torutoru nga iwi e hatepea atu e ia.
- 8
- E ki ana hoki ia, He teka ianei he kingi katoa aku rangatira?
- 9
- He teka ianei e rite ana a Karano ki Karakemihi, e rite ana a Hamata ki Arapara, e rite ana a Hamaria ki Ramahiku?
- 10
- Ka rite ki nga kingitanga o nga whakapakoko i tupono mai ki toku ringa; nui atu nei hoki o ratou whakapakoko i o Hiruharama, i o Hamaria;
- 11
- E kore ianei taku e mea ai ki Hiruharama me ona whakapakoko e rite ki taku i mea ai ki Hamaria me ona whakapakoko?
- 12
- Na, tenei ake, kia oti i te Ariki tana mahi katoa ki Maunga Hiona, ki Hiruharama, ka whiua e ahau nga hua o te ngakau nui o te kingi o Ahiria, me te kororia ano o ona kanohi whakakake.
- 13
- E ki ana hoki ia, He kaha no toku ringa i oti ai tenei i a au, he nui no oku whakaaro, he tangata whai mahara hoki ahau: whakanekehia ana hoki e ahau nga rohe a nga iwi, o ratou taonga pahuatia ana e ahau; koia ano kei ta te tangata kaha taku whakahoki iho i nga tangata e noho ana i reira.
- 14
- Na, ano he kohanga nga taonga o nga iwi i tupono mai ki toku ringa: i rite hoki taku ki te kohinga i nga hua manu kua mahue; kohikohia ana e ahau te whenua katoa, kihai hoki i oraora te parirau o tetahi, kihai i hamama te mangai, kihai i piipi.
- 15
- E whakahihi ranei te titaha ki te tangata nana nei ia i whakamahi ki te hahau? e whakakake ranei te kani ki te tangata nana nei ia i kani ai? penei ko te patupatu hei whakawiriwiri i tona kai hapai; a to te tokotoko kai hapai ko ia ake ano; kore ake tona tikanga rakau.
- 16
- Mo reira ka ungā mai e te Ariki, e te Ariki o nga mano, te hirokitanga ki ona mea momona, a ka kā ake a raro o tona kororia, he mea whakau nana, koia ano kei te kā o te ahi.
- 17
- A hei ahi te māramatanga o Iharaira; tona tapu ano hoki hei mura, a ka wera ona tumatakuru, ona tataramoa, pau ake i te rangi kotahi.
- 18
- Ka pau ano hoki te kororia o tona ngahere, o tona mara momona, te wairua, te tinana: a te otinga, me te mea kua ngohe te ngakau o te kai hapai kara.
- 19
- Na, nga toenga o nga rakau o tona ngahere, he torutoru, ma te tamaiti ano e tuhituhi.
- 20
- I taua rangi ano ka whakamutua e nga toenga o Iharaira ratou ko nga morehu o te whare o Hakopa ta ratou okioki atu ki to ratou kai whiu; engari ka okioki pono atu ratou ki a Ihowa, ki te Mea Tapu o Iharaira.
- 21
- Tera te toenga, te toenga o Hakopa, e hoki mai ki te Atua Kaha rawa.
- 22
- No te mea ahakoa i rite tou iwi a Iharaira ki te onepu o te moana, he toenga o ratou e hoki mai: te whakaotinga i whakaritea, me te mea he waipuke tona tika.
- 23
- Ka oti ra hoki, ka mahia ano hoki e te Ariki, e Ihowa o nga mano, te mea i whakaritea ki waenganui i te whenua katoa.
- 24
- No reira tenei kupu a te Ariki, a Ihowa o nga mano, E taku iwi e noho nei i Hiona, kaua e wehi i te Ahiriana: e patu ano ia i a koe ki te rakau, e hapainga mai ano e ia tona tokotoko ki a koe, e pera tana me ta Ihipa.
- 25
- He wahi iti rawa nei hoki, a ka poroa te riri, taku whakatakariri, i a ratou ka whakangaromia nei.
- 26
- Ka oho ano hoki i a Ihowa o nga mano he whiu mona, he pera ano me te patunga o Miriana ki te kamaka ki Orepe, ka rite ano ki tana tokotoko i runga i te moana; ina, ka pera tana hapai me tera i Ihipa.
- 27
- Na, i taua rangi ano ka riro atu tana pikaunga i to pokohiwi, me tana ioka i tou kaki, ka kore noa iho ano hoki te ioka i te hinu.
- 28
- Kua tae mai ki Aiata, kua pahemo atu ki Mikirono; ana mea rongoatia ake e ia ki Mikimaha:
- 29
- Kei tenei taha ratou o te whakawhitinga, hei puni a Kepa mo ratou, pawera noa iho a Rama, kua rere a Kipea o Haora.
- 30
- Kia nui tou reo, e te tamahine o Karimi, whakarongo mai, e Raihi. He mate tou, e Anatoto!
- 31
- Kua whati a Maramena, kua putere atu nga tangata o Kepimi.
- 32
- I te mea e awatea ana ano ka tu ia ki Nopo, ka rūrū tona ringa ki te maunga o te tamahine o Hiona, ki te pukepuke i Hiruharama.
- 33
- Tera te Ariki a Ihowa o nga mano e tapahi i te peka, nui atu hoki te wehi: ka tuaina ano nga mea e tiketike ana ki runga, ka whakaititia iho ano hoki nga mea whakakake.
- 34
- Ka tuaina ano e ia nga rakau pururu o te ngahere ki te rino, ka hinga ano hoki a Repanona i te mea nui.
Address: 
Phone: 
Email: