- 1
- Te poropititanga mo te raorao o te whakakitenga. He aha ra nou, i piki katoa ai koe ki runga ki nga tuanui?
- 2
- Ki tonu koe i te nge; he pa turituri, he pa koa: ou tangata i patua ehara i te mea patu na te hoari, ehara i te hunga i mate i te whawhaitanga.
- 3
- Rere ngatahi ana ou rangatira katoa, herea iho ratou e nga kai kopere, te hunga katoa i kitea i roto i a koe, herea ngatahitia ana ratou, te hunga i rere mai i tawhiti.
- 4
- Koia ahau i mea ai, Kati te titiro mai ki a au, ka nui taku tangi, kaua e tohe ki te whakamarie i a au mo te pahuatanga o te tamahine a toku iwi.
- 5
- He rangi raruraru hoki tenei, he takahanga, he pokaikaha, he mea na te Ariki, na Ihowa o nga mano, i te raorao o te whakakitenga, he pakaruhanga i te taiepa, he karangatanga atu ki nga maunga.
- 6
- Ta Erama, he mau i te papa pere, me nga hariata tangata, me nga hoia eke hoiho; ta Kiri he whakaputa mai i te whakangungu rakau ki waho.
- 7
- Ka kapi ano hoki ou raorao pai rawa i nga hariata, ka tu ano nga rarangi o nga hoia eke hoiho ki te kuwaha.
- 8
- Ka whakakitea ano e ia te hipoki o Hura; ka titiro ano hoki koe i taua rangi ki nga patu o te whare o te ngahere.
- 9
- Ka kite ano hoki koutou i nga pakaru o te pa o Rawiri he maha, ka kohikohia ano e koutou nga wai o to raro poka.
- 10
- A, taua ana e koutou nga whare o Hiruharama; wawahia ana e koutou nga whare hei hanga mo te taiepa.
- 11
- Ka hangā ano e koutou he awa ki waenganui i nga taiepa e rua mo nga wai o te poka tawhito, kahore ia o koutou whakaaro ki te kai mahi o tena mea, kahore hoki e titiro atu ki tona kai hanga o mua noa atu.
- 12
- Heoi, te karangatanga a te Ariki a Ihowa o nga mano i taua rangi ki te tangi, ki te aue, ki te moremore, ki te whitiki i te kakahu taratara:
- 13
- Na, ko te koa te hari, ko te patu i nga kau, ko te patu i nga hipi, ko te kai kikokiko, ko te inu waina; kia kai tatou, kia inu; apopo hoki tatou mate ai.
- 14
- Ka tahi a Ihowa o nga mano ka whakaatu mai ki oku taringa, E kore rawa tenei hē o koutou e murua, a mate noa koutou, e ai ta te Ariki, ta Ihowa o nga mano.
- 15
- Ko te kupu tenei a te Ariki, a Ihowa o nga mano, Haere mai, haere ki tenei kai tiaki o nga moni, ki a Hepena ki te rangatira o te whare, mea atu,
- 16
- He aha tau i konei? ko wai hoki tau i konei, i haua ai e koe he tanumanga mou ki konei? Te kai hahau nei o te tanumanga, mona i te wahi tiketike! taraia ana e ia he nohoanga mona ki te kamaka!
- 17
- Nana, ka, peia atu koe e Ihowa, he nui te peinga, ka taupokina rawatia ano hoki koe.
- 18
- Kaha rawa tana piu i a koe, piua tonutia atu, ano he mea porotaka, ki te whenua nui, mate atu ki reira; i taua wahi ano ka ai nga hariata o tou kororia hei mea e whakama ai te whare o tou ariki.
- 19
- Ka peia atu hoki koe e ahau i tou turanga, ka turakina atu ano koe e ia i tou wahi.
- 20
- I taua rangi ano ka karangatia e ahau taku pononga a Eriakimi tama a Hirikia:
- 21
- Ka whakakakahuria ano ia e ahau ki tou kakahu, ka whakakahangia ano hoki ki tou whitiki, ka hoatu ano tou kawanatanga ki tona ringa: a hei matua ia ki te tangata o Hiruharama, ki te whare ano o Hura.
- 22
- Ka waiho ano e ahau te ki o te whare o Rawiri ki runga ki tona pokohiwi; na, mana e whakatuwhera, a kahore he tangata hei tutaki; mana e tutaki, a kahore he tangata hei whakatuwhera.
- 23
- Ka titia hoki ia e ahau ano he titi ki te wahi mau, a hei torona kororia ia ki te whare o tona pāpā.
- 24
- Ka whakairihia ano e ratou ki runga ki a ia te kororia katoa o te whare o tona pāpā, nga uri, nga whanau, nga oko ririki katoa, ara, nga oko hei peihana, me nga oko katoa ano hei hāka.
- 25
- I taua rangi, e ai ta Ihowa o nga mano, ka nekehia atu te titi i titia nei ki te wahi mau, ka tapahia, ka marere ki raro; ka motuhia atu ano hoki te mea e iri ana i runga: na Ihowa nei hoki te kupu.
Address: 
Phone: 
Email: