- 1
- I taua ra he maro, he nui, he kaha, te hoari e patua ai e Ihowa, a Rewiatana te nakahi kaha, a Rewiatana te nakahi kopikopiko, ka tukitukia ano hoki e ia te tarakona i te moana.
- 2
- I taua rangi waiatatia atu e koutou ki a ia, He mara waina whero.
- 3
- Ko ahau ko Ihowa hei tiaki i a ia, hono tonu taku whakamakuku i a ia; ka tiakina ia e ahau i te po, i te ao, kei tukinotia.
- 4
- Kahore he riri i a au; ko wai hei mea i te tataramoa, i te tumatakuru, hei whawhai ki a au? ka tika tonu atu ahau i waenga, tahuna ngatahitia ake e ahau.
- 5
- Kia hopukia mai ranei e ia toku kaha, kia houhia ai te rongo ki a au; ka houhia ano tana rongo ki a au.
- 6
- Ka meinga e ia nga uri o Hakopa kia whai pakiaka: ka whai puawai, ka kopuku ano hoki a Iharaira, ka kapi ano hoki te mata o te ao katoa i ona hua.
- 7
- I rite ranei tana patu i a ia ki tana patunga i ona kai patu? i rite ranei tona whakamatenga ki te whakamatenga o ona kai whakamate?
- 8
- He mea ata mehua tau ngangare ki a ia i te mea ka tukua atu e koe; ka whakamarietia e ia tana hau kaha i te ra o te hau ita.
- 9
- Na, ko tenei hei muru atu i te he o Hakopa; ko nga hua katoa ano enei hei whakakahore i tona hara; ina meinga e ia nga kohatu katoa o te aata kia rite ki nga kohatu taioma, kurukuru rawa, e kore nga ngahere me nga whakapakoko e ara ki runga.
- 10
- Otiia ka mokemoke te pa taiepa, ka mahue te kāinga, ka waiho hei koraha: kai ana te kuao kau i reira, takoto ana i reira, pau ake i a ia ona manga.
- 11
- Ka maroke ona peka, ka whatiia atu: ka haere mai nga wahine, tahuna ana e ratou ki te ahi; ehara hoki ia i te iwi e whai mahara ana: no reira e kore ratou e tohungia e to ratou kai hanga, e kore ano to ratou kai whakaahua e aroha ki a ratou.
- 12
- I taua rangi ano ka taia nga hua e Ihowa i te takere o te awa, a tae noa ki te awa o Ihipa, ka kohikohia ano hoki koutou, e nga tamariki a Iharaira, he mea taki kotahi nei.
- 13
- I taua rangi ano ka whakatangihia te tētere nui, a ka haere mai te hunga i tata te ngaro i te whenua o Ahiria, me te hunga i te whenua o Ihipa i peia atu, a ka koropiko ratou ki a Ihowa ki te maunga tapu ki Hiruharama.
Address: 
Phone: 
Email: