- 1
- Aue te he mo te karauna whakapehapeha, mo te hunga haurangi o Eperaima, rite tonu ki te puawai kua memenge tona ataahua whakakororia, tera i te wahi ki runga o te awaawa momona o te hunga kua hinga i te waina.
- 2
- Nana, he mea kaha, he mea pakari ta te Ariki nei, koia ano kei te awha whatu, kei te tupuhi e wawahi ana, kei te waipuke, he wai nui e ngawha atu ana, ka taea iho ano e tona ringa ki te whenua.
- 3
- Ka takahia e nga waewae te karauna whakapehapeha o te hunga haurangi o Eperaima.
- 4
- A he puawai kua memenge tona ataahua whakakororia i te wahi ki runga o te awaawa momona, tona rite kei te hua matamua i te mea kahore nei te raumati; te kitenga atu a te tangata i kitea ai, i te mea kei tona ringa nei ano, horomia ake e ia.
- 5
- I taua rangi ano ko Ihowa o nga mano hei karauna ataahua, hei potae whakakororia ki nga morehu o tona iwi.
- 6
- Hei wairua whakarite whakawa ki te tangata e noho ana ki te whakarite whakawa, hei kaha ano mo te hunga e whakahoki ana i te whawhai ki te kuwaha.
- 7
- Kua pohehe ano hoki enei i te waina, na te wai kaha ratou i kotiti ke ai; te tohunga, te poropiti, pohehe ana raua i te wai kaha, horomia ana rawa e te waina, kotiti ke ana i te wai kaha, he titiro hē ta raua, e nekeneke ana ta raua whakarite whakawa.
- 8
- Ki tonu hoki nga tepu katoa i te ruaki, i te paru, kahore he wahi ma.
- 9
- Ko wai e whakaakona e ia ki te matauranga? ko wai e meinga e ia kia mohio ki te kupu? ko te hunga kua whakamutua ta ratou kai waiu, kua tangohia mai i nga u.
- 10
- He whakahau nei hoki tenei i runga i te whakahau, he whakahau i runga i te whakahau, he ako i runga i te ako, he ako i runga i te ako; tenei wahi iti, tenei wahi iti.
- 11
- He nanunanu hoki te ngutu, e rere ke ana te reo, e korero ai ia ki tenei iwi.
- 12
- I tana kianga atu ki a ratou, Ko te okiokinga tenei e meinga, ai e koutou nga mauiui kia okioki; ko te tānga manawa ano tenei: na, kihai ratou i pai ki te whakarongo mai.
- 13
- Na, ta Ihowa kupu ki a ratou he whakahau i runga i te whakahau, he whakahau i runga i te whakahau; he ako i runga i te ako, he ako i runga i te ako; tenei wahi iti, tera wahi iti: te tukunga iho ka haere atu ratou, ka hinga ki muri, ka wawahia, ka mahangatia, ka, mau.
- 14
- Mo reira whakarongo mai ki te kupu a Ihowa, e te hunga whakahi, e nga rangatira o tenei iwi i Hiruharama.
- 15
- Na, kua mea na koutou, Kua whakarite kawenata matou ki te mate; kua rite nga ritenga a te reinga i a matou; te whiu i rite nei ki te waipuke, ki te tika atu i waenga, ekore e tae mai ki a matou; no te mea kua oti te teka te mea e matou hei whakawhirinakitanga, ka piri ano matou ki roto ki te horihori.
- 16
- Na, ko te kupu tenei a te Ariki a Ihowa, Nana, tenei ahau te whakatakoto nei i te kohatu ki Hiona hei turanga, he kohatu kua oti te whakamatautau, mo te kokonga, he mea utu nui, he turanga u: te tangata, e whakapono ana e kore e potatutatu.
- 17
- Ka whakatakotoria ano hoki e ahau te tikanga o te whakawa, mea rawa ki te aho, me te tika ano, paramu rawa: a ka tahia atu te whakawhirinakitanga teka e te whatu, ka huri ano hoki nga wai ki runga ki te piringa.
- 18
- Ka whakatakā ano hoki ta koutou kawenata ki te mate; e kore ano e tu ta koutou i whakarite ai ki te reinga; te whiu i rite nei ki te waipuke, ki te tika atu i waenga, ka waiho koutou hei takahanga mana.
- 19
- I te wa e haere atu ai taua whiu, ka riro koutou i a ia: ka haere atu hoki i tenei ata, i tenei ata, i te ao, i te po, a hei pouritanga ngakau te mohiotanga kautanga ki te kupu.
- 20
- He poto hoki te moenga, e kore e wharoro te tangata, he ririki te hipoki, e kore e taea te roropi mai.
- 21
- No te mea ka rite ki tera i Maunga Peratimi to Ihowa whakatikanga ake, kei tera i te raorao i Kipeono te rite o tana riri, he meatanga i tana mea, i tana mea e rere ke nei, he mahinga i tana mahi, i tana mahi rere ke nei.
- 22
- Na, kati ra ta koutou whakahi, kei whakaukia o koutou here: kua rongo nei hoki ahau ki te Ariki ki a Ihowa o nga mano ki te whakaotinga, ki te mea i whakaritea mo te whenua katoa.
- 23
- Kia whai taringa mai koutou, whakarongo hoki ki toku reo; mahara mai, whakarongo mai ki taku korero.
- 24
- Ta te kai parau koia i nga ra katoa he parau, whakato tonu iho? he whakatuwhera tonu ranei tana, he wawahi i nga pokurukuru o tona oneone?
- 25
- Ka oti i a ia to mate o taua mara te mea kia rite, e kore ianei ia e maka atu i te pi, e whakato i te kumine, e rui i te witi i te mea nui rawa, i te parei i whakaritea, me to rai ano, ki te wahi mo tetahi, mo tetahi?
- 26
- Ko tona Atua hoki hei whakaako i a ia ki te tikanga pai, hei tohutohu ano i a ia.
- 27
- E kore hoki nga pi e patua ki te koneke, e kore ano te wira kāta e hurihia ki runga ki te kumine; engari e patua ana nga pi ki te rakau, nga kumine ano hoki ki te patupatu.
- 28
- Te witi hei taro e kurua ana, e kore hoki e patua tonutia e ia, e wahia, ranei ki te wira o tana kāta e tukia ranei e ana tangata hoiho kia ririki.
- 29
- E puta mai ana hoki tenei i a Ihowa, o nga mano, he mea whakamiharo nei ana whakaaro, he nui ano ana tikanga.
Address: 
Phone: 
Email: