- 1
- No te mea tenei te Ariki, a Ihowa o nga mano te whakakahore atu nei i te titoko, i te tokotoko o Hiruharama, o Hura, i te titoko taro katoa, i te tokotoko wai katoa,
- 2
- I te marohirohi, i te tangata mo te pakanga, i te kai whakarite whakawa, i te poropiti, i te tohunga, i te kaumatua,
- 3
- I te rangatira rima tekau, i te tangata nui, i te kai whakatakoto whakaaro, i te kai mahi mohio, i te mea matau ki te taki.
- 4
- Ka hoatu ano e ahau nga tamariki hei rangatira mo ratou, ko nga kohungahunga ano hei kingi mo ratou.
- 5
- Ka tukinotia ano hoki te iwi, tetahi tangata e tetahi tangata, te tangata e tona hoa tata ano; ka whakahihi ano hoki te tamariki ki te kaumatua ka anga mai ano te mea e whakahaweatia ana ki te tangata e whakahonoretia ana.
- 6
- E mau hoki te tangata ki tona tuakana, o te whare ano o tona pāpā, a ka mea, He kakahu tou; hei rangatira koe mo matou, a hei raro ano i tou ringa tenei whakatakanga.
- 7
- I taua rangi ano ka karanga nui ia, ka mea, E kore ahau e waiho hei kai takai; kahore hoki he taro i toku whare, kahore he kakahu: kaua ahau e meinga hei rangatira mo te iwi.
- 8
- Kua taka hoki a Hiruharama, kua hinga a Hura; kua whawhai nei hoki to ratou arero, me a ratou mahi, ki a Ihowa, whakapataritari ai i nga kanohi o tona kororia.
- 9
- Ko te titiro mai hoki a o ratou kanohi hei kai whakaatu mo to ratou he; e whakapuaki ana ano ratou i to ratou hara, e pera ana me Horoma, kahore e hunā e ratou. Aue, te mate mo o ratou wairua! ta ratou utu hoki ki a ratou ano, ko te kino.
- 10
- Mea atu ki te tangata tika, Ko te pai mona; ka kainga hoki e ratou nga hua o a ratou mahi.
- 11
- Aue te mate mo te tangata kino, ko te he mona: ka riro hoki i a ia te utu o ta ona ringa.
- 12
- Toku iwi, o ratou kai tukino ko nga tamariki, ko nga wahine ano hoki hei kingi mo ratou. E toku iwi, ko ou kai arahi hei whakapohehe i a koe; kore ake i a ratou te tikanga o o huarahi.
- 13
- Kua whakatika ake a Ihowa ki te totohe, kua tu ki te whakawa i nga iwi.
- 14
- Ka timata ta Ihowa whakawa i nga kaumatua o tona iwi, i ona rangatira ano hoki; kua pau hoki i a koutou te mara waina, kei roto i o koutou whare nga mea i pahuatia atu i nga rawa-kore.
- 15
- He aha koutou i kuru ai i toku iwi?—nga kanohi o nga rawa-kore, me te mea kua hurihia e koutou ki te huri, e ai ta te Ariki, ta Ihowa o nga mano.
- 16
- I ki mai ano a Ihowa, Na, kua whakapehapeha nei nga tamahine o Hiona, maro tonu te kaki ina haere, takataka ana nga karu, ririki rawa nga hikoi, tatangi ana nga waewae:
- 17
- Mo reira ka whakangaua e te Ariki ki te patito te tumuaki o nga tamahine o Hiona, ka takoto kau ano hoki i a Ihowa o ratou wahi ngaro.
- 18
- I taua rangi ano ka whakakahoretia e te Ariki te ataahua o nga mea tatangi o nga waewae, o nga whakapaipai ripekapeka, o nga mea ano e rite ana ki te marama.
- 19
- Nga mekameka, nga poroporo, me nga arai kanohi,
- 20
- Nga potae, nga whakapaipai o nga waewae, nga whitiki, nga pounamu hongihongi, me nga whakakai,
- 21
- Nga mowhiti, nga whakapaipai o te ihu,
- 22
- Nga kakahu whakapaipai, nga koroka, nga kakahu o waho ake, me nga pukoro,
- 23
- Nga whakaata, me te rinena pai, nga potae, me nga arai whakapaipai.
- 24
- Na, he kakara pai i mua, puta ake ana he piro; kahore he whitiki, he tawhetawhe kau; kahore he mahunga hanga pai, he pakira kau; kahore he tatua whakapaipai, he kakahu taratara kau i whitikiria mai; he weranga, kahore hoki he ataahua.
- 25
- Ka hinga o tangata i te hoari, ou marohirohi i te whawhaitanga.
- 26
- Ka tangi, ka aue ona kuwaha, a ka noho mokemoke ia ki te whenua.
Address: 
Phone: 
Email: