- 1
- Aue te mate mo nga tamariki whakakeke, e ai ta Ihowa, e hanga whakaaro nei, otiia ehara i te mea naku, e hipoki nei i te hipoki, ehara ia i te mea na toku wairua, he mea kia taparua iho ai e ratou he hara ki runga ki te hara:
- 2
- Kua riro atu nei, kua haere ki raro ki Ihipa, kahore hoki e ui tikanga ki toku mangai; hei kaha hoki mo ratou te kaha o Parao, a e mea ana kia whakawhirinaki atu ki te taumarumarunga iho o Ihipa.
- 3
- Mo reira hei mea whakama ki a koutou te kaha o Parao, hei mea ano e numinumi ai koutou te whakawhirinakitanga ki te taumarumarunga iho o Ihipa.
- 4
- I Toana hoki ana rangatira, i tae mai ano ana karere ki Hanehe.
- 5
- Whakama katoa ratou ki te iwi kahore nei a ratou pai mo ratou, kahore he awhina mai, kahore he pai; engari he whakama, he ingoa kino.
- 6
- Te poropititanga mo nga kararehe o te tonga i te whenua o te raruraru, o te ngakau mamae, no reira nei te kuao raiona me te raiona katua, te waipera, me te nakahi tua-ahi nei e rere ana, ka kawea atu e ratou o ratou rawa i runga i nga pokohiwi o nga kuao kaihe, o ratou taonga ano hoki i runga i nga puku o nga kamera ki te iwi kahore nei a ratou pai mo ratou.
- 7
- Na, ta Ihipa awhina he horihori, he kore noa iho; no reira taku karanga nei mo tenei, Te kaha mo ratou ko te noho.
- 8
- Na, haere, tuhituhia ki te papa ki to ratou aroaro, taia iho hoki ki te pukapuka; me waiho ano tena i nga rangi i muri hei kai whakaatu, a ake ake ake.
- 9
- No te mea he tutu tenei iwi, he tamariki korero teka, he tamariki e kore e pai ki te whakarongo ki te ture a Ihowa:
- 10
- Ta ratou nei kupu ki nga matakite, Kaua e kite; ki nga poropiti ano hoki, Kaua e poropititia mai ki a matou nga mea tika; kia ngawari a koutou korero ki a matou, hei nga mea tinihanga he poropititanga ma koutou:
- 11
- Peka atu i te ara, whakarerea te huarahi, kati ta te Mea Tapu o Iharaira te mea mai ki to matou aroaro.
- 12
- Na, ko te kupu tenei a te Mea Tapu o Iharaira, Kua paopao na koutou ki tenei kupu, kua okioki ano ki te tukino, ki te whanoke, u tonu atu ki reira:
- 13
- Na, te tukunga iho o tenei he ki a koutou ka rite ki te pakaru o te taiepa tiketike, meake nei hinga, he mea kua puku, kitea rawatia ake kua puta whakarere tona pakaru.
- 14
- Ka wahia ano hoki e ia; tona rite kei te oko a te kai hanga rihi e wahia ana, mongamonga noa; e kore e tohungia, e kore ano e kitea he maramara, i a ia ka pakaru nei hei tango ahi mai i roto i nga ngarahu, hei utu wai ake ranei i te poka.
- 15
- Ko te kupu hoki tenei a te Ariki, a Ihowa, a te Mea Tapu o Iharaira, Ma te tahuri, ma te humarie ka ora ai koutou; kei te ata noho, kei te whakawirinaki he kaha mo koutou; heoi kihai koutou i pai.
- 16
- Na kei te mea mai koutou, Kahore, engari me rere matou i runga i nga hoiho: mo reira ka rere ano koutou: Ka eke ano matou ki runga ki te mea tere; mo reira ka tere ano te hunga e whai ana i a koutou.
- 17
- Te mano kotahi ka rere i te riri a te tangata kotahi; ka rere koutou i te riri a te tokorima; a ka mahue koutou ano he pou kara i runga i te tihi o te maunga, ano he kara i runga i te pukepuke.
- 18
- Na konei ano a Ihowa i tatari ai, he mea kia atawhaitia ai koutou e ia, na konei ano ia i whakanekehia ake ai, kia tohungia ai koutou e ia: he Atua whakarite whakawa hoki a Ihowa, ka hari te hunga katoa e tatari ana ki a ia.
- 19
- Tera hoki te iwi e noho ki Hiona, ki Hiruharama, mutu ake te tangi: ka nui tona aroha ki a koe, ki tou reo e tangi ana; ka rongo ia ki a koe, ka whakao mai ia ki a koe.
- 20
- Ahakoa i homai e te Ariki hei taro ma koutou ko te ngakau mamae, a hei wai ko te tukinotanga, e kore ano ou kai whakaako e riro ki nga kokonga; engari ka kite ou kanohi i ou kai whakaako.
- 21
- Ka rongo ano hoki ou taringa i te kupu i muri i a koe e mea ana, Ko te ara tenei. Na konei atu, ina tahuri atu koutou ki matau, ina tahuri ki maui.
- 22
- Ka whakapokea ano hoki e koutou te kopaki o o whakapakoko hiriwa, me te whakapaipai ano o o whakapakoko koura whakarewa: ka rukerukea atu e koe, ano he kakahu i te toto paheke, ka mea atu koe ki taua mea, Haere atu.
- 23
- A ka homai e ia he ua ki to purapura, e whakatokia e koe ki te oneone, he taro ano, he hua no te oneone, a ka whai ngako ka nui taua mea: i taua rangi ano he nui nga parae e kai ai o kararehe.
- 24
- A, nga kau, me nga kuao kaihe e mahi ana i te oneone, ka kai i te kai pai, he mea i whakarererea ki te koko, ki te whakarerere witi.
- 25
- A, i runga i nga maunga tiketike katoa, i nga pukepuke ikeike katoa, ka rere nga awa me nga manga wai i te ra o te parekura nui, ina hinga nga pourewa.
- 26
- Te māramatanga ano hoki o te marama ka rite ki te māramatanga o te ra, te māramatanga ano o te ra, e whitu ona whakanekehanga ake, ka rite ki te māramatanga o nga rangi e whitu, i te rangi e takaia ai e Ihowa te pakaru o tona iwi, ina rongoatia e ia te patunga i patua ai ratou.
- 27
- Nana, kei te haere mai te ingoa o Ihowa i tawhiti, ka tonu tana riri, he taimaha te pikaunga; ki tonu ona ngutu i te riri, tona arero koia ano kei te ahi e kai ana:
- 28
- Tona manawa, ano he awa e ngawhā ana, to nga kaki; nga iwi, tātari rawa, ko te horihori hei tātari: nga kaue ano hoki o nga iwi mea rawa ki te paraire, hei whakapohehe i a ratou.
- 29
- Ka waiata koutou, me te mea ko te po e mahia ai te hakari tapu, ka koa te ngakau, ano ko tetahi tangata e haere ana me tana putorino, a e haere ana ki te maunga o Ihowa, ki te Kamaka a Iharaira.
- 30
- Ka meinga ano e Ihowa kia rangona tona reo kororia, kia kitea te tatutanga iho o tona ringa, te whakatakariri i a ia e riri ana, te mura o te ahi e kai ana, te titaritari, te tupuhi, me te whatu tuakohatu nei.
- 31
- Ma to reo hoki o Ihowa ka pakaru ai te Ahiriana i whiu nei ki te rakau.
- 32
- Na, i nga wahi katoa e tika atu ai te tokotoko i whakaritea, ta Ihowa hoki e mea ai kia u atu ki a ia, ko nga timipera, ko nga hāpa: he whawhai whakangaueue hoki tana whawhai atu ki a ratou.
- 33
- No mua iho hoki a Topete i whakaritea ai; ae ra kua rite mo te kingi; kua oti te whakahohonu, te whakanui: tona puranga he ahi, he wahie, he nui, ko te manawa o Ihowa, ano he awa whanariki, hei whakangiha.
Address: 
Phone: 
Email: