Isaiah Chapter 33 - Paipera Tapu 1868 | Te Paipera Tapu 1868

Isaiah Chapter 33 - Paipera Tapu 1868

1
Aue te mate mou e pahua nei, kihai ano hoki koe i pahuatia; e tinihanga nei, a kihai ano koe i tinihangatia! ka mutu to pahua, ka pahuatia ano koe: ka mutu to tinihanga, ka tinihangatia koe.
2
Kia atawhai mai, e Ihowa, ki a matou; kua tatari nei matou ki a koe: ko koe hei ringaringa mo ratou i tenei ata, i tenei ata, hei whakaoranga ano hoki mo matou i nga wa o te raru.
3
Te rongonga i te ngangau whati ana nga iwi: tou aranga ki runga marara ana nga iwi.
4
Te kohikohinga o o koutou taonga ano he moka e kohi ana: ka rite ki te rererere o te mawhitiwhiti tana kokirihanga atu ki a ratou.
5
Ka whakanuia a Ihowa; kei runga nei hoki tona nohoanga: kua oti a Hiona te whakaki e ia ki te whakarite whakawa, ki te tika.
6
Ko te whakaaro nui, ko te matauranga, hei whakau mo nga wa i a koe, hei whakaoranga kaha; ko te wehi ano ki a Ihowa hei taonga mona.
7
Nana, ka tangi o ratou maia i waho; nga karere hohou rongo, tiwerawera ana te tangi.
8
Kua ururuatia nga ara, kua kore te ara e haerea: kua whakapaheketia e ia te kawenata, whakahaweatia iho e ia nga pa, kihai te tangata i whakaarohia e ia.
9
E tangi ana te whenua, ngohe noa iho, kua whakama a Repanona, kua oti te tua; a Harono rite tonu ki te koraha, nga hua o Pahana, o Karamere, ruirui rawa.
10
Katahi ahau ka whakatika, e ai ta Ihowa, katahi ahau ka whakanuia, katahi ahau ka neke ake.
11
Ta koutou hapu he papapa, whanau ake he kakau witi; to koutou manawa, ka rite ki te ahi, ka kai i a koutou.
12
Ka rite ano nga iwi ki nga tahunga kotakota, ka tahuna ki te ahi ano he tataramoa kua oti te tapatapahi.
13
Whakarongo mai, e koutou o tawhiti, ki taku i mea ai; e te hunga e tata ana, kia mohio mai koutou ki toku kaha.
14
Pawera noa iho nga tangata hara i Hiona, mau pu te hunga ngutu kau i te wehi. Ko wai o tatou e noho ki te ahi e kai ana? ko wai e noho ki nga tahunga e kore nei e mutu.
15
Te tangata e haere ana i runga i te tika, a e tika ana ana korero, e whakahawea ana ki nga taonga o te tukino, e rukerukea ana e tona ringa te utu whakapati, a e kore e puritia e ia; e purua ana ona taringa kei rangona he korero toto, e whakamoe ana i ona kanohi kei kite i te kino;
16
Te nohoanga mo tera kei runga rawa, tona piringa he pa teko; ka homai he taro mana, ka pumau te wai mona.
17
Ka kite ou kanohi i te kingi, he mea ataahua tonu, ka matakitaki ano ki te whenua tawhiti.
18
Ka whakaaroaroa te wehi e tou ngakau, Kei hea te kai tuhituhi? Kei hea te kai pauna? Kei hea te kai tatau o nga pourewa?
19
E kore koe e kite i te iwi rupahu, tona reo nei he pakeke, tē rangona e koe; he nanunanu nei te arero, e kore e matauria.
20
Titiro atu ki Hiona ki te pa o a tatou hakari: ka kitea e ou kanohi a Hiruharama te nohoanga humarie, te tapenakara e kore e pakaru; e kore tetahi o ona titi e nekehia atu, a ake ake ake, e kore ano tetahi o ona taura e motu.
21
Engari ko te Nui rawa ko Ihowa hei wahi awa mo tatou ki reira, hei awa nui; e kore ano te kaipuke e hoea ana, e kore ano hoki te kaipuke nui e tika na reira.
22
No te mea ko Ihowa to tatou kai whakarite whakawa, ko Ihowa to tatou kai whakatakoto tikanga, ko Ihowa to tatou kingi, mana tatou e whakaora.
23
Kua tangoro kau ou puwhenua, tē taea te turanga o to ratou rewa te whakau, tē taea te ra te whewhera: na, nui atu te taonga parakete e wehewehea ana, pahuatia ana nga taonga pārau e nga totitoti.
24
Kahore hoki he kianga ake a te tangata whenua, He mate toku; te iwi e noho ana i reira, ka murua to ratou he.