- 1
- Na, te rongonga o Kingi Hetekia, haea ana e ia ona kakahu, kei te hipoki i a ia ki te kakahu taratara, a haere ana ki te whare o Ihowa.
- 2
- I tonoa ano hoki e ia a Eriakimi rangatira o te whare, ratou ko Hepena kai tuhituhi, ko nga kaumatua o nga tohunga, he mea hipoki ki te kakahu taratara, ki a Ihaia poropiti tama a Amoho.
- 3
- Na, ko ta ratou kianga mai ki a ia, Ko te kupu tenei a Hetekia, Tenei ra, he ra no te he, no te whakatuma, no te kohukohunga; kua taea hoki te whanautanga o nga tamariki, heoi kahore he kaha e whanau ai.
- 4
- Tera pea a Ihowa tou Atua ka rongo ki nga kupu a Rapahake i tonoa mai nei e tona ariki e te kingi o Ahiria hei whakorekore ki te Atua ora; a ka riri mai ki nga kupu i rongo ai a Ihowa tou Atua. Na, kia ara to inoi mo nga toenga e rokohanga iho.
- 5
- Te haerenga atu o nga tangata a Kingi Hetekia ki a Ihaia,
- 6
- Ka mea a Ihaia ki a ratou, Kia penei ta koutou ki atu ki to koutou ariki, Ko te kupu tenei a Ihowa, Kaua e wehi i nga kupu i rongo ra koe, ki era i kohukohu mai ra nga tangata o te kingi o Ahiria ki a au.
- 7
- Na, ka tonoa atu e ahau he wairua ki a ia, a ka rongo ia i tetahi rongo, ka hoki ki tona whenua; ka meinga ano hoki ia e ahau kia hinga i te hoari i tona whenua.
- 8
- Na, hoki ana a Rapahake, a rokohanga atu e ia e whawhai ana te kingi o Ahiria ki Ripina: i rongo hoki ia kua hapainga mai e ia i Rakihi.
- 9
- A, tona rongonga ki a Tirihaka kingi o Etiopia, ki te korero, Kei te haere mai ia ki te whawhai ki a koe, tona rongonga ka tono tangata ano hoki ia ki a Hetekia, ka ki atu,
- 10
- Kia penei ta koutou ki atu ki a Hetekia kingi o Hura, mea atu, Kei tinihangatia koe e tou Atua, e tau e okioki atu na koe, i a ia e ki ra, E kore a Hiruharama e hoatu ki te ringa o te kingi o Ahiria.
- 11
- Nana, kua rongo na koe ki ta nga kingi o Ahiria i mea ai ki nga whenua katoa, ki ta ratou hunanga rawatanga i a ratou: a, e whakaorangia ranei koe?
- 12
- Nga atua o nga tauiwi i hunā e oku mātua, i whakaora ranei ratou i a ratou, i Kotana, i Harana, i Retepe, me nga tamariki ano o Erene, era i Terahara?
- 13
- Kei hea te kingi o Hamata, te kingi o Arapara, te kingi o te pa o Heperawaimi, o Hena, o Iwi?
- 14
- Te tangohanga mai a Hetekia i te pukapuka i roto i nga ringa o nga karere, korerotia ana e ia. Na, haere ana a Hetekia ki runga ki te whare o Ihowa, wherahia ana e ia ki te aroaro o Ihowa.
- 15
- Na, ko te inoinga atu a Hetekia ki a Ihowa; i mea ia,
- 16
- E Ihowa o nga mano, Atua o Iharaira, e noho na i waenganui o nga kerupima, ko koe te Atua, ko koe anake, o nga kingitanga katoa o te whenua; nau i hanga te rangi me te whenua.
- 17
- Tahuri mai tou taringa, e Ihowa, whakarongo mai. Titiro mai ou kanohi e Ihowa, kia kite koe, kia rongo ki nga kupu katoa a Henakeripi, ki tana i tono mai ai hei whakorekore mo te Atua ora.
- 18
- E tika ana ano, e Ihowa, kua kore i nga kingi o Ahiria nga iwi katoa, me o ratou whenua,
- 19
- Kua tukua ano hoki e ratou o ratou atua ki te ahi; no te mea ehara ratou i te atua; engari he mahi na te ringa tangata, he rakau, he kohatu; koia i hunā ai e ratou.
- 20
- Tena ra, whakaorangia matou aianei, e Ihowa, e to matou Atua, i roto i tona ringa, kia mohio ai nga kingitanga katoa o te whenua ko koe a Ihowa, ko koe anake.
- 21
- Katahi a Ihaia tama a Amoho ka tono tangata mai ki a Hetekia, hei mea mai, Ko te kupu tenei a Ihowa Atua o Iharaira, Tau i inoi mai na koe ki au mo Henakeripi kingi o Ahiria;
- 22
- Ko ta Ihowa kupu tenei i korero ai mona, Kua whakahawea te tamahine wahina a Hiona ki a koe; kataina iho koe e ia; oioi ana te mahunga o te tamahine a Hiruharama ki a koe.
- 23
- Ko wai tau i whakorekore ra, i kohukohu ra? ki a wai tou reo i whakarahia ra, tou kanohi i kake ra ki runga?—ki te Mea Tapu o Iharaira.
- 24
- Meatia ana e koe o karere hei whakorekore mo te Ariki; e mea mai na koe, Kua kake ahau, me aku tini hariata, ki runga ki nga wahi tiketike o nga maunga, ki nga taha o Repanona; ka tuakina ano e ahau nga hita roroa o reira, me o reira kauri papai: ka tae ano ahau ki te wahi tiketike o tona wahi whakamutunga mai, ki te ngahere o tona Karamere.
- 25
- Keria ana e ahau, inu wai ana ahau, maroke ake i te kapu o toku waewae nga awa katoa o nga wahi e whakapaea ana.
- 26
- Kahore ranei koe i rongo i mua noa atu, naku tena i mea, i nga ra o namata naku tena i hanga? Katahi nei ka whakaputaina atu e ahau, a ka waiho na koe hei mea i nga pa taiepa hei puranga rukerukenga.
- 27
- Koia i iti ai te kaha o o reira tangata; wehi ana ratou, porahurahu kau ana; rite tonu ratou ki te tarutaru o te parae, ki te otaota matomato, ki te taru i runga i nga tuanui, ki te witi i ngingio i te mea kiano i tupu noa.
- 28
- Na, tou nohoanga iho, tou haerenga atu, tou haerenga mai mātau tonu i a au, me to nananga ano hoki ki a au.
- 29
- Na kua tae ake nei ki oku taringa to nananga ki a au, me to riri; mo reira ka kuhua e ahau taku matau ki tou ihu, taku paraire ki ou ngutu; a ka whakahokia koe na te ara i haere mai na koe.
- 30
- A, ko te tohu tenei ki a koe, I tenei tau ka kai koutou i nga mea tupu noa ake, a, i te rua o nga tau ko nga tupu noa ake o te tau; na, hei te toru o nga tau koutou whakato ai, kokoti ai, whakato ai i nga mara waina, kai ai i nga hua o aua mara.
- 31
- Na, tera e hou ano hoki whakararo nga pakiaka o nga oranga i mawhiti o te whare o Hura, ka hua ano hoki nga hua whakarunga.
- 32
- No te mea tera e puta ake he toenga i Hiruharama, nga oranga i Maunga Hiona. E taea tenei e te ngakau nui o Ihowa o nga mano.
- 33
- Na, ko ta Ihowa kupu tenei mo te kingi o Ahiria, E kore ia e haere mai ki tenei pa, e kore ano hoki e perea mai he pere e ia ki konei, e kore ano e maua mai e ia he whakangungu rakau ki mua i tenei pa, e opehia ranei he puke hei whawhaitanga ki konei.
- 34
- Te ara i haere mai ai ia, ka hoki ia ma reira: e kore ano ia e tae mai ki tenei pa, e ai ta Ihowa.
- 35
- Ka tiakina hoki e ahau tenei pa, ka whakaorangia; he whakaaro ki a au, ki taku pononga ano hoki ki a Rawiri.
- 36
- Katahi ka puta atu te anahera a Ihowa, a, patua iho e ia i te puni o nga Ahiriana kotahi rau e waru tekau ma rima nga mano: a, te marangatanga ake i te ata, nana, o ratou tinana! he tupapaku katoa ratou.
- 37
- Na, turia atu ana e Henakeripi kingi o Ahiria, haere ana, hoki ana, noho rawa atu kei Ninewe.
- 38
- A, i a ia e koropiko ana i roto i te whare o tona atua, o Nitiroko, patua iho ia e ana tama, e Ararameke raua ko Haretere, ki te hoari; mawhiti tonu atu raua ki te whenua o Ararata, a, ko Etaraharona ko tana tama te kingi i muri i a ia.
Address: 
Phone: 
Email: