Isaiah Chapter 41 - Paipera Tapu 1868 | Te Paipera Tapu 1868

Isaiah Chapter 41 - Paipera Tapu 1868

1
Whakarongoa i toku aroaro, e nga motu; kia puta ke ano hoki he kaha mo nga iwi: me neke mai ratou; ko reira ratou korero ai: tatou tahi me whakatata ki te whakarite whakawa.
2
Na wai te tangata tika i whakaara mai i te rawhiti? na wai ia i karanga ki tona waewae? homai ana e ia nga iwi ki tona aroaro, meinga ana ia e ia hei rangatira mo nga kingi, homai ana ratou e ia ano he puehu ki tana hoari, ano he kakau witi e aia ana, ki tana kopere.
3
Whaia ana ratou e ia, whiti ora mai ana ia i te ara kihai nei i haerea e ona waewae.
4
Ko wai te kai mahi o tenei? ko wai te kai whakaoti? ko wai te kai karanga o nga whakatupuranga i te timatanga? ko ahau ko Ihowa, ko te timatanga, ko to te whakamutunga ano hoki; ko au ra.
5
I kite nga motu, a wehi ana, pawera noa iho nga pito o te whenua, whakatata mai ana, haere mai ana.
6
Uru ana ratou ki te mahi a tona hoa, a tona hoa, me ta ratou ki mai ano ki tona tuakana, ki tona teina, Kia maia.
7
Na, kei te whakatenatena te kamura i te kai tahu koura, te kai whakamaenene ki te hama i te tangata e patu ana ki te paepae, tana kupu,— Me whakapiri, kua pai; na, whakaukia ana e ia ki nga whao, tē taea te whakanekeneke.
8
Ko taku pononga ia koe, e Iharaira, ko Hakopa, ko taku i whiriwhiri ai, ko te uri o taku i aroha ai, o Aperahama;
9
Ko taku ano i tango mai ai i nga pito o te whenua; he mea karanga nei hoki koe naku i roto i ona metararahi, taku kupu hoki ki a koe, Ko koe taku pononga; he mea whiriwhiri koe naku, kahore aku whakorekore ki a koe.
10
Kaua e wehi; kei a koe nei hoki ahau; kaua ano e tirotiro; ko au nei hoki tou Atua: maku koe e whakakaha, ae ra, maku koe e awhina atu, ka tautokona ake ano hoki koe e te ringa matau o toku tika.
11
Nana, ka whakama, ka numinumi kau te hunga katoa e riri ana ki a koe: ka rite ratou ki te kahore; ka ngaro te hunga e ngangare ana ki a koe.
12
Ka rapua ratou, ou hoa riri, e koe, a e kore e kitea; te hunga i whawhai ki a koe ka rite ki te kahore, ki te moti noa iho.
13
No te mea ko ahau ko Ihowa ko tou Atua kei te pupuri i tou ringaringa matau, kei te mea atu nei ki a koe, Kaua e wehi; ko ahau hei whakauru mou.
14
Kaua e wehi, e te kutukutu, e Hakopa, e nga tangata o Iharaira; maku koe e awhina, e ai ta Ihowa, ta tou kai hoko, ta te Mea Tapu o Iharaira.
15
Nana, kua meinga koe e ahau hei patu witi, koi tonu, hou tonu, he niho nei ona: ka patua e koe nga maunga, a ngotangota noa, nga pukepuke ka meinga e koe kia rite ki te papapa.
16
Rererere ana ratou i a koe, kahakina tonutia atu e te hau, titaritaria ake ratou e te paroro: ko koe ia ka hari ki a Ihowa, ka whakamanamana ano ki te Mea Tapu o Iharaira.
17
Nga ware, nga rawa-kore, kei te rapu wai ratou, a kahore kau, hē ake o ratou arero i te mate-wai: ka whakarongo ahau a Ihowa ki ta ratou; e kore ahau te Atua o Iharaira e whakarere i a ratou.
18
Ka whakapuaretia e au he awa ki runga ki nga wahi tiketike, he puna wai i waenganui i nga raorao; ka meinga e ahau te koraha hei harotoroto wai, me te whenua maroke hei pūpūtanga wai.
19
Ka whakawhiwhia e ahau te koraha ki te hita, ki te kohai, ki te ramarama, ki te rakau hinu; ka tu i a au te kauri ki te titohea, te rimu, ratou tahi ano ko te ake.
20
Kia kite ai ratou, kia mohio ai, kia mahara iho ai, kia matau ngatahi ai ratou, he mea mahi tenei na te ringa o Ihowa; na te Mea Tapu o Iharaira tenei i hanga.
21
Kawea mai ta koutou totohe, e ai ta Ihowa; whakaputaina mai a koutou kupu kaha, e ai ta te Kingi o Hakopa.
22
Kia whakaputaina mai e ratou, kia whakaaturia mai ano hoki ki a tatou nga mea meake pono mai: nga mea o te tuatahi, he pehea ranei, me whakaatu mai e ratou, kia maharatia iho ai e tatou, kia mohiotia ai o muri iho; kia korerotia mai ranei e ratou nga mea e puta mai a mua.
23
Whakaaturia nga mea e haere ake ana i muri, kia mohio ai matou he atua koutou: tena ra, mahia he pai, he kino ranei, kia matakitaki atu ai matou, kia kite ngatahi ai.
24
Nana, iti iho koutou i te kahore, ta koutou mahi ano hoki i te kore rawa, he mea whakarihariha te tangata nana koutou i whiriwhiri.
25
Kua oho mai i a au tetahi i te nota, ka haere mai ano ia: ka karanga ano ia ki toku ingoa i te rawhiti ra ano: tona taenga mai ki nga rangatira, me te mea he paru pokepoke ratou, ka rite ano ia ki te kai hanga rihi e takatakahi ana i te paru.
26
Na wai i whakaatu mai i te timatanga, kia mohio ai tatou? na wai i nga wa o namata, mo ta tatou ki ake, E tika ana ia? ae ra, kihai i whakaaturia e tetahi, ae ra, kihai i korerotia mai e tetahi, kihai ano hoki tetahi i rongo i ā koutou korero.
27
Ta te tuatahi kupu ki Hiona, Nana, tenei ratou: ka hoatu hoki e ahau ki Hiruharama he kai kawe i te rongo pai.
28
I titiro atu hoki ahau, a kahore he tangata; na i roto i enei katoa kahore he kai whakatakoto whakaaro hei whakahoki kupu mai i taku uinga atu ki a ratou.
29
Nana, ratou katoa he horihori kau; he kore noa iho ā ratou mahi: o ratou whakapakoko whakarewa he hau, he mea tikanga-kore.