Isaiah Chapter 45 - Paipera Tapu 1868 | Te Paipera Tapu 1868

Isaiah Chapter 45 - Paipera Tapu 1868

1
Ko te kupu tenei a Ihowa ki tana i whakawahi ai, ki a Hairuha, he mea pupuri nei naku tona ringa matau, kia pehia ai e ia nga iwi ki raro i a ia; maku ano e wewete to nga hope o nga kingi; nga tatau rererua whakapuaretia ake i tona aroaro; e kore ano nga kuwaha e tutakina.
2
Ko ahau e haere i mua i a koe, ki te whakatikatika i nga wahi kopikopiko: nga tatau parahi ka pakaru i a au; ka tapahia ano hoki e ahau nga tutaki rino.
3
Ka hoatu ano e ahau ki a koe nga taonga o te pouritanga, me nga mea huna o nga wahi ngaro, kia mohio ai koe ko ahau a Ihowa e whakahua atu nei i tou ingoa; ko te Atua o Iharaira.
4
He whakaarona naku ki taku pononga ki a Hakopa, ki a Iharaira ano hoki, ki taku i whiriwhiri ai, na reira koe, tou ingoa, i karangatia ai e ahau: whakahuatia ana e ahau tou ingoa i te mea kahore ano koe kia mohio ki a au.
5
Ko au a Ihowa, kahore atu hoki; kahore ke atu he atua, ko ahau anake: naku koe i whitiki, i te mea kihai koe i mohio ki a au:
6
Kia mohio ai te hunga i te rawhiti, me o te hauauru, kahore atu, ko ahau anake. Ko ahau a Ihowa, kahore atu hoki i tai atu.
7
Naku te māramatanga i whai ahua ai, naku i hanga te pouritanga; ko ahau te kai hohou rongo, te kai hanga ano o te kino: ko ahau, ko Ihowa te kai mahi o enei mea katoa.
8
Maturuturu iho, e nga rangi i runga; kia ringitia mai ano hoki he tika e nga kapua; kia puare te whenua, kia hua te whakaoranga, kia wana ngatahi ano hoki te tika; naku na Ihowa taua mea i hanga.
9
Aue te mate mo te tangata e totohe ana ki tona Kai whakaahua! Ma nga maramara-rihi te totohe ki nga maramara-rihi o te oneone. E mea ake ranei te paru ki tona kai whakaahua, He aha tau e mahi? e mea ranei tau i hanga ai, Kahore ona ringa?
10
Aue te mate mo te tangata e mea ana ki tona pāpā, He aha tau kua whanau nei? ki te wahine ranei, He tamaiti aha tau?
11
Ko te kupu tenei a Ihowa, a te Mea Tapu o Iharaira, a tona Kai whakaahua ano hoki, Uia mai ki a au nga meatanga ki aku tamariki, nga mea e puta mai a mua, whakahaua mai ahau ki te mahi a oku ringa.
12
Naku i mahi te whenua; nga tangata ano hoki o reira, naku i hanga: naku, na oku ringaringa i hora nga rangi; o ratou mano katoa he mea whakahau naku.
13
Naku ia i whakaara ake i runga ano i te tika, maku ano hoki e whakatikatika ona huarahi katoa: ko ia ano hei hanga mo toku pa, hei tuku i aku pārau kia haere, kahore ano hoki he utu, kahore he moni whakapati, e ai ta Ihowa o nga mano.
14
Ko te kupu tenei a Ihowa, Nga mauiui o Ihipa nga taonga hokohoko o Etiopia, o aua tangata roroa, o nga Tapeani, ka tae mai ki a koe, a ka riro i a koe; ka whai mai ratou i a koe; ka tae mekameka mai ratou, a ka piko iho ki a koe, ka tuā inoi ano hoki ki a koe, ka mea, He pono kei roto i a koe te Atua, kahore atu hoki, kahore he atua.
15
He pono he Atua koe e whakangaro ana i a koe, e te Atua o Iharaira, e te Kai whakaora.
16
Ka whakama, ae ra, ka numinumi kau ratou katoa; ka riro ngatahi atu ki te whakama nga kai mahi o nga whakapakoko.
17
A Iharaira, ka ora ratou i roto i a Ihowa, mau tonu to ratou whakaoranga. E kore koutou e whakama, e kore e numinumi, a, ake, ake, ake.
18
Ko te kupu hoki tenei a Ihowa, a te kai hanga o nga rangi, Nana na te Atua i whakawhaiahua te whenua, nana i mahi, nana i whakapumau, kihai i hangā tikangakoretia e ia; i whakawhaiahuatia ano e ia hei nohoanga. Ko ahau a Ihowa, kahore atu hoki.
19
Kihai ahau i korero i te wahi ngaro, i te wahi pouri o te whenua; kihai ahau i mea ki te uri o Hakopa, Rapua ahau, he mea noa iho. Taku korero, ta Ihowa, kei runga i te tika, e whakaaturia atu ana e ahau nga mea e rite ana.
20
Huihui koutou, haere mai, whakatata ngatahi mai koutou, e nga oranga o nga iwi: kahore he mohiotanga o te hunga e mau ana i te rakau o ta ratou whakapakoko, e inoi atu ana ki te atua e kore nei e whakaora.
21
Whakaaturia atu e koutou, kawea mai kia tata, kia whakatakoto whakaaro ngatahi ratou: na wai tenei i korero i mua riro, na wai i whakaatu i nga wa onamata? He teka ianei naku na Ihowa? Kahore atu hoki he atua, ko ahau anake; he Atua tika, he kai whakaora; kahore atu, ko ahau anake.
22
Tahuri mai ki a au, kia ora ai koutou, e nga pito katoa o te whenua: ko ahau hoki te Atua, kahore atu.
23
Kua waiho ahau e ahau ano hei oati; kua puta atu te kupu i toku mangai i runga i te tika, e kore ano e hoki mai, ara, ka tuturi nga turi katoa ki a au, ka oati mai ano hoki nga arero katoa.
24
Tera rawa te tangata ka ki ake, Kei a Ihowa he tika moku, he kaha; ka haere mai nga tangata ki a ia; ka whakama ano hoki te hunga e riri ana ki a ia.
25
Ma Ihowa ka tika ai, ka whakamanamana ai te uri katoa o Iharaira.