- 1
- Whakarongo mai e nga motu, ki a au; kia whai whakaaro mai, e nga iwi o tawhiti; na Ihowa ahau i karanga no te kopu mai ano; no nga whekau o toku whaea i whakahua ai ia i toku ingoa.
- 2
- A waiho iho e ia toku mangai hei hoari koi; hunā ana ahau e ia ki te taumarumarunga iho o tona ringa; a meinga ana ahau e ia hei pere kua oti te oro; kuhua ana ahau e ia ki tana papa pere.
- 3
- I mea ano ki a au, Ko koe taku pononga, e Iharaira, mau ka whakakororiatia ai ahau.
- 4
- Ko au i mea, Maumau mauiui noa ahau, he kore noa iho, he mea tekateka noa i whakapaua e ahau toku kaha; ra ia, kei a Ihowa he whakarite whakawa moku, kei taku Atua hoki taku mahi.
- 5
- Na, akuanei, e ai ta Ihowa, nana nei ahau i whakaahua i te kopu hei tangata mana, hei whakahoki mai i a Hakopa ki a ia, kia kohikohia ai a Iharaira ki a ia, a ka whakanuia ahau ki te aroaro o Ihowa, ko toku Atua hoki hei kaha moku.
- 6
- I mea hoki ia, He mea nohinohi kia waiho koe hei tangata maku, hei whakaara i nga iwi o Hakopa, hei whakahoki mai ano hoki i nga oranga o Iharaira: ka hoatu ano koe e ahau hei mārama ki nga tauiwi, kia ai koe hei whakaoranga maku, a puta noa i te pito o te ao.
- 7
- He penei te kupu a Ihowa, a te Kai hoko o Iharaira, a tona Mea Tapu hoki, ki a ia e whakahaweatia ana tona wairua, ki a ia e whakariharihangia ana e te iwi, ki te pononga o nga ariki; ka kite nga kingi, ka whakatika ano, ka koropiko hoki nga rangatira; he mea hoki na Ihowa, e pono ana hoki ia, na te Mea Tapu o Iharaira; nana hoki koe i whiriwhiri.
- 8
- He penei te kupu a Ihowa: No te ra manakohanga atu i whakao ai ahau ki a koe, no te ra whakaora hoki i awhinatia ai koe e ahau; maku ano koe e tiaki, ka hoatu ano koe e ahau hei kawenata mo te iwi, hei whakaara i te ao, hei mea kia nohoia nga kāinga tupu kua ururuatia.
- 9
- Hei mea ki nga herehere, Haere koutou; ki te hunga i te pouri, Puta mai koutou: ka kai ratou ki nga huarahi, ka ai hoki he wahi kai ma ratou ki nga pukepuke katoa.
- 10
- E kore ratou e mate-kai, e kore ano e mate-wai, e kore hoki te werawera, te ra ranei, e pakakinakina ki a ratou; ta te mea ko ia e aroha ana ki a ratou hei arahi i a ratou; mana hoki ratou e arahi ki nga puna wai.
- 11
- A ka waiho e ahau oku maunga katoa hei ara, ka whakateiteitia hoki oku huanui.
- 12
- Nana! ka haere mai enei i tawhiti; Titiro ra! ena hoki i te nota, i te taha hoki ki te hauauru, ena hoki i te whenua o Hinimi.
- 13
- Waiata, e nga rangi; kia hari hoki, e te whenua; kia pakaru mai ki waho ta koutou waiata, e nga maunga: ka whakamarie hoki a Ihowa i tona iwi, ka aroha hoki ki ona kua tukinotia nei.
- 14
- Otiia i mea a Hiona, Kua whakarerea ahau e Ihowa, kua wareware ahau i taku Ariki.
- 15
- Tera ranei e wareware i te wahine tana kohungahunga, a kore ake ona aroha ki te tamaiti a tona kopu? E wareware ano ratou: ko au nei, e kore au e wareware ki a koe.
- 16
- Nana! kua taia koe e ahau ki nga kapu o oku ringa; kei toku aroaro tonu ou taiepa.
- 17
- Ka hohoro o tamariki; ka haere atu i roto i a koe ou kai wawahi, ou kai whakamoti.
- 18
- Tahuri ake ou kanohi, a, karapoi noa, titiro atu hoki; ka huihui katoa ena, ka haere mai ki a koe. E ora ana ahau, e ai ta Ihowa, ina, ka kakahu koe i a ratou, ano he mea whakapaipai, ka herehere hoki i a ratou ki a koe, kei nga mea o te wahine marena hou te rite.
- 19
- Ta te mea hoki, akuanei kikī ai i te tini o nga tangata hei noho ou wahi ururua, ou wahi kua tuheatia, me te whenua hoki i huna ai koe; a ka matara atu ou kai whakamoti.
- 20
- O tamariki i whakakorea mau, tera ano ratou e mea ki o taringa, E kikī ana te wahi nei moku: whakawateatia atu, kia noho ai ahau.
- 21
- A, ka mea koe i roto i to ngakau, Na wai enei i whanau ai ki a au, he uri-kore nei hoki ahau, he moke, he pārau, he whati? na wai ra enei i whakatupu ake: Titiro ra, i waiho mokemoke ahau; enei, i hea ra enei?
- 22
- Ko te kupu tenei a te Ariki, a Ihowa, Nana! ka ara atu taku ringaringa ki nga tauiwi, ka tu hoki taku kara ki nga iwi: a ka maua mai e ratou o tamariki, awhi rawa ki o ratou uma, ka kawea mai hoki o tamahine ki runga i o ratou pokohiwi.
- 23
- A, hei matua atawhai mou nga kingi, ko o ratou kuini hoki hei kai whakangote mou: ka piko iho ratou ki a koe tapapa rawa ki te whenua, ka mitimiti hoki i te puehu o ou waewae; a, ka mohio koe ko ahau a Ihowa; e kore hoki te hunga e tatari mai ana ki a au e whakama.
- 24
- Tera ranei e tangohia nga taonga pārau i te tangata kaha, e whakaorangia ranei te tangata kua tika nei tona hereherenga?
- 25
- Na, ko te kupu tenei a Ihowa, Ina, ka tangohia mai nga herehere a te tangata kaha, ka whakahokia mai ano nga taonga pārau o te nanakia: ka ngangare ano hoki ahau ki te tangata e ngangare ana ki a koe, ka whakaora hoki i o tamariki.
- 26
- A ka whangaia atu e ahau to ratou kikokiko ano ma o kai whakatupu kino; ka haurangi ano ratou i o ratou toto, me te mea na te waina hou; a ka mohio nga kikokiko katoa ko Ihowa ahau e whakaora nei i a koe, ko tou kai hoko hoki, ko te Mea nui o Hakopa.
Address: 
Phone: 
Email: