- 1
- Ko te kupu tenei a Ihowa, Kei hea ianei te pukapuka whakarere o to koutou whaea, kua mahue nei i a au? Ko wai ranei te tangata, i a au ana moni, i hokona atu ai koutou e ahau ki a ia? Nana, he kino no koutou i hokona atu ai koutou e koutou ano, na a koutou mahi whanoke ano hoki i whakarerea ai to koutou whaea.
- 2
- Na te aha i taku haerenga mai i kore ai te tangata, he aha i taku karangatanga mai i kore ai tetahi e oho ake? kua mutua koia toku ringaringa, tē tau ai te araarai? kua kore ranei he kaha moku hei whakaora? Nana, maku, ma taku kupu riri, ka maroke ai te moana, ka meinga ai hoki nga awa hei koraha: piro ana o ratou ika i te wai-kore, ka mate hoki i te mate-wai.
- 3
- Taku, he whakakakahu i nga rangi ki te mangumangu, he mea i te kakahu taratara hei uhi mo ratou.
- 4
- Kua homai ki a au, e te Ariki, e Ihowa, he arero mātau, kia mohio ai ahau ki te ata ngarahu atu i nga korero ki te tangata e mauiui ana. E whakaara ana ia i tenei ata, i tenei ata; e whakaara ana i taku taringa ki te whakarongo atu, kia pera me ta te hunga mohio.
- 5
- Kua oti te whakatuwhera e te Ariki e Ihowa taku taringa, kihai hoki ahau i tutū, kihai i hoki whakamuri.
- 6
- Tukua atu ana e ahau taku tuara ki nga kai whiu, oku paparinga hoki ki nga kai hutihuti; ko toku kanohi kihai i hunā atu, kei whakama, kei tuwhaina.
- 7
- No te mea ka tapiritia mai a muri i a au e te Ariki, e Ihowa; koia ahau tē whakama ai; koia i waiho ai e ahau toku kanohi hei kiripaka; e mohio ana ano ahau e kore ahau e whakama.
- 8
- E tata ana te kai whakatikatika moku, ko wai hei whawhai ki a au? kia tu ngatahi taua: ko wai hei whakawa moku? kia tata mai ki a au.
- 9
- Nana, ko te Ariki ko Ihowa, hei awhina moku; ko wai hei whakahe i a au? Nana, ka tawhitotia katoatia ratou, ano he kakahu; ka pau ratou i te purehurehu.
- 10
- Ko wai o koutou e wehi ana i a Ihowa, e whakarongo ana ki te reo a tana pononga, e haere ana i roto i te pouri, kahore hoki he whakamārama? Kia okioki atu ia ki te ingoa o Ihowa, kia taupuhipuhi atu hoki ki tona Atua.
- 11
- Nana, e koutou katoa e tahu ana i te ahi, e whitiki ana i a koutou ki nga mumura; haere i te māramatanga o ta koutou ahi, i nga mumura hoki i whakangihaia ra e koutou. Tenei ta toku ringa mo koutou, ka takoto iho koutou me te tangi ano.
Address: 
Phone: 
Email: