- 1
- Ko wai i whakapono ki ta matou korero; i whakaaturia ranei ki a wai te ringaringa o Ihowa?
- 2
- Ka tupu ake hoki ia ki tona aroaro ano he rakau wana, me te pakiaka hoki i te oneone maroke; kahore ona ahuareka, kahore hoki he painga; a, ka titiro atu tatou ki a ia, tē ai he ataahuatanga e minamina atu ai tatou ki a ia.
- 3
- I whakahengia, i whakakahoretia ia e te tangata; he tangata pouri, kua mohio hoki ki te tangi: a, i ahua huna tatou i o tatou kanohi ki a ia; i whakakahoretia, kihai hoki tatou i whakaaro ki a ia.
- 4
- He pono, nana o tatou mate i pikau, nana hoki i waha o tatou pouritanga: ko tatou ia i mea, i tukitukia, i patua ia e te Atua, i whakawhiua.
- 5
- Kaore, i werohia ia mo o tatou he, i tukitukia ia mo a tatou kino: nona te whiunga i mau ai to tatou rongo, kei ona karawarawa hoki he rongoa mo tatou.
- 6
- Tatou katoa, ano he hipi, i marara ke, i anga atu tatou ki tona ara, ki tona ara; na Ihowa ia i mea kia tau iho ki a ia te kino o tatou katoa.
- 7
- I tukinotia ia, i whakawhiua; heoi kihai i kuihi tona mangai: ano he reme i arahina atu ia kia patua, a me te hipi ano i te aroaro o ona kai kutikuti e wahangu ana, kihai hoki i kuihi tona waha.
- 8
- Tukinotia ana, whakawakia iho, tangohia atu ana ia: ma wai hoki tona whakatupuranga e korero? no te mea i wehea atu ia i te ao ora; he mahi hē na toku iwi i patua ai ia.
- 9
- A ka whakaritea hei te hunga kino he urupa mona, heoi i te tangata taonga ia i tona matenga; no te mea kahore ana mahi tutū, kahore ano hoki he tinihanga i tona mangai.
- 10
- A, i pai ano a Ihowa kia patua ia; a, mamae ana ia. Na, ka waiho e koe tona wairua hei whakahere mo te kino, ka kite ia i tona uri, ka whakaroa i ona ra, a ko ta Ihowa i pai ai ka ata oti i a ia.
- 11
- Ka kite ia i ta tona wairua i uaua ai, a tatu ana te ngakau: ma te mohio ki a ia ka whakatikaia ai te tini e taku pononga tika; mana hoki o ratou kino e waha.
- 12
- Mo reira ka hoatu e ahau he wahi mona i roto i o te hunga nui, a ka tu ngatahi ia me te hunga kaha i nga taonga: no te mea kua ringitia e ia tona wairua ki te mate; a, i taua ngatahitia me te hunga kino; nana hoki nga hara o te tini i waha, nana ano i wawao te hunga he.
Address: 
Phone: 
Email: