- 1
- E! e nga tangata katoa e mate-wai ana, haere mai ki nga wai! me te tangata ano hoki kahore ana moni; haere mai ra koutou, hokona, kainga! Haere mai hoki, hokona he waina, he waiu; kaua he moni, kaua he utu.
- 2
- He aha ra i hokona atu ai e koutou te moni mo nga mea ehara i te taro, to koutou uaua hoki mo nga mea e kore ai koutou e makona? ata whakarongo mai ki a au, a kainga te mea pai; kia ora hoki o koutou wairua i nga mea momona.
- 3
- Tahuri mai o koutou taringa, haere mai hoki ki a au; whakarongo mai, a, ka ora o koutou wairua, a, maku e whakarite ki a koutou he kawenata mau tonu, ara, nga atawhainga pono i a Rawiri.
- 4
- Nana, kua waiho ia e ahau hei kai whakaatu ki nga iwi, hei rangatira, hei kai whakahau mo nga tauiwi.
- 5
- Nana, ka karanga koe i te iwi kihai i mohiotia e koe; ka rere mai ano ki a koe nga iwi kahore i mohio ki a koe; na Ihowa hoki, na tou Atua, na te Mea Tapu ano o Iharaira, nana hoki koe i whakanui.
- 6
- Rapua a Ihowa i tona kitenga ai; karangatia atu kei tata ana ia:
- 7
- Kia whakarere te tangata kino i tona ara, te tangata mahi he hoki i ana whakaaro; kia hoki mai ano ki a Ihowa, a, ka aroha ia ki a ia; ki to tatou Atua hoki, he nui rawa hoki tana mahi tohu.
- 8
- Ehara hoki aku whakaaro, i ā koutou whakaaro, oku huarahi i o koutou huarahi, e ai ta Ihowa.
- 9
- Ta te mea e ikeike ake ana te rangi i te whenua, waihoki ko aku huarahi e ikeike ake ana i ā koutou huarahi, aku whakaaro i ā koutou whakaaro.
- 10
- Ka rite hoki ki te ua, raua ko te hukarere e rere iho ana i te rangi, a, e kore ano e hoki whakareira; engari e whakamakūkū ana i te whenua, e mea ana kia whai hua, kia pihi ake, kia homai ano he purapura ma te kai whakato, he taro ma te tangata e kai ana.
- 11
- Ka pena ano taku kupu e puta atu ana i toku mangai: e kore e hoki kau mai ki a au; engari ka meatia taku i pai ai, ka taea hoki taku i unga atu ai.
- 12
- Ta te mea, ka haere atu koutou me te hari ano, ka arahina atu i runga i te rangimarie: ka pakaru mai te waiata a nga maunga, a nga pukepuke, i to koutou aroaro, ka papaki ringaringa ano hoki nga rakau katoa o te whenua.
- 13
- He tataramoa i mua, puta ake ana he kauri; he tumatakuru i mua, ka puta ake he ramarama: a ka waiho hei ingoa ki a Ihowa, hei tohu mo amua tonu atu, e kore e memeha.
Address: 
Phone: 
Email: