- 1
- Nana, kihai i mutua te ringaringa o Ihowa, tē tau ai te whakaora; kihai ano hoki i taimaha tona taringa, tē whakarongo ai ia.
- 2
- Engari na o koutou he i wehe koutou ko to koutou Atua, na o koutou hara ano hoki i hunā ai tona mata ki a koutou, tē whakarongo ai ia.
- 3
- Kua poke hoki o koutou ringa i te toto, o koutou maihao i te he; o koutou ngutu kei te korero teka, o koutou arero kei te whakapuaki i te whanoke.
- 4
- Kahore he karangatanga atu ki te tika, kahore he tohe ki te pono; ko te horihori to ratou okiokinga atu, e korero teka ana ratou; to ratou hapu he nanakia, te whanautanga ake he kino.
- 5
- E whakawhanautia ana e ratou nga hua o te neke, e hangā ana e ratou te whare pungawerewere: te tangata e kai ana i ā ratou hua ka mate, a ki te pehia iho tetahi, ka puta ake he wai-pera.
- 6
- E kore o ratou whare pungawerewere e tau hei kakahu, e kore ano ratou e whai hipoki i ā ratou mahi: a ratou mahi he mahi na te kino, he mahi nanakia ano hoki kei o ratou ringa.
- 7
- E rere ana o ratou waewae ki te kino, e hohoro ana hoki ratou ki te whakaheke i te toto hara-kore: a ratou whakaaro he whakaaro ki te kino, he whakamoti, he wawahi kei o ratou huarahi.
- 8
- Kahore o ratou matauranga ki te huarahi o te rangimarie, kahore hoki he whakarite whakawa i o ratou ara, o ratou huarahi, whakakopikopikoa ake e ratou: te hunga katoa e haere ana na reira, e kore e mohio ki te rangimarie.
- 9
- No reira matara noa atu te whakarite whakawa i a tatou, tē mau tatou i te tika: e taria atu ana e tatou te māramatanga, na ko te pouritanga, te wherikotanga, na, kei te haere nei tatou i te pouritanga.
- 10
- Ano he matapo tatou e whawha noa ana i te taiepa: me te mea kahore he kanohi i whawha noa ai tatou; i te poutumarotanga e tūtuki ana o tatou waewae ano ko te po; i nga wahi kua ururuatia rite tonu tatou ki te hunga kua mate.
- 11
- Kei te ngengere tatou katoa ano he pea; to tatou rite kei te kukupa e tumutumu tonu ana. E tatari atu ana tatou ki te whakarite whakawa, heoi kua kahore; ki te whakaoranga, kei tawhiti atu i a tatou.
- 12
- Kua nui hoki o matou pokanga-ketanga i to aroaro, e whakaatu ana hoki o matou hara i ta matou he; kei a matou nei hoki o matou, pokanga-ketanga, o matou kino, e mohiotia ana era e matou;
- 13
- He poka ke, he korero teka ki a Ihowa, he peka atu i te whai i to matou Atua, he whanoke nga korero, he whakakeke; kua hapu, kua puaki i roto i te ngakau nga kupu teka.
- 14
- Kua tahuri atu nei hoki ki muri te whakarite whakawa; te tika tu mai ana i tawhiti; kua hinga hoki te pono i te waharoa, kahore hoki he tomokanga atu mo te whakahaere tika.
- 15
- Kua kore ano te pono, a, te tangata e whakarerea ana e ia te kino, ka waiho hei taonga pārau. Na, te kitenga o Ihowa, ka kino ki tana titiro iho, no te mea kahore he whakarite whakawa.
- 16
- Na, titiro rawa mai ia kahore he tangata, miharo ana ia no te mea kahore he kai wawao; na, kua meinga e tona ringaringa he whakaoranga mona; tona tika, na tera ia i tautoko ake.
- 17
- I kakahuria hoki e ia te tika hei pukupuku, ko te whakaoranga ano hoki hei potae ki tona mahunga; kakahuria ana hoki e ia nga kakahu o te rapu utu hei kakahu, ropia mai ana te hae hei koroka.
- 18
- Tana utu ka rite ki ā ratou mahi, he riri ki ona hoa whawhai, he utu ki ona hoa riri; ki nga motu ano ka homai e ia he utu.
- 19
- Na, ka wehingia te ingoa o Ihowa i te hauauru, tona kororia ano hoki i te rawhiti. Ka tae mai te hoa riri, ano he awa, ka ara i te Wairua o Ihowa te kara whawhai ki a ia.
- 20
- A, ka haere mai te Kai hoko ki Hiona, ki te hunga ano hoki i roto i a Hakopa e tahuri atu ana i te pokanga-ketanga, e ai ta Ihowa.
- 21
- Ko au nei, ko taku kawenata tenei ki a ratou, e ai ta Ihowa, Taku wairua i a koe na, me aku kupu i hoatu e ahau ki to mangai, e kore e neke atu i tou mangai, i te mangai ano hoki o ou uri, i te mangai ano o nga uri o ou uri, e ai ta Ihowa, inaianei, a ake tonu atu.
Address: 
Phone: 
Email: