- 1
- E rapua ana ahau e te hunga kihai nei i ui ki a au, e kitea ana ahau e te hunga kihai nei i kimi i a au: i mea ahau, Tenei ahau, tenei ahau, ki te iwi kihai nei i karangatia toku ingoa ki a ratou.
- 2
- Tuwhera tonu oku ringa i te ra roa nei ki te iwi tutu e haere nei i te ara kahore i pai, e whai ana i ā ratou whakaaro ake,
- 3
- Ki te iwi he whakapataritari tonu nei ta ratou ki a au ki toku aroaro, he patu whakahere i roto i nga kāri, he tahu whakakakara ki runga ki nga aata pereki;
- 4
- E noho nei i nga urupa, e moe ana i roto i nga whare tupapaku, e kai ana i te kikokiko poaka, a he hupa no nga mea whakarihariha kei roto i ā ratou oko.
- 5
- Ta ratou kupu, Tu atu, kaua e whakatata mai ki a au; he tapu rawa hoki ahau i a koe. He paowa enei ki toku ihu, he ahi e ka ana, a pau noa te ra.
- 6
- Nana, kua oti te tuhituhi ki toku aroaro; e kore ahau e whakarongo puku; ka utua e ahau, ka utua ki roto ki o ratou uma,
- 7
- O koutou kino, huihuia atu ki nga kino o o koutou mātua, e ai ta Ihowa, i tahu whakakakara nei ki runga ki nga maunga, whakaititia iho ana hoki ahau e ratou i runga i nga pukepuke: mo reira ka mehuatia atu e ahau ta ratou mahi o mua ki roto ki to ratou uma.
- 8
- Ko te kupu tenei a Ihowa, Ka rite ki te waina hou e kitea ana i roto i te tautau, a ka mea te tangata Kaua e whakakorea; he manaakitanga hoki kei roto, ka pera ano taku e mea ai, he whakaaro ki aku pononga, kei kore ratou katoa.
- 9
- Ka whakaputaina ake ano e ahau he uri i roto i a Hakopa, a, i roto i a Hura, he tangata mana nei oku maunga: ka riro ano hoki a reira i aku i whiriwhiri ai, ka noho aku pononga ki reira.
- 10
- A hei puninga a Harono mo nga hipi, hei tapapatanga te raorao i Akoro mo nga kau a toku iwi i rapu nei i a au.
- 11
- Ko koutou kua whakarere i a Ihowa, kua wareware ki toku maunga tapu, kua whakapaia e koutou he tepu ma Kare, whakakiia mai ana e koutou he ringihanga ki a Meni.
- 12
- Mo reira ka taua atu koutou e ahau ma te hoari, ka tuohu koutou katoa, ka tukitukia: no te mea i karanga atu ahau, a kihai koutou i whakao mai, i korero atu ahau, a kihai koutou i whakarongo; heoi mahia ana e koutou te kino ki taku tirohanga atu, whiriwhiria ana e koutou te mea kihai i paingia e ahau.
- 13
- Na, ko te kupu tenei a te Ariki a Ihowa, Nana, aku pononga, ka kai ratou, ko koutou ia ka mate-kai: nana, aku pononga, ka inu ratou, ko koutou ia ka mate-wai; nana, aku pononga, ka koa ratou, ko koutou ia ka whakama:
- 14
- Nana, aku pononga, ka waiata ratou, he koa no te ngakau, ko koutou ia ka tangi i te pouri o te ngakau, ka aue, ka marū hoki te wairua.
- 15
- Ka waiho ano e koutou to koutou ingoa hei kanga ma aku i whiriwhiri ai; ka whakamatea ano hoki koutou e te Ariki e Ihowa, ka karangatia ano hoki e ia he ingoa ke ki ana pononga:
- 16
- A, te tangata o te whenua e manaaki ana i a ia ano, ka manaaki i a ia i runga i te Atua o te pono; te tangata hoki o te whenua e oati ana, ko te Atua o te pono hei oati mana; no te mea ka warewaretia nga raru o mua; no te mea hoki ka hunā atu aua mea i oku kanohi.
- 17
- Tenei hoki au kei te hanga i te rangi hou, i te whenua hou; e kore ano hoki o mua e maharatia, e kore ano e puta ake i roto i te ngakau.
- 18
- Engari ka koa koutou, ka whakamanamana ki taku e hanga nei, ake ake ake, no te mea tenei au te hanga nei i Hiruharama hei whakamanamananga, i tona iwi ano hoki hei koanga ngakau.
- 19
- Ka whakamanamana ano ahau ki Hiruharama, ka koa ki toku iwi: e kore ano e rangona i muri te reo e tangi ana, te reo e aue ana i roto i a ia.
- 20
- Kahore o reira kohungahunga he torutoru nei ona ra, ake ake ake, kahore he koroheke kihai i rite ona ra; no te mea kotahi rau nga tau o te taitamariki i tona matenga ai; te tangata hara ia, kotahi rau nei ona tau, ka kangā.
- 21
- Ka hanga whare ano hoki ratou, nohoia iho, ka whakatokia nga mara waina, ka kainga ano nga hua.
- 22
- E kore e hangā e ratou hei nohoanga iho mo te tangata ke, e kore e whakatokia hei kai ma tetahi atu tangata: no te mea ka rite nga ra o toku iwi ki nga ra o te rakau, a ka tawhitotia ki aku i whiriwhiri ai te mahi a o ratou ringaringa.
- 23
- E kore ratou e mauiui noa, e kore ano e pawera, ina whanau; no te mea he uri ratou no a Ihowa i manaaki ai, ratou tahi ano ko to ratou whanau.
- 24
- Kahore ano ratou kia karanga noa, kua whakao atu ahau; i a ratou ano e korero ana, ka whakarongo atu ahau.
- 25
- Te wuruhi, te reme, ka kai tahi raua; te raiona, ka rite ia ki te kau, ka kai kakau witi; te nakahi, ko te puehu hei kai mana. E kore ratou e tukino, e whakamate, puta noa i toku maunga tapu, e ai ta Ihowa.
Address: 
Phone: 
Email: