- 1
- E aku teina, kaua e waiho i runga i te whakapai kanohi, te whakapono ki to tatou Ariki kororia ki a Ihu Karaiti.
- 2
- Ki te tomo hoki tetahi tangata ki to koutou whare karakia he mowhiti koura nei tona, he kakahu pai; a ka tomo atu ano he rawakore he kakahu paru nei tona;
- 3
- A ka titiro atu koutou ki te tangata i te kakahu pai, ka mea ki a ia, E noho koe ki konei ki te wahi pai; a ka mea ki te rawakore, E tu koe ki kona, E noho ranei ki konei ki raro i toku turanga waewae:
- 4
- He teka ianei he tikanga tahatahi ta koutou, a kua hē nga whakaaro o koutou o nga kai whakarite whakawa?
- 5
- Whakarongo, e aku teina aroha, Kahore ano koia te Atua i whiriwhiri i nga rawakore o tenei ao, kia whiwhi ki te taonga, ara ki te whakapono, kia riro mai hoki i a ratou te rangatiratanga, kua whakaaria mai e ia mo te hunga e aroha ana ki a ia?
- 6
- Heoi ka whakakino na koutou ki te rawakore. He teka ianei ko nga tāngata taonga hei whakatupu rangatira ki a koutou, hei tōtō i a koutou ki nga whakawakanga?
- 7
- He teka ianei he hunga kohukohu ratou i te ingoa pai kua karangatia na ki a koutou?
- 8
- Na, ki te rite i a koutou te ture kingi, to te Karaipiture, Me aroha e koe tou hoa, ano ko koe, ka pai ta koutou hanga:
- 9
- Tena ki te whakapai kanohi koutou, e mahi ana koutou i te hara, ka mau hoki i te ture he hunga hē.
- 10
- Ki te mau hoki te ture katoa i tetahi tangata, a ka kotahi ano te mea e tūtuki ai ia, kua hē ia ki te katoa.
- 11
- I tana kianga mai hoki, Kaua e puremu, i ki mai ano ia, Kaua e patu tangata. Na, ahakoa kahore koe e puremu, ki te patu tangata koe, kua takahia e koe te ture.
- 12
- Kia rite ta koutou korero, ta koutou mahi, ki ta te hunga e whakawakia amua i runga i nga tikanga o te ture here kore.
- 13
- Te tangata hoki kahore ona ngakau tohu, e kore tohungia ina whakawakia, ka whakapehepeha ia te ngakau tohu ki te whakawa.
- 14
- He aha te pai, e aku teina, ki te mea tetahi he whakapono tona, a kahore ana mahi? E taea ranei ia te whakaora e te whakapono?
- 15
- Na, ki te mea e noho tahanga ana tetahi teina tuahine ranei, ki te mea ranei kua kore he kai māna mo tenei ra mo tenei ra,
- 16
- A ka mea atu tetahi o koutou ki a ratou, Haere marie, kia mahana kia makona; a kahore e hoatu e koutou ki a ratou nga mea e matea ana e te tinana; he aha te pai?
- 17
- Whaihoki ko te whakapono, ki te kahore ana mahi, he mea mate, ko ia anake hoki.
- 18
- Na, he ki tenei ma tetahi, He whakapono tou, he mahi aku: whakakitea mai ki a au tou whakapono motu ke i o mahi, a maku, ara, ma aku mahi e whakakite atu toku whakapono ki a koe.
- 19
- E whakapono ana koe kotahi tonu te Atua; e pai ana tau meatanga: e whakapono ana hoki nga rewera, me te wiri ano ratou.
- 20
- Heoi e pai ana ranei koe kia mātau, e te kuare, he mea mate te whakapono ki te kahore he mahi?
- 21
- Kihai ianei a Aperahama to tatou matua i tika i nga mahi, i a ia i whakaeke atu i tana tamaiti i a Ihaka ki runga ki te āta?
- 22
- Ka kite ranei koe i mahi tahi te whakapono me ana mahi, a na nga mahi i tino rite ai te whakapono?
- 23
- A i rite ano ta te Karaipiture, e mea nei, I whakapono a Aperahama ki te Atua, a ka whakairia ki a ia hei tika: ka karangatia ano hoki ia he hoa aroha no te Atua.
- 24
- Heoi ka kite koutou kei nga mahi he tika mo te tangata, a ehara i te mea kei te whakapono anake.
- 25
- Whaihoki ko Rahapa te wahine puremu, kihai ianei ia i whakatikaia e nga mahi, i a ia i whakamanuhiri i nga karere, a tukua atu ana raua e ia ra tetahi ara ke?
- 26
- Ka rite hoki ki te tinana ka mate nei ki te kahore te manawa, whaihoki ko te whakapono, ki te kahore he mahi, he mea mate.
Address: 
Phone: 
Email: