- 1
- Tena, e te hunga taonga, e tangi koutou e aue ki o koutou mate meake nei puta mai.
- 2
- Kua pirau o koutou taonga, kua kainga o koutou kakahu e te huhu.
- 3
- Kua waikuratia to koutou koura me to koutou hiriwa; a ko te waikura o aua mea hei kai whakaatu i to koutou hē, ka kainga hoki e ia o koutou kikokiko, ano he kapura. Kua pae na i a koutou he taonga mo nga ra whakamutunga,
- 4
- Na, kei te karanga te utu i kaiponuhia e koutou ma nga kai mahi, nāna i kokoti a koutou māra, kua tae atu ano hoki nga karanga a nga kai kokoti ki nga taringa o te Ariki o nga mano tini.
- 5
- Kua kai koutou i nga kai papai i runga i te whenua, whaia ana e koutou a te tinana whakaahuareka; atawhaitia ana e koutou o koutou ngakau, me te mea ano, ko te ra okanga tenei.
- 6
- Whakatakā ana e koutou ki te hē, patua iho te mea tika, kihai nei ia i pēhi atu i ta koutou.
- 7
- Na, tatari marie koutou, e aku teina, ki te haerenga mai o te Ariki. Na, tumanako tonu te kai ngaki ki nga hua utu nui o te whenua, he mea tatari marie atu nāna, kia tae mai ra ano to mua me to muri ua.
- 8
- Tatari marie ano hoki koutou; kia u o koutou ngakau: kua tata hoki te haerenga mai o te Ariki.
- 9
- Kaua e amuamu tetahi ki tetahi, e aku teina; kei whakatakā koutou ki te hē: na, kei nga tatau te kai whakawa e tu ana.
- 10
- Nga poropiti i korero nei i runga i te ingoa o te Ariki, waiho ratou, e aku teina, hei tauira mo te whakamanawanui ki nga kino, mo te tatari marie.
- 11
- Na, ki ta tatou e hari ana te hunga e whakamanawanui ana. Kua rongo koutou ki te manawanui o Hopa, kua kite hoki i ta te Ariki whakamutunga, i te nui o to te Ariki aroha, i tana mahi tohu.
- 12
- Na, te tuatahi o nga mea katoa, e aku teina, kaua te rangi, kaua te whenua, kaua tetahi atu oati, e oatitia e koutou; engari me ae ta koutou ae, me kahore ta koutou kahore; kei taka koutou ki te whakahenga.
- 13
- Ki te pāngia tetahi o koutou e te mamae, me inoi. Ki te koa te ngakau o tetahi, me waiata.
- 14
- Ki te turorotia tetahi i roto i a koutou, me karanga e ia ki nga kaumatua o te hahi; a ma ratou e inoi ki runga ki a ia, me te whakawahi ano i a ia, ki te hinu i runga i te ingoa o te Ariki:
- 15
- A e ora te turoro i te inoi whakapono, ma te Ariki ano ia e whakaara ake; a ki te mea kua mahi hara ia, ka murua tona hara.
- 16
- Whakina a koutou hē tetahi ki tetahi, me inoi ano koutou tetahi mo tetahi, kia ora ai o koutou mate. Nui atu te mana o te inoi kaha a te tangata tika.
- 17
- He tangata a Iraia i rite tahi te ngakau ki o tatou, heoi ka kaha nei tana inoi kia kaua e ua; kore ake he ua ki runga ki te whenua a e toru nga tau e ono nga marama.
- 18
- Inoi ana ano ia, a ka homai ano te ua e te rangi, na, hua ana nga hua o te whenua.
- 19
- E aku teina, ki te kotiti atu tetahi o koutou i te pono, a ka meinga e tetahi kia tahuri mai ano,
- 20
- Kia mātau ia, na, te tangata i tahuri ai te tangata hara i te hē o tona ara, e ora i a ia he wairua kei mate, a he tini nga hara ka hipokina e ia.
Address: 
Phone: 
Email: