- 1
- Nga kupu a Heremaia tama a Hirikia, ko tetahi nei ia o nga tohunga i Anatoto i te whenua o Peniamine.
- 2
- I puta mai hoki te kupu a Ihowa ki a ia i nga ra o Hohia tama a Amono, kingi o Hura, i te tekau ma toru o nga tau o tona kingitanga.
- 3
- I puta mai ano hoki i nga ra o Iehoiakimi tama a Hohia kingi o Hura, a taka noa te tekau ma tahi o nga tau o Terekia tama a Hohia kingi o Hura, taea noatia te whakaraunga atu o Hiruharama i te rima o nga marama.
- 4
- I puta mai ano te kupu a Ihowa ki a au, i mea,
- 5
- Kiano koe i hangā e ahau i roto i te kopu, kua mohio ahau ki a koe, kiano koe i puta mai i roto i te puku, kua whakatapua koe e ahau, a whakaritea ana koe e ahau hei poropiti ki nga iwi.
- 6
- Na, ko taku kianga atu, Aue, e taku Ariki, e Ihowa, nana, kahore ahau e mohio ki te korero, he tamariki nei hoki ahau.
- 7
- Ano ra ko Ihowa ki a au, Kaua e mea, He tamariki ahau: no te mea me haere koe ki te hunga katoa e ungā atu ai koe e ahau, me korero ano e koe nga mea katoa e whakahaua atu e ahau ki a koe.
- 8
- Kaua e wehi i a ratou; kei a koe hoki ahau hei whakaora i a koe, e ai ta Ihowa.
- 9
- Na ka totoro mai te ringa o Ihowa, a ka pa ki toku mangai. I mea mai ano a Ihowa ki a au, Nana, kua hoatu nei e ahau aku kupu ki roto ki tou mangai.
- 10
- Mau e whakaaro kua waiho nei koe e ahau hei whakatakoto tikanga ki nga iwi, ki nga kingitanga, hei unu atu, hei wahi iho, hei whakangaro, hei turaki iho, hei hanga, hei whakato.
- 11
- I puta mai ano te kupu a Ihowa ki a au, i mea, He aha te mea e kitea ana e koe, e Heremaia? Ano ra ko ahau, He peka aramona taku e kite nei.
- 12
- Ano ra ko Ihowa ki a au, Ka pai to tirohanga atu; no te mea ka whakahohorotia e ahau taku kupu, ka mahia.
- 13
- Na, ko te rua o nga putanga o te kupu a Ihowa ki a au; i mea ia, He aha te mea e kitea ana e koe? Ano ra ko ahau, He kohua e koropupu ana taku e kite ai, e anga mai ana i te nota.
- 14
- Na, ko te meatanga mai a Ihowa ki a au, Ka puta mai i te nota he kino mo nga tangata katoa o te whenua.
- 15
- Tenei hoki ahau te karanga atu nei ki nga hapu katoa o nga kingitanga o te nota, e ai ta Ihowa, a ka haere mai ratou, ka whakaturia hoki e ratou tona torona, tona torona, ki te tomokanga atu i nga kuwaha o Hiruharama, ki ona taiepa katoa, a karapoi noa, ki nga pa katoa ano hoki o Hura.
- 16
- Ka whakapuakina atu ano hoki e ahau aku whakawakanga ki a ratou mo a ratou kino katoa, ara, mo ratou i whakarere i a au, a i tahu whakakakara ki nga atua ke, koropiko tonu atu ki nga mahi a o ratou ringaringa.
- 17
- Na, ko koe, whitikiria tou hope, whakatika, korerotia atu ki a ratou nga mea katoa e whakahaua atu e ahau ki a koe; aua e wehi i a ratou, kei meinga koe e ahau kia numinumi kau ki to ratou aroaro.
- 18
- Na, tenei ahau te mea nei i a koe i tenei ra hei pa kua oti te taiepa, hei pou rino, hei taiepa parahi ki te whenua katoa, ki nga kingi o Hura, ki ona rangatira, ki ona tohunga, ki te iwi ano hoki o te whenua.
- 19
- A ka whawhai ratou ki a koe, otira e kore koe e taea e ratou; no te mea kei a koe ahau, e ai ta Ihowa, hei whakaora i a koe.
Address: 
Phone: 
Email: