- 1
- Te kupu i puta mai ki a Heremaia mo te iwi katoa o Hura i te wha o nga tau o Iehoiakimi tama a Hohia kingi o Hura, ara, i te tuatahi o nga tau o Nepukararetara kingi o Papurona;
- 2
- Ta Heremaia poropiti hoki i korero ai, ki te iwi katoa o Hura, ki nga tangata katoa ano hoki o Hiruharama; i ki ia,
- 3
- No te tekau ma toru o nga tau o Hohia tama a Amono kingi o Hura, a tae noa ki tenei ra, ki te rua tekau ma toru o nga tau, te putanga mai o te kupu a Ihowa ki a au, a korerotia atu ana e ahau ki a koutou; moata tonu taku maranga atu, taku korero atu; heoi kihai koutou i whakarongo mai.
- 4
- I ungā mai ano e Ihowa ana pononga katoa ki a koutou, nga poropiti, moata tonu tana maranga, tana unga atu; heoi kihai koutou i whakarongo, kihai ano o koutou taringa i anga mai ki te whakarongo.
- 5
- I mea ratou, Tahuri mai ra koutou, e tera tangata, e tera tangata, i tana ara kino, i te kino ano hoki o a koutou mahi; e noho hoki ki te oneone i homai e Ihowa ki a koutou ko o koutou mātua, a ake ake ake.
- 6
- Kaua hoki e whaia nga atua ke, kaua e mahi ki a ratou, kaua e koropiko ki a ratou, kaua hoki ahau e whakapataritaria ki te mahi a o koutou ringaringa, a e kore koutou e he i a au.
- 7
- Heoi kihai koutou i whakarongo ki a au, e ai ta Ihowa; he mea kia whakapataritaria ai ahau ki te mahi a o koutou ringaringa, hei he ano mo koutou.
- 8
- Mo reira ko te kupu tenei a Ihowa o nga mano, Na, kihai na koutou i whakarongo ki aku kupu,
- 9
- Tenei ahau ka unga tangata atu ki te tiki i nga hapu katoa o te nota, e ai ta Ihowa, ratou ko taku pononga ko Nepukararetara kingi o Papurona, a ka kawea mai ratou e ahau ki tenei whenua ki ona tangata ano hoki, ki enei iwi katoa ano hoki, a tawhio noa, ka whakangaromia rawatia ano hoki ratou e ahau, ka meinga ano ratou hei miharotanga, hei whakahīanga atu, mau tonu te ururua.
- 10
- Ka whakakahoretia ano hoki e ahau i roto i a ratou te reo koa, te reo hari, te reo o te tane marena hou, te reo o te wahine marena hou, te haruru o nga kohatu mira, te māramatanga ano hoki o te rama.
- 11
- A ka waiho tenei whenua katoa hei ururua, hei miharotanga, ka mahi ano hoki enei iwi ki te kingi o Papurona, e whitu tekau nga tau.
- 12
- A ka rite nga tau e whitu tekau, ka whiua e ahau te kingi o Papurona me taua iwi ano hoki, e ai ta Ihowa, mo ta ratou kino; te whenua ano hoki o nga Karari, ka meinga ano a reira e ahau hei whakangaromanga a ake ake ake.
- 13
- Ka kawea mai ano e ahau ki runga ki taua whenua aku kupu katoa i korerotia e ahau mo reira, nga mea katoa kua oti te tuhituhi ki tenei pukapuka, ta Heremaia i poropiti ai mo aua iwi katoa.
- 14
- No te mea he maha nga iwi, he nui hoki nga kingi e whakamahi i a ratou, ae ra, i a ratou, a ka rite ki ā ratou hanga, ki te mahi ano a o ratou ringa taku utu ki a ratou.
- 15
- Ko te kupu hoki tenei a Ihowa Atua o Iharaira ki a au, Tangohia te kapa waina o tenei riri i roto i toku ringa, whakainumia atu ma nga iwi katoa ka ungā atu nei koe e ahau ki a ratou.
- 16
- A ka inu ratou, ka hurorirori, ka haurangi i te hoari e ungā atu e ahau ki waenganui i a ratou.
- 17
- Katahi au ka tango i te kapa i roto i te ringa o Ihowa, whakainumia atu ana e ahau ma nga iwi katoa i ungā atu nei ahau e Ihowa ki a ratou:
- 18
- Ma Hiruharama, ma nga pa o Hura, ma ona kingi, ma ona rangatira; kia meinga ai ratou hei ururua, hei miharotanga atu, hei whakahīanga atu, hei kanga, hei penei ano me to tenei ra;
- 19
- Ma Parao kingi o Ihipa, ratou ko ana tangata, ko ona rangatira, ko tona iwi katoa;
- 20
- Ma nga whakauru katoa, ma nga kingi katoa o te whenua o Uhu, ma nga kingi katoa o te whenua o nga Pirihitini, ma Ahakerono, ma Kaha, ma Ekerono, ma nga morehu ano o Aharoro:
- 21
- Ma Eroma, ma Moapa, ma nga tamariki a Amono;
- 22
- Ma nga kingi katoa o Taira, ma nga kingi katoa o Hairona, ma nga kingi o nga motu i tera taha o te moana;
- 23
- Ma Rerana, ma Tema, ma Putu, ma te hunga katoa i nga pito whakamutunga,
- 24
- Ma nga kingi katoa o Arapia, ratou ko nga kingi katoa o nga whakauru, e noho ana i te koraha;
- 25
- Ma nga kingi katoa o Timiri, ratou ko nga kingi katoa o Erama, ko nga kingi katoa o nga Meri;
- 26
- Ma nga kingi katoa ano hoki o te nota, ma nga mea e tata ana, ma nga mea i tawhiti, ma tetahi, ma tetahi, ma nga kingitanga katoa ano hoki o te ao, i te mata o te oneone: ka inu ano hoki te kingi o Hehaka i muri i a ratou.
- 27
- Me ki atu ano e koe ki a ratou, Ko te kupu tenei a Ihowa o nga mano Atua o Iharaira, Inumia, a haurangi iho, ruaki, hinga ki raro, kaua hoki e ara ki runga, i te hoari hoki e ungā atu e ahau ki waenganui i a koutou.
- 28
- Na, ki te kore ratou e pai ki te tango i te kapa i roto i to ringa kia inumia, katahi koe ka mea atu ki a ratou, Ko te kupu tenei a Ihowa o nga mano, Me inu ano e koutou.
- 29
- No te mea, na, te pa i karangatia nei toku ingoa ki reira, ka timata ahau te whakatupu kino: ko koutou hoki, e whakaharakoretia rawatia ranei koutou? e kore koutou e whakaharakoretia; no te mea ka karangatia e ahau he hoari ki runga ki nga tangata katoa o te whenua, e ai ta Ihowa o nga mano.
- 30
- Mo reira me poropiti atu e koe enei kupu katoa ki a ratou, me ki atu ki a ratou, Ka hamama mai a Ihowa; ka nui tona hamama ki tona kāinga; i te wahi tiketike, ka puaki mai tona hamama i tona kāinga tapu, ka rite tona hamama ki to nga kai takahi karepe, ka karanga ia ki nga tangata katoa o te whenua.
- 31
- Ka paku te ngangau ki te pito o te whenua; no te mea he totohe ta Ihowa ki nga iwi, ka whakawakia e ia nga kikokiko katoa; te hunga kino, ka tukua atu ratou e ia ki te hoari, e ai ta Ihowa.
- 32
- Ko te kupu tenei a Ihowa o nga mano, Nana, ka puta atu he kino i tetahi iwi ki tetahi iwi, he nui hoki te tukauati e whakaohokia mai i nga taha o te whenua.
- 33
- Na, nga tupapaku a Ihowa i taua rangi ka takoto i tetahi pito o te whenua tae noa ki tetahi pito o te whenua: e kore e tangihia, e kore ano e kohikohia, e kore ano hoki e tanumia; hei whakawairakau ratou ki runga ki te mata o te oneone.
- 34
- E aue, e nga hepara, hamama, titakataka ki te pungarehu, e nga metararahi o te kahui: no te mea kua rite nga ra mo koutou kia tukitukia, kia whakamararatia; a ka taka koutou, ka rite ki te oko e matenuitia ana.
- 35
- Ka kore noa iho ano hoki he rerenga ma nga hepara, kahore he mawhititanga atu ma nga metararahi o te kahui.
- 36
- Ka hamama te reo o nga hepara, ka aue nga metararahi o te kahui: no te mea e pahuatia ana e Ihowa ta ratou haerenga hipi.
- 37
- Ka whakamotitia ano hoki nga nohoanga humarie, no te mea ka mura te riri a Ihowa.
- 38
- Ka rite ia ki te raiona kua mahue nei tona kuhunga; ka ururuatia hoki to ratou whenua, i te taikaha o te kai tukino, i te muranga ano hoki o tana riri.
Address: 
Phone: 
Email: