- 1
- I taua tau ano, i te timatanga o te kingitanga o Terekia kingi o Hura i te wha o nga tau, i te rima o nga marama ka korero mai ki a au i roto i te whare o Ihowa a Hanania tama a Aturu poropiti, he tangata no Kipeono, me te titiro mai ano nga tohunga ratou ko te iwi katoa; i mea mai ia,
- 2
- Ko te kupu tenei a Ihowa o nga mano, Atua o Iharaira, e ki ana ia, Kua whati i a au te ioka a te kingi o Papurona.
- 3
- E kore e rite nga ra o nga tau e rua, ka whakahokia mai e ahau ki tenei wahi nga oko katoa o te whare o Ihowa i tangohia atu e Nepukaneha kingi o Papurona i tenei wahi, i kawea atu e ia ki Papurona:
- 4
- Na, a Hekonia tama a Iehoiakimi kingi o Hura, ratou ko nga whakaraunga katoa o Hura i haere atu nei ki Papurona, ka whakahokia mai e ahau ki tenei wahi, e ai ta Ihowa: no te mea ka whati i a au te ioka a te kingi o Papurona.
- 5
- Na, ko te korerotanga atu a Heremaia poropiti ki a Hanania poropiti i te tirohanga mai ano a nga tohunga, i te tirohanga mai ano a te iwi katoa e tu ana i te whare o Ihowa,
- 6
- I ki atu ano a Heremaia poropiti, Amine: kia pena mai ano a Ihowa: kia whakamanā ano e Ihowa o kupu i poropititia na e koe mo nga oko o te whare o Ihowa mo nga whakarau katoa ano hoki, ka whakahokia mai i Papurona ki tenei wahi.
- 7
- Otiia kia rongo mai ano koe ki tenei kupu e korerotia atu nei e ahau ki o taringa, ki nga taringa ano o te iwi katoa;
- 8
- Nga poropiti i mua atu i a au, i mua atu i a koe i mua noa atu, i poropititia ano e ratou he hē mo nga whenua maha, mo nga kingitanga nui, he whawhai, he kino, he mate uruta.
- 9
- Te poropiti e poropiti ana i te rongo mau, ki te whakaritea te kupu a te poropiti, ka mohiotia taua poropiti he mea unga pono mai ia na Ihowa.
- 10
- Katahi ka tangohia atu e Hanania poropiti te ioka i te kaki o Heremaia poropiti, wahia ana e ia.
- 11
- I korero ano a Hanania poropiti i te aroaro o te iwi katoa, i mea, Ko te kupu tenei a Ihowa, Ka peneitia e ahau te ioka o Nepukaneha kingi o Papurona i roto i nga ra o nga tau e rua, ka wahia atu i te kaki o nga iwi katoa. Na, haere ana a Heremaia poropiti i tona ara.
- 12
- Na, ka puta mai te kupu a Ihowa ki a Heremaia i muri iho i ta Hanania poropiti wāhanga i te ioka i te kaki o Heremaia poropiti; i ki mai ia,
- 13
- Haere, korero atu ki a Hanania, mea atu, Ko te kupu tenei a Ihowa, Kua wahia na e koe nga ioka rakau; na, me hanga e koe etahi ioka rino hei whakakapi mo ena.
- 14
- No te mea ko te kupu tenei a Ihowa o nga mano, Atua o Iharaira, Kua oti tetahi ioka rino te whakanoho atu e ahau ki te kaki o enei iwi katoa, a ka mahi ratou ki a Nepukaneha kingi o Papurona: ina, ka mahi ano ratou ki a ia; kua hoatu ano e ahau nga kirehe o te parae ki a ia.
- 15
- Na, ko te meatanga atu a Heremaia poropiti ki a Hanania poropiti, Whakarongo mai ra, e Hanania, Kihai koe i ungā e Ihowa, na, kua mea nei koe i tenei iwi kia whakawhirinaki atu ki te teka.
- 16
- Mo reira ko te kupu tenei a Ihowa, Nana, ka makā atu koe e ahau i runga i te mata o te oneone; i tenei tau ano ka mate koe, no te mea he tutu tau korero mo nga mea a Ihowa.
- 17
- Na, i taua tau ano ka mate a Hanania poropiti i te whitu o nga marama.
Address: 
Phone: 
Email: