Jeremiah Chapter 29 - Paipera Tapu 1868 | Te Paipera Tapu 1868

Jeremiah Chapter 29 - Paipera Tapu 1868

1
Ko nga kupu enei o te pukapuka i tukua atu e Heremaia poropiti i Hiruharama ki nga morehu o nga kaumatua i whakaraua atu nei, ratou ko nga tohunga, ko nga poropiti, ko te iwi katoa i whakaraua atu e Nepukaneha i Hiruharama ki Papurona;
2
(I muri iho i te haerenga atu Kingi Hekonia i Hiruharama, ratou ko te kuini, ko nga unaka, ko nga rangatira o Hura, o Hiruharama, me nga kamura ano, ratou ko nga parakemete.)
3
He mea kawe na Eraha tama a Hapana, raua ko Kemaria tama a Hirikia (he mea unga ano enei na Terekia kingi o Hura ki Papurona ki a Nepukaneha kingi o Papurona;) i mea ia,
4
Ko te kupu tenei a Ihowa o nga mano, Atua o Iharaira, ki nga whakarau katoa, i whakaraua atu nei e ahau i Hiruharama ki Papurona,
5
Hangā he whare hei nohoanga mo koutou, whakatokia ano hoki etahi kāri, ka kai I nga hua.
6
Marenatia he wahine, kia whanau ano hoki he tamariki, he tamahine, ma koutou, kia marenatia ano hoki a koutou tamariki, tukua ano a koutou tamahine ki te tane, kia whanau ano he tamariki, he tamahine, i a ratou, kia tini ai koutou ki reira, kei torutoru.
7
Rapua hoki he maunga rongo mo te pa kua whakaraua atu na koutou e ahau ki reira, inoi hoki ki a Ihowa mo reira; no te mea ma te mau o to kona rongo ka mau ai to koutou rongo.
8
No te mea ko te kupu tenei a Ihowa o nga mano, Atua o Iharaira, Kei tinihangatia koutou e a koutou poropiti, e a koutou tohunga tuāhu, i roto na i a koutou, kei whakarongo ano hoki ki a koutou moe e meinga na e koutou kia moea.
9
No te mea e poropiti teka ana ratou ki a koutou i runga i toku ingoa; ehara ratou i te mea unga atu naku, e ai ta Ihowa.
10
No te mea ko te kupu tenei a Ihowa, Ka rite nga tau e whitu tekau ki Papurona, ka tirohia iho koutou e ahau; ka whakamanā ano e ahau taku kupu pai ki a koutou, mo koutou kia whakahokia mai ki tenei wahi.
11
E mohio ana hoki ahau ki nga whakaaro e whakaaro nei ahau ki a koutou, e ai ta Ihowa, he whakaaro mo te rongo mau, ehara i te mea mo te kino, a ka hoatu ki a koutou te mutunga e tumanakohia atu ana.
12
Ko reira koutou karanga ai ki a au, ka haere ano koutou ka inoi ki a au, a ka whakarongo ahau ki a koutou.
13
Ka rapua ano ahau e koutou, ka kitea ano hoki e koutou, ina pau katoa o koutou ngakau ki te rapu i a au.
14
Ka kitea ano ahau e koutou, e ai ta Ihowa, ka whakatahuritia atu ano e ahau to koutou whakaraunga, ka kohikohia ano hoki koutou e ahau, i roto i nga iwi katoa, i nga wahi katoa i peia atu ai koutou e ahau, e ai ta Ihowa; ka whakahokia mai ano koutou ki te wahi i whakaraua atu ai koutou e ahau.
15
Na, ta koutou e ki ra, Kua whakaarahia ake e Ihowa etahi poropiti mo tatou i Papurona,
16
Ko te kupu tenei a Ihowa mo te kingi e noho ana i runga i te torona o Rawiri, mo te iwi katoa ano hoki e noho ana i tenei pa, mo o koutou teina kihai nei i haere tahi koutou i te whakaraunga;
17
Ko te kupu tenei a Ihowa o nga mano, Tenei au te unga atu nei i te hoari, i te hemo-kai, i te mate uruta, ki runga ki a ratou, a ka meinga ratou e ahau kia rite ki nga piki kino e kore nei e kainga i te kino.
18
Ka whaia ano ratou e taku hoari, e te hemo-kai, e te mate uruta, ka tukua atu ano ratou e ahau kia kawea ki nga kingitanga katoa o te whenua, a hei kanga ratou, hei miharotanga, hei whakahīanga atu, hei ingoa kino, i roto i nga iwi katoa e peia atu ai ratou e ahau:
19
Mo ratou kihai i whakarongo ki aku kupu, e ai ta Ihowa, ki aku i ungā atu ra e ahau kia kawea e aku pononga, e nga poropiti; moata tonu taku maranga ki te unga atu i a ratou; heoi kihai koutou i whakarongo, e ai ta Ihowa.
20
Na, whakarongo mai ki te kupu a Ihowa, e nga whakarau katoa i ungā atu e ahau i Hiruharama ki Papurona;
21
Ko te kupu tenei a Ihowa o nga mano, Atua o Iharaira, mo Ahapa tama a Koraira, mo Terekia ano hoki tama a Maaheia, e poropiti teka na ki a koutou i runga i toku ingoa, Tenei au te hoatu nei i a raua ki te ringaringa o Nepukararetara kingi o Papurona, a ka tukitukia raua e ia ki to koutou aroaro.
22
A ka ai raua hei kanga ma nga whakarau katoa o Hura i Papurona, ka korerotia, Kia meinga koe e Ihowa kia rite ki a Terekia raua ko Ahapa, i tunua nei e te kingi o Papurona ki te ahi;
23
Mo ta raua mahi poauau i roto i a Iharaira, mo ta raua puremutanga ki nga wahine a o raua hoa, mo ta raua korerotanga ano i nga kupu teka i runga i toku ingoa, he mea kihai i whakahaua atu e ahau ki a raua; kua mohio ahau, hei kai whakaatu ano ahau, e ai ta Ihowa.
24
Me korero ano e koe ki a Hemaia Neherami, me ki atu,
25
Ko te kupu tenei a Ihowa o nga mano, Atua o Iharaira, e mea ana ia, Na, kua tukua na e koe etahi pukapuka i runga i tou ingoa ki te iwi katoa i Hiruharama, ki te tohunga ano hoki, ki a Tepania tama a Maaheia, ratou ko nga tohunga katoa, kua mea na koe,
26
Kua oti koe te mea e Ihowa hei tohunga i muri i a Iehoiara tohunga, hei kai tirotiro ano koutou i roto i te whare o Ihowa mo te tangata katoa e haurangi ana, e whakaporopiti ana i a ia, kia makā e koe ki te whare herehere, ki nga here waewae.
27
Na, he aha ra tē riria ai e koe a Heremaia Anatoti e poropiti na ki a koutou?
28
Kua tukua mai nei hoki e ia he kupu ki a matou i Papurona nei, e mea ana ia, Ka roa tenei whakaraunga: hanga whare hei nohoanga mo koutou, Whakatokia etahi kāri, kainga hoki nga hua.
29
Na, ka korerotia atu tenei pukapuka e Tepania tohunga ki nga taringa o Heremaia poropiti.
30
Katahi ka puta mai te kupu a Ihowa ki a Heremaia, i ki ia,
31
Ungā atu he kupu ki nga whakarau katoa, mea atu, Ko te kupu tenei a Ihowa mo Hemaia Neherami, Kua poropiti na a Hemaia ki a koutou, a kihai ano ia i ungā atu e ahau; kua meinga ano koutou e ia kia whakawhirinaki atu ki te teka,
32
Mo reira ko te kupu tenei a Ihowa, Nana, ka whiua e ahau a Hemaia Neherami ratou ko ona uri, kore iho he tangata mona hei noho i roto i tenei iwi, e kore ano ia e kite i te pai e mahia e ahau ki taku iwi, e ai ta Ihowa, mo tana kupu tutu mo nga mea a Ihowa.