Jeremiah Chapter 3 - Paipera Tapu 1868 | Te Paipera Tapu 1868

Jeremiah Chapter 3 - Paipera Tapu 1868

1
E korerotia ana, ki te whakarerea e te tangata tana wahine, a ka haere atu ia i tona taha, ka riro i te tane ke, e hoki atu ano ranei ia ki a ia? E kore ianei taua whenua e poke rawa? ko koe ia kua puremu ki nga hoa tokomaha: na, hoki mai ki a au, e ai ta Ihowa.
2
Kia ara ake ou kanohi ki nga pukepuke, tirohia atu, ko tehea te wahi kihai na koe i puremutia. Nohoia atu ana ratou e koe i nga huarahi, pera ana koe me te Arapi i te koraha, a poke iho i a koe te whenua i ou puremutanga, i to mahi kino.
3
Na reira i kaiponuhia ai nga ua, kahore hoki he ua o muri; kei a koe hoki te rae o te wahine puremu, e whakakahore ana koe ki te whakama.
4
E kore ianei koe e karanga ki a au i nga wa a muri nei, E toku pāpā, ko koe te kai arahi o toku tamarikitanga?
5
E mau ranei tana riri, a ake ake? E whakapumautia tonutia ranei e ia? Nana, tau i korero ai, i mahi ai, ko nga kino i taea e koe.
6
I ki mai ano a Ihowa ki a au i nga ra o Kingi Hohia, Kua kite ranei koe i nga mahi a Iharaira tahuri ke, i ana haereerenga ki runga ki nga maunga tiketike katoa, ki raro i nga rakau kouru nui katoa, ki reira puremu atu ai?
7
I mea ano ahau i muri i tana meatanga i enei mea katoa, Hoki mai ki a au; heoi kihai ia i hoki mai, me te titiro atu ano tona teina tinihanga a Hura.
8
I kite ano ahau, na, ka takoto katoa nei nga take, ara, nga puremutanga a Iharaira tahuri ke, a ka ungā atu ia e au, ka hoatu ano hoki e ahau te pukapuka whakarere ki a ia, na, kihai tona teina a Hura tinihanga i wehi, heoi haere ana ia, puremu ana ano ia.
9
Na, te otinga, kua poke te whenua i te rongo o tana puremutanga, puremu ana ia ki te kohatu, ki te rakau.
10
Na, ahakoa ko tenei katoa, kihai i whakapaua te ngakau o tona teina tinihanga, o Hura, ki te hoki mai ki a au; he mea teka kau, e ai ta Ihowa.
11
Na, ko te meatanga mai a Ihowa ki a au, A Iharaira tahuri ke, nui atu tana whakatikanga i a ia i ta Hura, i ta te mea tinihanga.
12
Haere, karangatia atu enei kupu whaka-te-nota, mea atu, Hoki mai, e Iharaira tahuri ke, e ai ta Ihowa; a, e kore ahau e mea i taku riri kia tau ki a koutou; he atawhai hoki ahau, e ai ta Ihowa, e kore ahau e mauahara tonu.
13
Whakina kautia mai to he, ara, kua kino koe ki a Ihowa ki tou Atua, kua whakamararatia atu e koe ou ara ki nga tangata ke i raro i nga rakau kouru nui katoa, kihai ano i whakarongo ki toku reo, e ai ta Ihowa.
14
Tahuri mai, e nga tamariki tahuri ke, e ai ta Ihowa, kua marenatia hoki koutou e au, a ka tangohia koutou e ahau, tetahi i roto i te pa, tokorua hoki i roto i te hapu, ka kawea ano koutou e ahau ki Hiona.
15
A ka hoatu e ahau he hepara mo koutou, aku i pai ai, ka whangaia ano koutou e ratou ki te matauranga, ki te whakaaro pai.
16
A tenei ake, i te wa ano e nui ai, e hua ai, koutou ki te whenua i aua ra, e ai ta Ihowa, heoi ano a ratou kianga ake, Ko te āka o te kawenata o Ihowa; e kore ano e puta ake ki te ngakau; e kore hoki e maharatia taua mea e ratou, e kore ano ratou e haereere ki reira, kahore hoki he mahinga pera i muri iho.
17
I taua wa ano ka karangatia a Hiruharama, Ko te torona o Ihowa; ka huihuia ano hoki nga iwi katoa ki reira, ki te ingoa o Ihowa, ki Hiruharama, a heoi ano ta ratou haere i runga i te maro o o ratou ngakau kino.
18
I aua ra ka haere tahi te whare o Hura raua ko te whare o Iharaira, ka huihuia ano to ratou haere mai i te whenua ki te nota, ki te whenua i hoatu e ahau hei kāinga tupu ki o koutou mātua.
19
I mea ano hoki ahau, Me pehea e oti ai koe te whakauru e ahau ki nga tamariki, e hoatu ai e ahau ki a koe te whenua e minaminatia ana, te kāinga tupu, te wahi ataahua o nga mano o nga iwi? i mea ano ahau, Ka karangatia ahau e koe, E taku pāpā, e kore ano koe e tahuri atu i te whai i a au.
20
Rite rawa ki ta te wahine tinihanga i whakarere i tona tahu ta koutou mahi tinihanga ki a au, e te whare o Iharaira, e ai ta Ihowa.
21
I rangona he reo i runga i nga wahi tiketike, he tangi, he inoi, na nga tamariki a Iharaira, mo ratou i whakaparori ke i to ratou ara, wareware ake i a ratou a Ihowa to ratou Atua.
22
Hoki mai, e nga tamariki tahuri ke, maku e rongoa o koutou tahuritanga ketanga. Tenei matou te haere atu nei ki a koe; ko koe hoki a Ihowa to matou Atua.
23
He pono he hori noa iho nga pukepuke, me te tini o nga maunga: tika rawa kei a Ihowa kei to tatou Atua te whakaoranga mo Iharaira.
24
Kua pau hoki i te whakama te mauiui o o tatou mātua, no to tatou tamarikitanga ake ano, a ratou hipi, a ratou kau, a ratou tamariki, me a ratou tamahine.
25
E takoto ana tatou i runga i to tatou whakama, e taupokina ana hoki e to tatou matangerengeretanga: kua hara hoki tatou ki a Ihowa ki to tatou Atua, tatou, o tatou mātua, no to tatou tamarikitanga ake ano, a mohoa noa nei, kihai hoki i whakarongo ki te reo o Ihowa o to tatou Atua.