- 1
- Ki te mea ka hoki mai koe, e Iharaira, e ai ta Ihowa, hoki mai ki a au; ki te whakarerea atu ano hoki e koe o mea whakarihariha i toku aroaro, e kore koe e neke atu.
- 2
- Ka oati ano koe, Kei te ora a Ihowa i runga i te pono, i te whakarite whakawa, i te tika, mana hoki nga iwi ka whakapai ai ki a ratou ano, ka whakamanamana ano ratou ki a ia.
- 3
- Ko te kupu hoki tenei a Ihowa ki nga tangata o Hura, o Hiruharama, Ngakia ta koutou patohe: kaua hoki e whakato ki roto ki nga tataramoa.
- 4
- Kotia hoki koutou hei mea ki a Ihowa, whakarerea hoki nga kiri matamata o o koutou ngakau, e nga tangata o Hura, e te hunga ano e noho ana i Hiruharama; kei puta atu taku riri, ano he ahi, a ngiha ana, e kore ano e tineia, he mea hoki mo te kino o a koutou mahi.
- 5
- Karangatia i roto i a Hura, kia rongo a Hiruharama, mea atu, Whakatangihia te tētere ki te whenua: karanga atu, huihui, mea atu, Whakamine mai koutou, tatou ka haere ki nga pa taiepa.
- 6
- Whakaarahia te kara ki te ritenga atu o Hiona, putere atu koutou, kaua e tu; no te mea ka kawea mai e ahau he kino i te nota, he whatianga nui.
- 7
- Kei te haere mai te raiona i tona urupuia rakau, kei te ara ano te kai whakangaro o nga tauiwi; kua puta mai ia i tona wahi ki te whakangaro i tou whenua; ka ururuatia ou pa, kahore he tangata hei noho.
- 8
- Mo konei whitikiria he kakahu taratara ki a koutou; e tangi, e aue, no te mea e kore te muranga o ta Ihowa riri e tahuri atu i a tatou.
- 9
- I taua rangi ano, e ai ta Ihowa, ka pirau te ngakau o te kingi, me te ngakau ano o nga rangatira, a ka miharo nga tohunga; nga poropiti ano hoki ketekete kau ana.
- 10
- Ano ra ko ahau, Aue, e te Ariki, e Ihowa, kua pohehe rawa i a koe tenei iwi, a Hiruharama ano hoki i te kupu nei, Ka mau te rongo ki a koutou. Na, kua pa atu te hoari ki te wairua.
- 11
- I taua wa ano ka korerotia ki tenei iwi, ki Hiruharama ano hoki, He hau maroke no nga wahi tiketike i te koraha e tika mai ana ki te tamahine a toku iwi, ehara i te mea hei whakarererere witi, hei tahi papapa ranei.
- 12
- He hau nui no aua wahi ka tae mai ki a au. Akuanei ahau whakapuaki ai i te whakawa mo ratou.
- 13
- Nana, tona haerenga mai ka rite ki nga kapua, rite tonu ano ona hariata ki te tukauati, he tere rawa ona hoiho i nga ekara. Aue te mate mo tatou! ka pahuatia hoki tatou.
- 14
- Horoia atu te kino o tou ngakau, e Hiruharama, kia ora ai koe. Kia pehea te roa o te nohoanga o o whakaaro kino i roto i a koe?
- 15
- No te mea e whakaatu mai ana te reo i Rana, e mea ana hoki i te kino kia rangona mai i Maunga Eperaima.
- 16
- Korero atu ki nga iwi, Nana, kia rangona te he mo Hiruharama; kei te haere mai nga kai tiaki i te whenua tawhiti, ka puaki to ratou reo mo nga pa o Hura.
- 17
- Ta ratou ki a ia rite tonu ki ta nga kai tiaki o te mara i tetahi taha, i tetahi taha, mona i tutu ki a au, e ai ta Ihowa.
- 18
- Na tou ara, na to mahi, enei i pa ai ki a koe, nou tenei he, he kawa hoki, kua pa hoki ki tou ngakau.
- 19
- Oku whekau, oku whekau! mamae pu a roto o toku ngakau, oho ana toku ngakau i roto i a au, e kore ahau e whakarongo puku; kua rongo hoki koe, e toku wairua, ki te tangi o te tētere, ki te hamamatanga o te whawhai.
- 20
- He whakangaromanga hono iho ki te whakangaromanga te karangatia mai nei; kua pahuatia katoatia hoki te whenua, kitea rawatia ake kua pahuatia oku teneti, mea kau iho ko oku kakahu tauarai.
- 21
- Kia pehea ake te roa o taku tirohanga atu ki te kara, o taku rongonga i te tangi o te tētere?
- 22
- He wairangi hoki toku iwi, kahore ratou e mohio ki a au: he tamariki kuare ratou, kahore o ratou matauranga, e mohio ana ratou ki te mahi kino; ki te mahi pai ia kahore he matauranga.
- 23
- I titiro atu ahau ki te whenua, na, kahore he ahua, e takoto kau ana, ki nga rangi ano hoki, na, kahore o reira māramatanga.
- 24
- I titiro atu ahau ki nga maunga, na, e ngaueue ana, nga pukepuke katoa ano hoki e ohooho ana.
- 25
- I titiro atu ahau, a kahore he tangata, nga manu katoa ano hoki o te rangi kua rere atu.
- 26
- I titiro atu ahau, na, he koraha kau te mara momona, kua pakaru ano hoki ona pa katoa i te aroaro o Ihowa, i te muranga ano o tana riri.
- 27
- Ko te kupu hoki tenei a Ihowa, Ka ururua katoa te whenua, otiia e kore e whakapaua rawatia e ahau.
- 28
- Mo konei ka tangi te whenua, ka mangu ano hoki te rangi i runga: no te mea kua korero nei au, kua takoto taku whakaaro, e kore ano e puta ke taku, e kore hoki ahau e tahuri atu i tena.
- 29
- Ka whati katoa te pa i te reo o nga hoia eke hoiho, o nga kai kopere, ka haere ratou ki roto ki nga urupuia rakau, ka piki ki runga ki nga kamaka: ka mahue katoa nga pa, e kore hoki tetahi tangata e noho ki roto.
- 30
- A ka oti koe te pahua, ka pehea koe? Ahakoa kakahu noa koe i te ngangana, ahakoa whakapaipai noa koe i a koe ki nga whakapaipai koura, ahakoa haehae noa koe i ou kanohi, mea rawa ki te pukepoto; maumau mea noa koe i a koe kia ahua pai, ka whakahawea ki a koe te hunga i aroha ki a koe, ka whai kia whakamatea koe.
- 31
- I rongo hoki ahau i tetahi reo, me te mea no te wahine e whanau ana, he mamae, me te mea ko tana matamua e puta mai ana; no te tamahine a Hiona te reo i a ia e tangi whakahotuhotu ana, whewhera tonu ona ringaringa, karanga tonu ia, Aue te mate i a au! kua hoha hoki toku wairua i nga kai whakamate.
Address: 
Phone: 
Email: