Jeremiah Chapter 41 - Paipera Tapu 1868 | Te Paipera Tapu 1868

Jeremiah Chapter 41 - Paipera Tapu 1868

1
Na, i te whitu o nga marama ka haere mai a Ihimaera tama a Netania tama a Erihama, he uri kingi, ratou ko nga rangatira a te kingi, kotahi tekau ona hoa, ki a Keraria tama a Ahikama ki Mitipa. Na, kei te kai taro ratou tahi ki reira ki Mitipa.
2
Na, te whakatikanga ake o Ihimaera tama a Netania, ratou ko ona hoa kotahi tekau, patua iho e ratou a Keraria tama a Ahikama tama a Hapana ki te hoari, mate rawa, tera i meinga e te kingi o Papurona hei kawana mo te whenua.
3
Na, nga Hurai katoa, nga hoa ona, o Keraria, i Mitipa, ratou ko nga Karari i kitea ki reira, nga tangata whawhai, patua iho e Ihimaera.
4
Na, i te rua o nga ra i muri i tana whakamatenga i a Keraria, a kihai i mohiotia e tetahi tangata,
5
Ka haere mai etahi tangata i Hekeme, i Hiro, i Hamaria, e waru tekau nga tangata, heu rawa o ratou pahau, haehae rawa nga kakahu, he mea haehae ano hoki ratou, me te whakahere, me te whakakakara ano i o ratou ringaringa hei tapaenga atu ki te whare o Ihowa.
6
Na, ka haere atu a Ihimaera tama a Netania i roto i Mitipa ki te whakatau i a ratou, tangi haere ana ia; a, tana tutakitanga atu ki a ratou, ka mea ia ki a ratou, Haere mai ki a Keraria tama a Ahikama.
7
Na, to ratou taenga mai ki roto ki te pa, patua iho ratou e Ihimaera tama a Netania, makā atu ana ia e ratou ko ona hoa ki roto ki te poka.
8
Na, tekau nga tangata i kitea i roto i a ratou e ki mai ana ki a Ihimaera, Kaua matou e whakamatea; he taonga hoki a matou kei te parae, he witi, he parei, he hinu, he honi. Na, mutu ake tana; kihai hoki ratou i whakamatea e ia i roto i o ratou teina.
9
Na, te rua i makā ai e Ihimaera nga tinana katoa o nga tangata i patua nei e ia ki te taha o Keraria, ko tera i hangā e Kingi Aha i te wehi ki a Paaha kingi o Iharaira. Whakakīa ana taua poka e Ihimaera tama a Netania ki te hunga i patua.
10
Na, whakaraua atu ana e Ihimaera nga morehu katoa o te iwi i Mitipa, nga tamahine a te kingi, me nga morehu katoa i Mitipa, te hunga i meinga nei a Keraria tama a Ahikama hei kawana mo ratou e Neputara-arana rangatira o nga kai tiaki; whakaraua atu ana ratou e Ihimaera tama a Netania, a haere ana ia, whiti atu ana ki nga tamariki a Amono.
11
A, te rongonga o Hohanana tama a Karea, ratou ko nga rangatira katoa o nga ope e noho ana i a ia, ki te kino katoa i oti i a Ihimaera tama a Netania,
12
Na, ka tango ratou i nga tangata katoa, a haere ana ki te whawhai ki a Ihimaera tama a Netania; kitea rawatia kei nga wai nui i Kipeono.
13
Te hunga katoa i a Ihimaera, to ratou kitenga i a Hohanana tama a Karea, i ona hoa ano hoki, i nga rangatira katoa o nga ope, na, ka koa ratou.
14
Te tino tahuritanga mai o te hunga katoa i whakaraua atu e Ihimaera, i Mitipa, hoki mai ana, haere ana ki a Hohanana tama a Karea.
15
Ko Ihimaera ia tama a Netania i mawhiti atu, ratou ko nga tangata tokowaru, i te aroaro o Hohanana, a haere ana ki nga tamariki a Amono.
16
Na, ka tango a Hohanana tama a Karea, ratou ko ona hoa, ko nga rangatira katoa o nga ope, i nga morehu katoa o te iwi i era o Mitipa i whakahokia mai e ia i a Ihimaera tama a Netania, i muri iho i tana patunga i a Keraria tama a Ahikama, ara, nga marohirohi, nga tangata whawhai, nga wahine, nga tamariki, nga unaka, i whakahokia mai e ia i Kipeono.
17
A haere ana, noho ana i nga nohoanga a Kimihama i te taha o Peterehema, he mea kia haere ai ratou ki Ihipa;
18
I te wehi ki nga Karari; i wehi hoki ratou i a ratou, mo te patunga a i a Ihimaera tama a Netania i a Keraria tama a Ahikama, i meinga nei e te kingi o Papurona hei kawana mo te whenua.